Lamentaciones 2
2
Xchibal muc'ul ic'al me'inal
1Mu albajuc sc'ac'al yo'nton Dios vul ta loq'uel, ti ic'uneb c'ot yu'un ti c'upil sba Sione.
Ti c'upil sba yutsil Israel jech c'u cha'al ti vinajele, c'alal to lum busul yu'un.
Ti mu ts'icbaj ti sc'ac'al yo'ntone. mu'yuc xa ta alel yu'un mi stec'leb yoc.#Ti stecleb yoq'ue, ja' sc'oplal ti ch'ulna ta Jerusalene.
2Ti Diose, mi junuc va'al laj yicta comel ti naetic yu'un ti Jacobe.
Ta jliquel no'ox lilijem com yu'un ta sc'ac'al yo'nton ti c'upil sba nac'obbailetic yu'un ti Judae.
J'ech'el bat ta yoc ti ajvalile, ti jpas-mantaletic yu'une, q'uexlalic c'ot yu'un.
3Ti lic tiluc ti sc'ac'al yo'ntone, ta jmoj no'ox toj tuch'el c'ot yip ti Israele.
Laj xch'ac loq'uel ta jtojoltic ti smuc'ul stsatsal ti lic jtsac jbatic ta leto xchi'uc ti jcontratique.
Til xa c'oc' yu'un ta xchiq'uel scotol ti c'usitic x'ayan yu'un ti Jacobe.
4Co'ol s'elan jcontrainvanej yilel ti Dios une, ta yipal lec yoc sc'ob laj xach' ti syolobe.
Ja' xchi'il jun jti'o'nton, laj slilin ti c'usi lec ta xile.
Co'ol s'elan tilemal c'oc' xloclij vulel ti sc'ac'al yo'nton ta stojol ti axibal na yu'un ti c'upil sba Sione.
5Co'ol s'elan jcontrainvanej ti xi s'elan laj spas ti Diose: j'ech'el laj stubbe sc'oplal ti Israele.
Laj sjines scotol ti muc'tic naetic ti c'otem ta pasob mantale; laj slilin ti nac'obbailetic yu'une.
Xlic xcaj no'ox ti vocol laj stailan yu'un ti c'upil sba jteclum Judae.
6Co'ol s'elan junuc j'elec' ti laj spas ti c'usi xal yo'nton yu'un ti xch'ulnae; laj slilin ti bu ti tsobajele.
C'ot ta pasel yu'un ti Diose, tub ta o'ntonal ta Sión ti q'uinetique, ti sc'ac'alil cuxob o'ntonale.#Is 1.13.
Ti mu stac' ts'iquel ta xa'i ti sc'ac'al yo'ntone, laj sten loq'uel ti ajvalile xchi'uc ti paleetique.
7Ti Diose laj sten ta yo'nton ti altar yu'une; bajbil tenbil c'ot yu'un ti xch'ulnae.#Ez 24.21.
Och ta yoc ta sc'ob jcontrainvanejetic yu'un smocal smacoj ti jteclume.
Oy avanel ta xch'ulna ti Diose, co'ol xa s'elan q'uin ya'yel.
8C'ot ta nopel yu'un Dios ta sjinesbel smocaltac ti c'upil sba lum Sione.
Mu'yuc laj sjaliltas c'ot ta pasel yu'un ti bu c'alal nopbil ta sliline.
Ti pac'baletique xchi'uc ti moquetique, jun me'inal c'ot ta stojolic, yu'un ta jliquel no'ox jinem com.
9Ti jteclume xi s'elan oye, ch'abal xa ti sti'taque ti xoj yoctaque, stuc xa sjepelultac busul ta lum.
Ti ajvalile xchi'uc ti its'inal ajvalil yu'une, ochic xa ta c'abal yu'un ti buch'u yan yajvalique.
¡Tub sc'oplal ma' ti oy c'usi jbel albil yu'un ti Diose, mi ja'uc ti j'alc'opetic yu'une ti oy c'usi ta x'ac'bat yilic ti liquem talel ta stojol ti Diose!#Sal 74.3-9; Ez 7.26.
10Ti moletic yu'un ti c'upil sba Sione, naca sta ta xchotan sbaic ta lumtic.
Ta svijbe xa sbaic tanil c'oc', lajemal c'u'il xa slapojic.
Ti tsebal antsetic yu'un ti Jerusalene, nijil comic ta lum ta j'ech'el.
11Mu xa cha'bel xquil osil yu'un ti oq'uele, mu xa tsacaluc ta xca'i ti co'ntone.
Mu'yuc xa jchi'uc jch'ulel c'alal ta xquil lilijem steclumal ti jvinquileltaque,
ti buyuc xa no'ox ta xquil chamemic ta bebetic ta scoj vi'nal ti jchu'nel ololetique.
12Xi ta xalbe sme'ic ti ololetique:
“Ch'abal xa jve'eltic xchi'uc ti c'usi ta xcuch'tique.”
Chamem xa ta xyalic ta lum ta bebetic yu'un ti jteclume.
Sjic' ch'a yo'nton ta xloc' ti xch'ulel jopbil yu'un ti sme'ique.
13¿C'usi stac' ta jco'oltaselot achi'uc jteclum Jerusalén ti toj c'upil abae?
C'upil aba jteclum Sión ti spajeb avutsilale, ¿c'usi stac' ta xcalbot ava'i yo' ta jpat avo'nton?
Co'ol s'elan smuc'ul nab sjamlej laj ata ti avocole.
¿Buch'u xu' ta xpoxtaot?
14Ti c'usitic laj yilic ta scaj'alel ti j'alc'opetic avu'une, yijil lo'lael ta j'ech'el.
Mu jamaluc laj yalic ti amule, ch'ay to ta be jechuc unbi ti c'usi q'uelel ta atojole.
Naca lo'lael ti c'u s'elan yalic ti ac'bat yilic yalojique, tac'al c'ot avu'un un.#Jer 5.31; 23.25-27; Ez 13.10.
15C'alal ta xilot ti buch'utic ta x'ech'ic ta bee, smaj xa sc'obic xlabajic xa, xpiobajic xa, sjim xa sjolic ta labanvanej,
ti xi ta xalic ta stojol ti c'upil sba Jerusalene:
“¿Mi ja' la ti jteclum le'e, ti albil sc'oplal spajeb xa no'ox sc'upilal ta banomile?”
16Scotol ti avajcontrataque xbet'bun no'ox yeic ta atojol.
Smats' xa yeic, xpiobajic xa, sibtasvanic xa ti xi ta xalique:
“J'ech'el cuch xa cu'untic ta slilinel un.
Ti vo'ne xijmacmun xchi'uque, sta xa sc'ac'alil, laj to quiltic ta jsatic un.”
17Ti Diose, c'ot ta pasel yu'un ti c'u s'elan xchapanoje, mu'yuc stselbuj ti sc'ope.
Mu xa xna'etuc laj slilin ti vo'ne xa yaloj ta sliline.#1 R 9.6-9.
Laj yac' ye sti' tse'inuc ti avajcontrae, ti cajal c'ot sc'oplal yu'un ti jti'o'nton ta atojole.
18C'ano apojel ta stojol ti Dios une, jteclum Sión ti c'upil abae.
C'ac'al ac'ubaluc malmunuc ti ya'lel asate.
Chelchunuc o ya'lel asat yu'un ti oq'uele, mu xavicta aba.
19Oc'an avanan no'ox ava'i ta ac'ubaltique, toyo ti asate, avetan no'ox ava'i, busano ta stojol Dios ti yatel avo'ntone.
Malmunuc ti ya'lel asat jech c'u cha'al junuc vo', nubo avoc ac'ob ava'i, vocoletan ta stojol.
C'ano spojel ti ololetic buyuc no'ox quicajtic ta xlajic ta jujun chiquin naetic ta scoj ti ch'abal c'usi ta stun slajesique.
20Cajval, vulesbun ta ajol un, mu'yuc buch'u junuc jech apasojbe jech c'u cha'al avi tana li'e.
¿Mi xc'ot o un ta sti' jch'unel ololetic yu'un ti me'iletique?#Dt 28.53; 2 R 6.28-29; Jer 19.9.
¿Mi xc'ot o un ta xich'ic milel ta ach'ulna ti paleetique xchi'uc ti j'alc'opetique?
21Xvinaj ti buyuc no'ox telel ta bebetic ti jva'lej viniquetique, ti moletique.
Ti jquerem jtsebtac une lajic ta milel ta espada.
Yorail lic ti c'ac'al sc'ac'al avo'ntone, jloq'uel abtel laj ayayijes, mu xa na'etuc laj amil.
22Xi'bal sba buyuc xa no'ox laj avac' taluc ta jujujot,#Sal 31.13; Jer 20.3,10; 46.5; 49.29. co'ol s'elan q'uin laj ya'i ti xc'ulet no'ox talele.
Ti sc'ac'alil ta xlic sti'emal ajole, Dios, mi junuc ta xcol.
Ti buch'u laj jts'itese, ti laj jchanubtase, lajic ta milel yu'un ti jcontrainvaneje.
Currently Selected:
Lamentaciones 2: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000