Jueces 1
1
Ti Judae xchi'uc ti Simeone och ta yoc ta sc'obic ti Adonisedeque
1Ts'acal to un, c'alal chamem xa ox ti Josuee, ti israeletique laj sjac'beic ti Diose yo' jech ta sna'ic bu jvoc'ucal nitilulil ti ba'yel ta sliques ta stsaquel ta leto ti cananeoetique. 2Tac'batic talel yu'un ti Diose, ti ja' ba'yel ta sliques tsacvanej ta leto ti Judae, yu'un oy xa sc'oplal ti ac'bil xa ta yoc ta sc'ob ti banomile. 3Va'i un, snitilultac ti Judae laj stac ta iq'uel ti svinquilelic ti ja' snitilultac ti Simeone yo' jech jmoj ta svol sbaic ta yu'ninel ti banomil ti bu ta xc'ot ta yu'un ti Judae. Ts'acal to xtoc un, jmoj ta svol sbaic batel ta yu'ninel ti banomil ti bu xc'ot ta yu'un ti Simeone. Ti snitilultac ti Simeone lec laj ya'iic ti ta svol sbaic ta jmoj xchi'uc snitilultac ti Judae. 4Va'i un, ti Judae laj yu'ninic ti osile, ti ac'bat ta yoc ta sc'ob yu'un Dios ti cananeoetique, xchi'uc ti ferezeoetique. Tsalbilic c'ot yu'unic tey ta Besec lajunmil (10,000) ta vo' viniquetic. 5Yu'un ti ta Beseque, laj staic ti Adonisedec ti letovajic xchi'uquique. 6Ac'o mi jatav ti Adonisedeque, snutsojic batel ja' to ti c'uxi laj sloc'obinique. Laj setbeic ti sme' sc'obe, xchi'uc ti sme' yacane. 7Va'i un, xi laj yale: “Ti vi s'elan li'e, jech to ox laj jpas ti laj jsetbe loq'uel sme' sc'ob, sme' yacan lajuneb xchanvinic (70) ta vo' ajvaliletic, ti xicujet no'ox ta stsobel ta yolon jmexa ti xi bitsajtic ta xc'ote. Avi tana li' une, ja' no'ox jech ta xispasbe ti Dios jech c'u cha'al laj jpasbe ti yane.” Va'i un, laj yiq'uic batel ta Jerusalén ti bu c'ot ta chamele.
Ti Judae laj yu'nin ti Hebrone xchi'uc ti Jerusalene.
8Snitilultac ti Judae lic tsacvanicuc ta leto. Laj yu'ninic ti Jerusalene. C'alal laj smilic ta espada scotol ti jnaclejetique, lic stic'beic sc'ac'al ti jteclume. 9Bat no'ox stsaquic ta leto xtoc ti cananeoetic ti nacalic ta vitstic ti oy ta yosilal Négueve xchi'uc ti oy ta stenlejale.#Jos 10.40; 11.21. 10Bat stsaquic ta leto xtoc ti cananeoetic ti oyic ta jteclum Hebrone,#Jos 10.36-37. ti ja' Quiriat-arba sbi to ox ta ba'yele. Tey laj stsalic ti Sesaie, ti Ahimane, xchi'uc ti Talmaie.
Ti Otoniele laj yu'nin ti Debire xchi'uc ta xic' ti Acsae
(Jos 15.15-19)
11Laj taj une, bat stsaquic ta leto ti jteclum Debire,#Jos 10.38; 11.21. ti ja' Quiriat-sefer sbi ta ba'yele. 12Yu'un ti Calebe laj ono'ox yal sc'op ti buch'u ta stsal yu'un ti yajval jteclum Debir xchi'uc ti ta xu'nine, ta xac'be yajnilin ti yantsil nich'on ti Acsa sbie. 13Ti buch'u cuch yu'un ta yu'ninel ti jteclume, ja' ti Otoniel xnich'on ti Quenaze, yu'un ti Cenaze xc'ox its'in ti Calebe. Va'i un, ti Acsae, stseb ti Calebe, laj yic' ti Otoniele. 14C'alal laj xa yic' ti tsebe, ti Otoniele laj yalbe ti Acsae ti ac'o sc'anbe jsepuc banomil ti stote. C'alal laj yil ti Caleb ti yal ta sburro ti Acsae, xi laj sjaq'ue:
—¿C'usi yatel avo'nton xcal le' une?
15—C'uxubajuc to avo'nton cu'un —xi laj stac' ti tsebe—. Ti laj xa avac'bun ti banomil ta Négueve, ac'bun to xtoc ti yosilal sat vo'etique.
Ti Calebe laj yac'be stseb ti sat vo'etic ti oy ta ac'ole, xchi'uc ti oy ta olone.
Ti c'u s'elan tsalvanic snitilultac ti Judae xchi'uc ti Benjamine
16Snitilultac Hobab ti quenita vinique, smuni' xtoc ti Moisese, jmoj loq'uic batel xchi'uc snitilultac ti Judá ta jteclum yu'un ti xantique. Batic ta sbajtical banomil yu'un Judá ti oy ta stuq'uil yolon ti yac'ol xocon sloq'ueb c'ac'al yu'un ti Arade, ti bu jmoj comic ta naclej xchi'uc ti yajval lume. 17Va'i un, snitilultac ti Judae bat svol sc'opic xchi'uc snitilultac ti Simeone jech c'u cha'al xchapojic ono'oxe. Lic stsaquic ta leto ti cananeoetic ti nacalic ta Sefate. J'ech'el laj slilinic ti jteclume. Jech o xal laj yac'beic sbiin Hormá ti jteclume. 18Ja'uc le' une, mu'yuc xu' yu'unic ta yu'ninel ti jteclum Gazae, ti Ascalone, xchi'uc ti Ecrone, mi ja'uc ti c'u yepal joyol ta spat ta xocontaque.#Jue 3.3. 19Ti snitilultac ti Judae, ac'o mi sva'anoj sba ti Dios ta stojolic une, ti cuch yu'unic ta yu'ninel ti muc'tiquil vitstique, ja' xa mu'yuc xu' yu'unic ta stenel loq'uel ti buch'utic nacalic ta stenleje, yu'un naca taq'uin meltsanbil ti scarretaique. 20Ti Calebe laj yich' ti Hebrone jech c'u cha'al yaloj ono'ox ti Moisese. Ti Calebe laj sten loq'uel ti oxib xnich'nab Anaque.#Jos 15.13-14; Jue 1.10. 21Ja'uc snitilultac ti Benjamine, mu'yuc xu' yu'unic ta stenel loq'uel ti jebuseoetic ti nacalic ta Jerusalene. Jech o xal avi tana le' une, snitilultac ti Benjamine staoj yav jmoj nacalic xchi'uc ti jebuseoetic ta Jerusalene.#Jos 15.63; 2 S 5.6; 1 Cr 11.4.
Snitilultac ti Josee ta xu'ninic ti Betele
22Snitilultac ti Josee c'ot ta nopel yu'unic ta stsaquic ta leto ti Betele, ti ja' jteclum Luz sbi ta ba'yel to oxe. 23Va'i un, laj staquic batel jpa'ivanejetic ti bu taje. Yu'un coltabilic yu'un ti Dios une, 24ti jpa'ivanejetic une laj yilic ti loc' talel jun vinic ta jteclume, ti xi laj yalbeique: “Mi ta xavac' jna'cutic c'u s'elan ti ochebal ta jteclume, ch'an xacutcutic, oy slequil co'ntoncutic ta atojol.” 25Ti vinique laj yac' iluc c'u s'elan ti ochebal yu'un ti jteclume. Laj smilic ta espada scotol ti jnaclejetic teye. Ja'uc ti buch'u laj yac' iluc ti bee, mu'yuc smilic, cuxul com xchi'uc ti yalab xnich'nabe. 26Ti vinic taje bat nacluc ta yosil ti hititaetique. Lic sliques ta sva'anel jun jteclum, ti laj yac'be sbi Luze, ti sbiinoj to avi tana le' une.
Ti bu c'alal cuch yu'un ta yu'ninel banomil snitilultac ti Manasese xchi'uc ti Efraine
27Ja'uc snitilultac ti Manasese, mu'yuc xu' yu'unic stenel loq'uel ti cananeoetic ti nacalic ta jteclum Bet-seane, ti Taanaque, ti Dore, ti Ibleame, ti Meguidoe, xchi'uc ti bic'tal lumetic ti joyol ta spat ta xocon ti lume. Jech o xal ti cananeoetique comic ta naclej xchi'uc ti israeletic ti bu taje. 28C'alal laj stsac lec yip ti israeletique, tsots lic yac' abtejicuc ti cananeoetique. Ja' no'ox un, mu'yuc xu' yu'unic ta stenel loq'uel.#Jos 17.11-13.
29Snitilultac ti Efraine mi ja'uc cuch yu'un ta stenel loq'uel ti cananeoetic ti nacalic ta Gezere. C'ajomal no'ox lic xchi'inic ta naclej ti cananeoetique.#Jos 16.10.
Ti bu c'alal cuch yu'unic ti yan jujuvoc' nitiluletique
30Snitilultac ti Zabulone mu'yuc xcuch yu'unic ta stenel loq'uel ti cananeoetic ti nacalic ta Quitrone xchi'uc ti ta Naabale. C'ajomal no'ox lic xchi'inic ta naclej ti cananeoetique, ac'o mi tsots laj yaq'uic abtejicuc. 31Ja' jech xtoc snitilultac ti Asere mu'yuc xcuch yu'unic ta stenel loq'uel ti buch'utic nacalic ta jteclum Acoe, ti ta Sidone, ti ta Ahlabe, ti ta Aczibe, ti ta Helbae, ti ta Afeque, xchi'uc ti ta Rehobe. 32Ma'uc no'ox taje, yu'un jmoj naquiic snitilultac ti Asere xchi'uc ti cananeoetic ti nacalic ta banomil taje, yu'un mi ja'uc c'ot ta pasel yu'unic ti laj sten loq'uele.
33Snitilultac ti Neftalie mu'yuc xcuch yu'unic stenel loq'uel ti cananeoetic ti nacalic ta jteclum Bet-semese xchi'uc ti ta Bet-anate. C'ajomal no'ox tsots lic yaq'uic abtejicuc, ti lic xchi'inic ta nacleje
34Ja'uc ti amorreoetique cuch yu'unic ti mu'yuc jutebuc laj yac' nacliicuc ta stenlejal snitilultac ti Dane. 35Ja' yu'un un, ti amorreoetique staoj yav naquiic o ti ta jteclum Herese, ti ta Ajalone, xchi'uc ti ta Saalbime. C'alal laj xa yich' lec yipic snitilultac ti Josee, tsots lic yaq'uic abtejicuc ti amorreoetique.
36Ti sts'aquic ti edomitaetique ta xlic batel ta ch'ut vits yu'un ti Acrabime, ti xc'ot ta loq'uel ta Selae, ti ta stam batel ta muyeltique.
Currently Selected:
Jueces 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000