San Marcos 1
1
Ti Juan j'ac'-ich'-vo'e ta xal lequil ach' c'op ta xocol banomil
(Mt 3.1-12; Lc 3.1-9,15-17; Jn 1.19-28)
1Sc'oplal sliquebal ti lequil c'op yu'un ti Jesucristo Xnich'on ti Diose. 2Mu yanuc jech c'u cha'al xi laj sts'iba comel ti j'alc'op Isaiase:
“Ba'yel ta jtac jelavel caj'alc'op ta atojol yo' jech ta smeltsan batel ti abee.#Mal 3.1.
3Oy buch'u tsots ta x'avan ta xocol banomil ti xi ta xale:
‘Meltsanbeic sbe ti Cajvaltique.
Jambeic junuc tuq'uil be.’ ”#Is 40.3.
4C'ot ta pasel un, tal ta xocol banomil ti Juan ta yac'bel yich' vo' ti jnaclejetic ta banomile. ta yalbel ya'iic ti suticuc talel ta stojol Dios yo' ta xch'aybat ti smul scolo'ique. 5Sjunul ti Judea banomile, ti Jerusalene batic ta ya'yibel sc'op ti Juane. Ti buch'u jamal ta xal ti smulique, ta x'ac'bat yich'ic vo' yu'un ti Juan ta uc'um Jordane.
6Sc'u' ti Juane meltsanbil ta stsotsil camello, sbaloj ta chuquel ta jun silbil nucul.#2 R 1.8. Naca c'ulub xchi'uc te'etical ajapom ti sve'ele. 7Ti sc'op ti c'u s'elan ta xloc' ta alel yu'une, xi ta xale:
—Oy Buch'u ts'acal to ta xtal ta jtojol ti jelavem xu' yu'une, ja' mu sta ti vu'une. Mu'yuc jlequilal ta jcujan jba ta sjitunbel ti yaq'uil xonobe. 8Vo' no'ox ta xcac' avich'ic ti vu'une. Ti Buch'u ta to xtale, ja' ta xac'boxuc avich'ic ti Ch'ul Espiritue.
Ta xich' vo' ti Jesuse
(Mt 3.13-17; Lc 3.21-22)
9Ti jech yorail taje, ja' o loc' talel ti Jesús ta jteclum Nazaret ti oy ta Galilea banomile. Ac'bat yich' vo' yu'un ti Juan ta uc'um Jordane. 10C'alal loc' talel ta vo' ti Jesuse, laj yil ijam ti vinajele, yal talel ta stojol ti Ch'ul Espiritue co'ol s'elan jcot paloma. 11Oy Buch'u c'opoj talel ta vinajel ti xi ta xale:
—Vo'ot ti jc'uxubinbil Nich'on ti ximuyubaj ta atojole.#Gn 22.2; Sal 2.7; Is 42.1; Mt 3.17; 12.18; Mr 9.7; Lc 3.22.
Ti Jesuse ta xich' lajeltsael
(Mt 4.1-11; Lc 4.1-13)
12Ts'acal to un, ic'bil bat ti Jesús yu'un ti Ch'ul Espíritu ta xocol banomile. 13Ti bu taje, naca chonetic xchi'uc. Cha'vinic (40) c'ac'al lajeltsae yu'un pucuj ti Jesuse. Tal ánjeletic ti laj yac' sbaic ta tunel ta stojole.
Ti Jesuse laj sliques yabtel ta Galilea banomil
(Mt 4.12-17; Lc 4.14-15)
14C'alal tiq'uil xa ta chuquel ti Juane, bat ta Galilea banomil ti Jesús ta yalel ti lequil ach' c'op yu'un ti Diose.
15—Sta xa yorail ta xventainvan ti Diose. Sutanic talel ta stojol ti Diose.#Mt 3.2. Tac'aluc c'otuc ta avo'ntonic ti lequil ach' c'op yu'une —xi ti Jesuse.
Ti Jesuse ta xic' batel chanvo' jmas-choyetic
(Mt 4.18-22; Lc 5.1-11)
16Ti jech ta xanav batel ta sti'il nab Galilea ti Jesuse, ja' o laj sta ta ilel ti Simone xchi'uc ti Andres ti ja' yits'ine. Ja' yabtelic ti mas choy ti yacal ta sjipic ochel ta vo' ti smasobil xchoyique. 17Xi albatic yu'un ti Jesuse:
—Ts'acliicun batel, ta xcac'boxuc yan avabtelic ta yiq'uel talel ti jnaclejetic ta banomile.
18Laj yictaic comel ta anil ti smasobil xchoyique, batic xchi'uc ti Jesuse.
19Jelav batel jutuc ti Jesuse, ja' o laj yil ti Jacoboe xchi'uc ti Juane, xnich'nabtac ti Zebedeoe ti oyic ta barco ta sts'isic ti smasobil xchoyique. 20Ta jech yepal laj yic' talel. Ti stuquique laj yictaic comel ti stotic Zebedeo ta barco xchi'uc ti svinictaque. Batic xchi'uc ti Jesuse.
Oy jun vinic uninbil yu'un ti pucuje
(Lc 4.31-37)
21C'otic ta jteclum Capernaum. C'alal ja' o sc'ac'alil ti cuxob o'ntonale, ti Jesuse och batel ta ch'ul na, lic chanubtasvanuc ti bu taje. 22Ti jnaclejetic ta banomile elom ta xa'iic c'u s'elan ta xchanubtasvan. Ta xac' ta ilel ti yich'oj tsots yabtele, ti mu xco'olaj ta xchanubtasvan jech c'u cha'al ti jchanubtasvanejetic yu'un ti oy c'usi tsots albil sc'oplale.#Mt 7.28-29. 23Ta ch'ul na ti oy ta jteclume, oy jun vinic uninbil yu'un pucuj ti mu stac' q'uelel ta j'ech'el ti c'usi ta spase, xi lic tsots avanuque:
24—¿C'u cha'al ta xatic' aba ta jtojolcutic, Jesús liquemot tal ta Nazarete? ¿Mi yu'un tal xa avac'bun jvocolcutic? Yu'un xacojtiquinot. Jna'oj lec t'ujbilot yu'un ti Diose.
25Xi laj stsac ta c'op pucuj ti Jesuse:
—Ch'an chan. Ictao comel ti vinic li'e.
26Ti pucuj ti mu stac' q'uelel ta j'ech'el ti c'usi ta spase, laj sjip ta lum ti vinique jech c'u cha'al junuc jtub-ic'. Tsots x'avet xa loc' batel ti pucuj ta stojole. 27Scotol xi'ic, ti xi lic sjac'be sbaique:
—¿C'usi xal o le'e? Sba to jech laj quiltic. Yich'oj tsots yabtel ti vinic le'e. Xu' yu'un ta spas ta mantal ti pucuj ti mu stac' q'uelel ta j'ech'el ti c'usi ta spase, xchi'uc ta xch'unbat ti sc'ope.
28Ta ora no'ox vinaj sc'oplal ti Jesús ta sjunul Galilea banomile.
Ti Jesuse ta scolesbe sme'ni' ti Pedroe
(Mt 8.14-15; Lc 4.38-39)
29C'alal loq'uic batel ta ch'ul nae, ti Jesuse bat xchi'uc ti Juane xchi'uc ti Jacoboe ta snaic ti Simone xchi'uc ti Andrese. 30Sme'ni' ti Simone puch'ul ta tem ta xa'i c'oc'. Laj yalbeic ya'i ti Jesuse. 31Nopaj batel ta stojol ti jchamel ti puch'ule. Laj snitbe liquel sc'ob yo' ta xva'i liquel. Ta jech yepal yam ti sc'ac'ale. Lic tunuc ta stojolic.
Yepal jchameletic ta scolesan ti Jesuse
(Mt 8.16-17; Lc 4.40-41)
32C'alal ta xa xch'ay ti c'ac'ale, laj yiq'uic talel ta stojol Jesús scotol ti jchameletique xchi'uc ti buch'utic uninbil yu'un ti pucuje. 33Scotol ti jnaclejetic ta banomile laj stsob sbaic ta ti' na. 34Ti C'usiuc no'ox chamel ta xa'iic ti jnaclejetic ta banomile, laj scolesan ti Jesuse, xchi'uc laj stac loq'uel ti pucujetique. Mu'yuc xac' c'opojuc jbeluc ti pucujetique yu'un sna'ic Buch'u ti stuque.
Ti Jesuse ta xal lequil ach' c'op ta Galilea
(Lc 4.42-44)
35Yamal to osil, loc' batel ti Jesús ta sti'il jteclum ti bu sts'ijlajan ti banomile yo' ta xc'opoj xti'in. 36Ti Simone xchi'uc ti xchi'iltaque bat sa'ic ti Jesuse. 37C'alal laj staique, xi laj yalbeique:
—Scotolic ta xa sa'oxuc.
38Xi laj stac' ti Jesuse:
—Batic ta jujun jteclum ti li' no'ox nopole, ta yalel ti lequil ach' c'op ti bu taje, yu'un ja' cabtel tal jpas.
39Va'i un, ti Jesuse lic xanavuc ta sjunul banomil Galilea, ta yalolanel ti lequil ach' c'op ta jujun ch'ul nae, xchi'uc ta stacanel loq'uel ti pucujetique.#Mt 4.23; 9.35.
Ti Jesuse laj scoles jun jc'a'emal-chamel
(Mt 8.1-4; Lc 5.12-16)
40Nopaj bal ta stojol Jesús jun vinic tsacbil ta c'a'emal chamel, laj squejan sba ta stojol ti xi laj yale:
—Ti ac'anuc lae, xu' avu'un xames xatus ti jchamele.
41Ti Jesuse c'uxubaj yo'nton yu'un. Laj scajan sc'ob ta sba ti jchamele, ti xi laj yalbee:
—Jechuc. ¡Mesbil, tusbil ta xacom!
42Ta jech yepal mu'yuc xvinaj bu bat ti c'a'emal chamele, mesbil tusbil c'ot. 43Ti Jesuse xi tsots laj sc'ubanbee:
—Lec oy, batan. 44A'yio ava'i, mi jun buch'u xavalbe ya'ie. Ja' no'ox, batan ta stojol ti pale ta yaq'uel aba iluc. Ich'o batel ti matanal sventa amesel atusel jech c'u cha'al laj yal comel ti Moisese#Lv 14.1-32. yo' ta sna'ic scotol ti mesbil tusbil ti achamele.
45Bat ti vinique, lic yalolan ta stojol scotol ti c'u s'elan c'ot ta pasele. Jech o xal ti Jesuse mu xu' x'och batel ta jujun jteclum ta sba ta sat ti jnaclejetic ta banomile. Ta spat jteclum xa no'ox ta xcom ti bu mu jchopuc ti jnaclejetique. Buyuc no'ox licuc tal ta xtalic ta stojol.
Currently Selected:
San Marcos 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000