San Marcos 2
2
Ti Jesuse ta scoles jun moch'
(Mt 9.1-8; Lc 5.17-26)
1C'alal ech' jayibuc c'ac'ale, cha'sut batel ta Capernaum jteclum ti Jesuse. Vinaj sc'oplal ti oy ta jbe nae. 2Ta ora no'ox laj stsob sbaic ti epal jnaclejetic ta banomile, ti mi ja'uc xa xu' x'ochic ta ti'nae. Ti Jesús une lic yal ti lequil ach' c'ope. 3Va'i un, tal chanvo' (4) viniquetic spoyojic batel jun moch'. 4Ti jech yepal no'ox ti jnaclejetic ta banomile, mu xu' xjelavic ochel bu oy ti Jesuse, muyic batel ta sjomel jol na ta stuq'uil bu oy ti Jesuse, xchechbil yalel yu'unic ta ch'ojon xchi'uc svayeb ti jchamele. 5C'alal yil ti Jesus c'otem ta yo'ntonic ti c'u s'elan xch'unojique, xi laj yalbe ti jchamele:
—Nich'on, ch'aybil xa c'ot ti amule.
6Ti bu taje, chotolic xtoc jun chib jchanubtasvanejetic yu'un oy c'usi jbel tsots albil sc'oplal, xi ta snopique: 7“¿C'u ono'ox xi ta alel ti va'i s'elan ta xal ti vinic li'e? Ti sc'ope, ja' no'ox ta soquesbe yo'nton ti Diose. Yu'un ja' no'ox Dios xu' ta xch'ay ti mulil colo'ile.” 8Ti Jesuse ta jech yepal laj sna' ti c'u s'elan ta snopique, xi laj yale:
—¿C'u no'ox cha'al ti jech ta xanopique? 9¿C'usi ti lec ta albel xcaltic ti moch' vinic li'e? ¿Mi ja' ti ch'aybil c'ot ti amul acolo'e? ¿Mi ja' lec ti xi ta xich' albele: ‘Lican, va'lan, ich'o batel ti avayebe’? 10Ta xcac' avilic ti vu'un co'ol j'elantique ti quich'oj tsots cabtel ta banomil ti xu' ta xch'ay ti mulil colo'ile.
11Va'i un xi laj yalbe ti moch' vinique:
—Ta xcalbot ava'i ti vo'ote, lican, va'lan, balo ti avayebe, batan ta ana.
12Ta jech yepal va'i ti jchamel vinique, sbal xch'a ti svayeb ta sba ta sat scotolic, va'i un, loc' batel ti bu taje. Ti jech taj une, scotol ch'ayal c'ot yo'ntonic ti xi laj slequil-c'optaic ti Diose:
—Mu bac'niuc xquiltic ti jech xc'ot ta pasel le'e.
Ti Jesuse ta xic' talel ti Levie, ja' ti Mateoe
(Mt 9.9-13; Lc 5.27-32)
13Ts'acal to ti Jesuse cha'bat ti ta sti'il nabe, yepal no'ox jnaclejetic ta xc'ot ta stojol ti lic xchanubtasvane. 14C'alal ja' o jelav ech'el ti Jesuse, laj yil ti Levie, xnich'on ti Alfeoe, chotol bu ta sc'anic patan taq'uin sventa ti Romae, ti Jesuse xi laj yale:
—La', batic.
Ti Levie va'i, laj xchi'in batel ti Jesuse.
15C'ot ta pasel un, ti Jesuse ve' ta sna ti Levie, yepal ti jc'an-patan-taq'uinetic sventa ti Romae xchi'uc ti jsa'muliletique jmoj chotolic ta sti'il mexa ta xve'ic xchi'uc ti Jesuse, xchi'uc ti yajchanc'optaque, yu'un yepal ta jmec ti buch'utic ta ts'acliic batele. 16C'alal laj yilic ti fariseoetique, ti jchanubtasvanejetic yu'un ti oy c'usi tsots albil sc'oplale, ti ta xve'ic xchi'uc Jesús scotolic taje, xi laj yalbeic ti yajchanc'optaque:
—¿C'u cha'al jmoj ta xve'ic xchi'uc jc'an-patan-taq'uin xchi'uc jsa'muliletic ti jchanubtasvanej avu'unique?
17C'alal laj ya'i ti Jesuse, xi laj yale:
—Ti buch'u mu'yuc xchamelique mu'yuc ta xtun yu'unic ti jpoxtavaneje. Ja'uc ti buch'u oy xchamelique ta xtun yu'unic ti jpoxtavaneje. Ti vu'une ma'uc tal jsa' ti buch'u ch'abal smulique. Ja' tal jsa' ti buch'u jsa'muliletique.
Sc'oplal ti comtsanej vaje
(Mt 9.14-17; Lc 5.33-39)
18Oy bu c'ot ta pasel laj yicta yotic yajchanc'optac ti Juan j'ac'-ich'-vo'e xchi'uc yajchanc'optac ti fariseoetique, oy jun chib viniquetic batic ta stojol ti Jesuse ti xi laj sjac'beique:
—¿C'u cha'al ta xicta yotic yajchanc'optac ti Juane xchi'uc yajchanc'optac ti fariseoetique, ja'uc ti avajchanc'optaque mu'yuc ta xicta yotic?
19Ti Jesuse xi laj staq'ue:
—¿Mi yu'un la xu' ta xicta yotic ti buch'utic ic'bilic ta uch'vanej ta sventa ti nupunel c'alal li' to oy ta stojolic ti jlecvaneje? C'alal li' to oy ti jlecomajele, mu'yuc ta xicta yotic. 20Oy bu ta sta sc'ac'alil ta x'iq'ue batel ti jlecomajele, c'alal mi c'ot ti sc'ac'alile, ta xlic yicta yotic unbi.
21Mi junuc ta spac' ta ach' poq'uil ti poco' c'u'ile. Mi jech ta spase, c'alal ta smuts ti ach' poq'ue, yantic xjatolaj batel ti poco' c'u'ile, ta xmuq'uib ti sjatemale. 22Ja' jech xtoc ti ach' vinoe, mu stac' tiq'uel ta spoco'-avil. Mi jech ta spase, yu'un ti ach' vinoe ta st'omes ti spoco'-avile, ta xch'ay ti vinoe, xchi'uc ta xch'ay ti yavile. Jech o xal ti ach' vinoe, sc'an tiq'uel ta ach' yavil.
Yajchanc'optac ti Jesuse ta sbulic trigo ta sc'ac'alil cuxob o'ntonal
(Mt 12.1-8; Lc 6.1-5)
23C'alal ja' o sc'ac'alil cuxob o'ntonale, ti Jesuse ta xanav batel xchi'uc ti yajchanc'optac ti bu ts'unul ti trigoe, ta sbulic batel trigo yo' ta sju'beic ti sat xc'uxique.#Dt 23.25. 24Xi jac'bat yu'un ti fariseoetique:
—A'yio ava'i, ¿c'u cha'al jech ta spasic ti avajchanc'optac c'alal mu stac' pasel jech ta sc'ac'alil cuxob o'ntonale?
25Ja'uc ti stuque, xi laj yale:
—¿Mi mu'yuc avilojic c'usi laj spas David xchi'uc ti xchi'iltac c'alal ja' o ta xvi'najique? 26Ti Davide och batel ta ch'ulna, c'alal ja' o ochem ta banquilal pale ti Abiatare, laj stsac ti pan ti c'otem ta sventa ti Diose, yo' ta sve' xchi'uc ti svinictac c'alal ja' no'ox xu' ta sve' stunic ti paleetique.#Lv 24.9.,#1 S 21.1-6.
27Ti Jesuse xi to laj yal batele:
—Ti sc'ac'alil cuxob o'ntonale, nopbil ta sventa slequilal ti vinique, ma'uc nopbil ta sta svocol ti vinic ta sventa ti sc'ac'alil cuxob o'ntonale. 28Ja' yu'un un, ti co'ol j'elantique, vu'un jventainoj ti sc'ac'alil cuxobil o'ntonale.
Currently Selected:
San Marcos 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000