San Marcos 6
6
Ti Jesuse oy ta Nazaret
(Mt 13.53-58; Lc 4.16-30)
1Ti Jesuse loc' batel ti bu to ox oye. Bat ta slumal stuc xchi'uc ech'el ti yajchanc'optaque. 2C'alal c'ot ti sc'ac'alil cuxob o'ntonale, ti Jesuse lic chanubtasvanuc ta ch'ul na. C'alal ya'ibeic sc'op Jesús ti c'u yepal tsobolique, xch'ay no'ox yo'ntonic yu'un, xi ta sjac'be sbaique:
—¿Bu laj xchan talel scotol ti vinic le'e? ¿Bu laj sta talel ti sbijile xchi'uc ti ch'ay no'ox o'ntonal yu'un ti c'usi ta spase? 3¿Mi mu ja'uc jcarpintero ti vinic le'e, squerem ol ti Mariae, xchi'il ta voq'uel ti Jacoboe, ti Josee, ti Judase, ti Simone? ¿Mi mu li'uc jchi'uctic ta naclej ti yixleltaque?
Jech o xal mu'yuc xich'ic ta muc'. 4Ja'uc ti Jesuse xi laj yale:
—Buyuc no'ox scotolic ta xich'ic ta muc' jun j'alc'op. Ja'uc ta slumal stuque,#Jn 4.44. yuts' yalaltac no'ox, jmojic ta yut na no'ox mu x'ich'e ta muc' yu'unic.
5Mu'yuc bu laj yac' ta ilel ti c'usi ch'ayal ta xc'ot o'ntonal yu'un ti bu taje. Jun chib no'ox oy bu laj scajan sc'ob ta stojol ti jchameletic ti col yu'une. 6Labal laj ya'i ti mu x'ich'e ta muc' yu'un ti slumale. Ti Jesuse ech' chanubtasvanuc ta uni lumetic ti joyol ta spat xocon ti jteclum Nazarete.
Ti Jesuse stac batel yajchanc'optac ta yalel sc'oplal ti ventainel yu'un ti Diose
(Mt 10.5-15; Lc 9.1-6)
7Ti Jesuse laj yic' talel ti lajcha'vo' (12) yajchanc'optaque. Laj stacan batel ta cha'cha'vo'. Laj yac'be yich' tsots yabtelic ta staquel loq'uel ti pucujetic ti mu stac' q'uelel ta j'ech'el ti c'usitic ta spasique. 8Laj yalbe ya'i ti mu'yucuc c'usi xich'ic batel ta sventa ti bee, ti ja'uc no'ox yich'ic batel ti snamte'ique. J'ech'el mu xich'ic batel ti sve'elique, ti smoralique, ti staq'uinique. 9Xu' slap batel ti xonobique. J'ech'el mu xu' xich'ic batel sjeltaobba c'u'ic. 10Xi laj yalbee:
—Ti bu ta xa'ochic ta jun na ti vo'oxuque, comanic ja' to ta xaloq'uic mi oy bu ta xabatic ta yane. 11Mi oy bu mu xayich'ic ta muq'ue, mi mu sc'an xa'iic ti c'usi ta xavalique, loc'anic batel. Lilino comel spucuquil ti avoquique, senyail ti laj xa stoy sbaique. Ta xcalboxuc ava'iic ta melel, c'alal ta sta sc'ac'alil ti chapanele, x'ech' to tsots ta xich'ic ti tsitsele, ja' mu sta ti buch'utic nacalic to ox ta Sodoma xchi'uc ta Gomorra jteclume.#Lc 10.4-11.,#Hch 13.51.
12Va'i un, ti yajchanc'optaque loq'uic batel ta yalbel ya'iic ti jnaclejetic ta banomile ti ya'iicuc sbaique xchi'uc ti suticuc talel ta stojol ti Diose. 13Yepal no'ox pucujetic laj staquic loq'uel xchi'uc yepal no'ox laj scolesic jchameleltic laj yac'beic aceite ta stojol.#Stg 5.14.
Ta xcham ti Juan j'ac'-ich'-vo'e
(Mt 14.1-12; Lc 9.7-9)
14Ti ajvalil Herodese laj ya'ibe sc'oplal Jesús ti buyuc no'ox xpuquete. Oy ep buch'utic xi laj yalique:
—Ti Juan j'ac'-ich'-vo'e cha'cuxi, jech o xal oy ta stojolal ti oy c'usi ch'ayal ta xc'ot o'ntonal ta xac' iluque.
15Xi ta xalic ti yane:
—Ja' ti j'alc'op Eliase.
Xi ta xalic ti yan xtoque:
—Ja' jun j'alc'op jech c'u cha'al ta vo'nee.#Mt 16.14; Mr 8.28; Lc 9.19.
16C'alal jech laj ya'i ti ajvalil Herodes taje, xi ta xale:
—Sc'oplal ti Juan taje. Vu'un laj cal ti yich'uc c'ocbel ti sjole. Ja' xa cha'cuxi talel.
17Ti jech ta xal taje, yu'un ti Herodese ja' ono'ox laj yac' ta tsaquel ti Juane. Laj yal mantal ti yich'uc chuquel ta cadena taq'uin ta chuquinab ta scoj ti Herodiase ti laj xa yajnilan ti Herodese ac'o mi ja' yajnil to ox ti Felipee, yits'in ti Herodese. Yu'un ti ajvalil Herodese laj spojbe yajnil ti yits'ine. 18Yu'un ti Juan j'ac'-ich'-vo'e xi laj yalbe ya'i ti ajvalil Herodese:
—Mu jechuc ta pasel ma' le' une ti ta xabis ta avajnil yajnil ti avits'ine.#Lc 3.19-20.
19Ti jech taj une, xti'et sjol ti Herodías ta stojol ti Juane, j'ech'el ta smil ya'i. Ja'uc le'e, mu'yuc c'usi xut. 20Ti ajvalil Herodese xi'taoj ti Juane yu'un sna'oj lec ja' lequil tuq'uil vinic, xchabioj yo' mu'yuc c'usi snuptan. Manchuc mi mu xa'ibe lec smelol ti c'usi ta xale, ti ajvalil Herodese sjunul yo'nton ts'etel lec xchiquin ta xa'ibe sc'op ti Juane.
21Oy bu laj sta sc'ac'alil, laj spas q'uin ti ajvalil Herodes ta sventa ts'aqui sjabilal, ti laj yac' ve'el ta stojol ti jpas-mantaletic yu'une, ti banquilaletic yu'un ti yajsoldadotaque, xchi'uc ti cajal yabtel yich'ojic ta Galileae. Lec xa snupoj c'ot ti ants Herodiase. 22Yantsil ol ti Herodiase och batel ta ac'ot ti bu tsobolic ta q'uine, ti c'upil sba laj yil ti Herodes c'u s'elan ac'otaje. Jech laj yilic scotolic xtoc ti jmoj volol ta xve'ic xchi'uque. Ti ajvalile xi laj yalbe ti tsebe:
—C'anbun ti c'usi ta xac'ane, ta xcac'bot. 23Xil Dios, ta xcac'bot ti c'usi ta xac'ane. Ac'o mi o'lol jvoc' ti muc' ta lum jventainoje, ta xac'bot.
24Loc' batel ti tsebe, xi bat sjac'be ti sme'e:
—¿C'usi ta jc'anbe xana' ti ajvalile?
—C'anbo sjol ti Juan j'ac'-ich'-vo'e —xi ti sme'e.
25Ta anil och batel ti tseb bu oy ti ajvalil Herodes, ti xi laj yalbee:
—Ac'bun no'ox xcha' talel ta ba platu sjol ti Juan j'ac'-ich'-vo'e.
26At-o'nton xa liquel ti ajvalil Herodes c'alal jech laj ya'ie. Ti laj xa sva'an sba ta yalel ta sba ta sat ti c'u yepal ic'bil yu'une, mu xa xu' ta sutes ye ti jech laj yale. 27Ta jech yepal un, laj yalbe mantal jun yajsoldado ti sc'ocbuc talel sjol ti Juane. 28Bat ta chuquinab ti soldadoe, laj sc'ocbe sjol ti Juane, yich'oj talel ta jun platu. Laj yac'be ti tsebe, ti tsebe laj yac'be jelavel ti sme'e.
29C'alal laj ya'iic yajchanc'optac ti Juane, bat yich'beic talel ti sbec'tal stacopale yo' chba smuquic.
Ti Jesuse ta xac' ve'uc vo'mil (5,000) ta vo'
(Mt 14.13-21; Lc 9.10-17; Jn 6.1-14)
30Laj taj une, ti yajchanc'optaque laj stsob sbaic xchi'uc ti Jesuse, laj yalbeic ya'i scotol ti c'usi laj spasique xchi'uc ti c'u s'elan chanubtasvanique. 31Ti Jesuse xi laj yalbeique:
—La'ic, ba jcux co'ntontic ca'tic jliqueluc ti bu sts'ijlajan ti banomile.
Yu'un xtal xbat yepal ta j'ech'el ti jnaclejetic ta banomil ti mu'yuc c'usi xut x'aq'ue ve'icuque. 32Ti Jesuse xchi'uc ti yajchanc'optaque batic ta jun barco ti bu sts'ijlajan ti banomile. 33Yepal laj yilic ti bate, laj yojtiquinic xtoc ti ja'e. Va'i un, ep ti jteclum bu liquemic talele, batic ta anil ti bu taje, ba'yel c'ot ti stuquique. 34C'alal loc' ta barco ti Jesuse, laj yil volol xa ti epal jnaclejetic ta banomile, c'uxubaj yo'nton yu'un, co'ol s'elan junuc tanijemal chij ti ch'abal yajval ta xq'uelee.#Nm 27.17; 1 R 22.17; 2 Cr 18.16; Jer 50.6-7; Ez 34.5; Zac 10.2; Mt 9.36. Ep ta tos c'u s'elan lic xchanubtas. 35C'alal mal xa ti c'ac'ale, ti yajchanc'optaque xi laj yalbeic ti Jesuse:
—Mal xa c'ac'al, li'e, ch'abal jnaclejetic. 36Taco xa batel, baticuc ta jbic'tal jteclum li' nopol no'oxe yo' ta sman sve'elic, yu'un mu'yuc sve'elic li'e.
37Xi laj stac' ti Jesuse:
—Ac'beic sve'elic ti vo'oxuque.
Xi laj stac'beique:
—¿Bu ta jtacutic lajunvinic ta sep (200) denario taq'uin yo' ta jmanbecutic sve'elic?
38Xi albatique:
—Ba q'uelic jayib pan oy avu'unic.
Xi laj yalbeic c'alal laj xa sna'ique:
—C'ajomal no'ox vo'bej (5) pan xchi'uc cha'cot (2) choy.
39Va'i un, ti Jesuse laj yal mantal ti choticuc ta jujutsop ta yaxaltique. 40Vo'vinic (100) ta vo', lajuneb yoxvinic (50) ta vo' ti jujutsop chotiique. 41Ta jech yepal un ti Jesuse laj stsac ti vo'bej pane xchi'uc ti cha'cot choye. Laj stoy muyel sat ta vinajel ta yalbel vocol ti Diose. Lic xet' ti pane. Laj yac'be jelavel ti yajchanc'optaque yo' ta xch'acbeic ti c'u yepal tsobolique. Ja' jech xtoc laj xch'acan ti cha'cot choye yo' ta staic o lec scotolic. 42Ve'ic scotolic ti bu xa c'alal xal ti yo'ntonique. 43Noj to lajcheb (12) moch scomelal ti pane xchi'uc ti choy ti laj stsobbeic ti scomelale. 44Ti c'u yepal ve'ic ta scotolique, ja' vo'ob mil (5000).
Ti Jesuse ta xanav ta ba vo'
(Mt 14.22-27; Jn 6.16-21)
45Laj taj une, ti Jesuse laj yalbe ya'i ti yajchanc'optaque ti ochicuc batel ta barco yo' ta xjelavic batel ta jteclum Betsaidae, ti ts'acal ta xc'ot ti stuque, yu'un ta to sc'opon comel ti jnaclejetique. 46C'alal laj sc'oponan comele, muy batel ta vits ta c'opojel ti'inel. 47C'alal och ti ac'ubale, o'lol xa nab xcajet batel ti barcoe. Ti jech stuc xa com ti Jesús ti bu oye, 48laj yil ti vocol ta xanav batel ti barcoe yu'un ta xuje sutel ta tsots ic'. C'alal ta xa sacub talele, nopaj batel ta stojolic ta xanav batel ta ba vo', ti tuc' xa jelavel ta jelav ta spas sba yilele. 49C'alal laj yilic ta xanav talel ta ba vo'e, avanic yu'un laj snopic ti ja' jun sbel-banomil, 50yu'un laj yilic scotolic, xi'ic ta j'ech'el. Ta jech yepal xi avan talel ti Jesús ta stojolique:
—Tsotsanic, Vu'unun. Mu xaxi'ic.
51Och ta barco ti Jesuse, ts'ij xi liquel ti iq'ue. Ch'ayal c'ot yo'ntonic yu'un. 52Yu'un mu'yuc to ta xc'ot lec ta yo'ntonic, ti xch'ay no'ox o'ntonal yu'un laj sboles ti pane, yu'un xch'ayet ti snopbenal yu'unique.
Ti Jesuse laj scoles jchameletic ta Genesaret
(Mt 14.34-36)
53Ech' xtuch'ic ti nabe. C'otic ta Genesaret banomil. Ti bu taje laj xchuquic comel ti barco ta ti' nabe. 54C'alal yacal to ta xloq'uic ta barcoe, ti jnaclejetique ta jech yepal laj yojtiquinic ti Jesuse. 55Ta sjunul ti banomil bu taje, batic ta anil ta spoyel talel ti jchamelic bu oy ti Jesuse. 56Buyuc no'ox ta x'och batele, mi ta biq'uit jteclum, mi ta jteclum, mi ta naetic, mi be, ta xaq'uic ti yajchamelic ti xvocoletic ta stojol ti yac'uc ta piquel jutebuc ti sti'il sc'u'e. Scotolic ti buch'u ta stabe ta picbel ti sti'il sc'u'e, toj lecubel ta xc'ot.
Currently Selected:
San Marcos 6: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000