Nahúm 1
1
Ti Diose ta sc'ac'al yo'nton ta spac sutel
1Ti jpoc vun li'e, laj sts'iba ti Nahúm ti liquem talel ta Elcós ti oy c'usi ac'bat yil c'alal jam ti sba sate. Va'i un, ta scaj'albe sc'oplal ti oy c'usi ta xc'ot ta stojol ti jteclum Ninivee.#Is 10.5-34; 14.24-27; Sof 2.13-15.
2Ti Ajvalile, ja' Dios ti mu sc'an ti ta xavac' abaic ta stojol ti yane;
ti oy ta yoc ta sc'ob ta spaquel sutel xtoque,#Ex 20.5-6; Dt 4.24.
Ta spacbe sutel ti buch'utic ta sa' sbaic ta stojole,
ja' jech xtoc ta x'ilin ta stojol ti scontrataque.
3Ti Diose oy sts'iquemal xcuchemal, jelavem ta j'ech'el ti smuc'ul stsatsale,
ta ono'ox stsits ti buch'u oy smule.
Yu'un ti Diose ta xanav ti bu sts'otet no'ox xchi'uc ya'lel ti tsots iq'ue;
c'otem ta spucuquil yacan ti toquetique.
4Ta stsac ta c'op ti muc' ta nabe, ta xlic taquijuc.
Ta xtaquij yu'un scotol ti yoc uc'umetique.
Laj nucultajuc ti c'usitic oy ta osiletic ta Basane, xchi'uc ste'tical ti vits Carmeloe;
laj nucultajuc yu'un xtoc ti nichimetic ti oy ta vits Libanoe.
5Xnicnun liquel ti muc'tiquil vitsetic yu'une;#Sal 97.5; Mi 1.4.
ta x'unij yalel yu'un ti toyol ch'en vitsetique.
Xnicnun liquel sbejel ti banomil ti c'alal ta xilique;
ta xnic scotol ti c'usitic cuxul ta sbejel ti banomile.
6¿Mi yu'un la oy to buch'u va'al to ta xcom ti c'alal lamal ta xvul ti sc'ac'al yo'ntone?
¿Mi yu'un la oy buch'u ta xcuch yu'un ti c'alal lamal ta xvul ti sti'emal sjole?
Co'ol s'elan c'oc' ta scolta talel ti sti'emal sjole,
ta xjav ti ch'en vitsetic yu'une.
7Ti Diose jun yutsil yo'nton.
Jun nac'obbail ti xi s'elan ta xc'ot ti c'alal yorail oy ilbajinele;
ta stic' sba ta spojel ti buch'u ta spat yo'nton ta stojole.#Sal 25.8; 37.39-40.
8Ja' no'ox un, co'ol s'elan junuc uc'um ti scotol ta sbec' batele,
ti ta stubbe sc'oplal ta j'ech'el ti buch'utic ta sa' sbaic ta stojole;
ti yajcontrataque, ta x'uninatic yu'un ti ic'uneb osil banomil ta xa'iique.
9¿Mi yu'un la oy to c'uxi xu' xavut ti ta xatoy aveic ta scontrainel ti Diose?
Ta stub ac'oplalic ta j'ech'el ti stuque.
Laj to sc'oplal ma' ti q'uelbil no'ox xtac'tun ta stoyel ye chibuc velta une.
10Ta xich'ic tubel ta j'ech'el jech c'u cha'al junuc ts'otol ch'ix,
jech c'u cha'al junuc taquin jobel ti ta xc'ac' ta j'ech'ele.
11Ti ta atojole, jteclum Nínive, loc' talel ti chopol xi xvulvunet ta scontrainel ti Diose: le'e, ja' jun chopol jbijubtasvanej. 12Jech o xal ti Diose xi ta xalbe ya'i ti steclumale: “Ti asirioetique, manchuc mi tsots xu' yu'unic, mi jun yepalic ta j'ech'el xtoc, yu'un ta stsutsesatic ta j'ech'el. Ch'ab xi no'ox ti yuni c'oplalic xtoque, ta jpas ta atojolic ti ch'ab xi liquel ti jech ep laj xa cac' avocolique. 13Ta j'ech'el ta jlilinbot loq'uel ti co'ol s'elan yabtejeb vacax ti ja' ts'otbilot yu'une; ta jlilin ta tuch'el ti acarinaile.” 14Ti ajvalilot yu'un ti jteclum Ninivee, xi xa s'elan loc' mantal yu'un ti Dios ta atojole: “Mi ja'uc junuc anitilultac ta xcom ta aq'uexol ti ta xich' comel ti abie. Ta xch'ulna ti adiose, ti c'usitic loc'tabile, ti loc'obbailetique, ta jtubbe sc'oplal. Ti bu taje, tey ta jmucot ava'i, yu'un mu'yuc atu la'ech' ta j'ech'el.”
Ta xich' caj'alel ti ta xtub sc'oplal ti jteclum Ninivee
15¡Q'uelo avilic, le' xa xtal ta vitstic ti j'al-mantal j'ich'-c'ope, yu'un tal yalbe sc'oplal ti lamaj xa ti c'ope!#Is 52.7. Ja' yu'un un, lic paso ti q'uinetic avu'une, jteclum Judá. Ti c'usitic avaloj ta xapase, c'otuc me ta pasel avu'un. Ta j'ech'el mi ja'uc xa ta xtal yilbajinot ti jchopol-joletique. Ta j'ech'el tubbat xa ti sc'oplalique.
Currently Selected:
Nahúm 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000