Jonás 1
1
Ti Jonase ta xjatav ta stojol ti Diose
1Ti Jonás#2 R 14.25. xnich'on ti Amitaie, xi albat c'alal c'oponat yu'un ti Diose: 2“Lican, va'lan, batan ta muc' ta jteclum Nínive. Caj'albo ya'i ti ta jtubbe sc'oplale, yu'un sc'oplal ti xchopolalique, vul xa ta jtojol.”#Nah 1.1; 3.1-19.
3Le' une, ma'uc laj xch'un ti Jonase. C'ajomal no'ox lic jatavuc ech'el ta stojol ti Diose. Bat ta ti' nab Jope ti bu xloc' x'och ti barcoe. Laj sta jcot barco ti ta xa xloc' batel yo' ta xbat ta jteclum Tarsise. Lic stoj sbe, ta xbat ti bu c'alal taje.#Sal 139.7,9-10. 4C'u stu un, ti Diose laj yac' taluc tsots ic' ti xjumet no'ox liquel xchi'uc ya'lel ta o'lol ti nabe, ti tsots ta j'ech'el ti co'ol xa s'elan yilel ta xlic lilijuc ti barcoe. 5Jech ti j'abteletic yu'un ti barcoe, bats'i batem xa xch'ulelic ta xi'el. Ta jujun tal xc'opoj xti'inic xa liquel ta stojol ti sdiosique. C'ot ta pasel xtoc ti laj sjipic yalel ta nab yicats ti barcoe yo' jech ta xiquitub. Ja'uc ti Jonase och yalel ti bu oy latsal icatsil yu'un ti barcoe. Bat xch'ulel ta vayel ti bu taje.
6Va'i un, ti banquilal j'abtel yu'un ti barcoe, bat bu oy ti Jonase, ti xi laj yalbee: “¿C'usi ta xapas ti jun avo'nton batem ach'ulel ta vayel li'e? Lican, c'opojan, ti'inan ta stojol ti adiose. Xu' nan ta xlic svul yo'nton ta jtojoltic ti ta xlic stic' sba ta jpojeltique.”
7Ja'uc ti j'abteletic yu'un ti barcoe xi ta xalilanbe sbaic ta jujun tale: “La' jt'untic ta orail buch'u ta scoj ti vi yelan chopol vul ta jtojoltique. Ja' yu'un un, lic sq'uelic ti oraile. Vinaj ti ja' ta scoj ti Jonase. 8Va'i un, xi lic yalbeique: “Albun ca'icutic c'usi smelol ti jech tal ti c'usi chopol ta jtojoltique. ¿C'u cha'al ti li' oyote? ¿Bu liquemot talel? ¿Bu jteclumal talemot? ¿C'usi sbi ti ats'unubale?”
9Xi tac'batic yu'un ti Jonase: “Hebreoun, ja' jnijanoj jchimanoj jba ta stojol ti Ajvalile, ja' ti Dios ti oy ta vinajele, ti smeltsanoj ti nabe xchi'uc ti banomile.”
10-11Ti j'abteletic yu'un ti barcoe, bat xch'ulelic ta xi'el ta j'ech'el, ti xi laj yalbeique: “¿C'u cha'al jech laj apas un?”
Yu'un laj xa sna'ic ti ta xjatav ta stojol ti Diose, ja' ti laj xa yal ta jamal ti stuque. Va'i xtoc un, xi laj yalbeique: “¿C'usi xu' ta jpascutic ta atojol yo' jech ta sts'ijtsaj ti nabe?” Yu'un ti nabe yantic xa stsac yip ta yuq'uilajel.
12Xi laj stac' ti Jonase: “Ti xcaltique, jipicun ochel ta nab, ja' to jech ta sts'iji ti nabe. Jna' lec ti vu'un ta jcoj ti tal ti tsots ic' xchi'uc ti ya'lel vul ta atojolique.”
13Jech ti j'abteletic yu'un ti barcoe, laj yac'beic yipal ta sla'olanel ti smajobil vo' yu'un ti barcoe, yo' jech ta xc'otic ta sti'il nab. C'u stu un, mu'yuc xu' yu'unic. Yu'un xyuq'uet no'ox liquel ti xva'i xcoti xa ti nabe. 14Va'i un, xi c'opoj ti'inic liquel ta stojol ti Diose: “Dios, mu teyuc no'ox aq'ueloj ta xichamcutic ta scoj ti vinic li'e. Yan ti mi mu'yuc ti smule, mu xacajan ta jbacutic ti jech ta xchame. Ti vo'ote, Dios, ja' ta xapas ti c'usi lec ta xava'ie.”
15C'alal laj yo'ntonic ta c'opojel ti'inel ti va'i s'elan taje, laj sjipic ochel ta nab ti Jonase. Jech ti nabe lic ts'ijtsajuc. 16C'alal jech laj yilic ti j'abteletic yu'un ti barcoe, lic c'otuc ta yo'ntonic ti biq'uit laj yac' sbaic ta stojol ti Diose. Lic yac'beic milbil matanal, xchi'uc xtoc oy c'usi laj yac' yeic ta stojol ti oy c'usi ta spasique.
17Ac'o mi jech ti va'i s'elan taj une, jech ti Diose chapal xa yu'un jcot muc' ta choy yo' jech ta xbiq'ue ochel ti Jonase. Jech ti Jonase, oxib c'ac'al, oxib ac'ubal, oy ta yut xch'ut ti choye.#Mt 12.40.
Currently Selected:
Jonás 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000