2 Tesalonicenses 3
3
C'oponic Dios ta jtojolcutic
1Ti slajeb ta xcalboxuc ava'iic, Jchi'iltac, c'oponic Dios ta jtojolcutic yo' ta xpuc no'ox batel cu'uncutic ta sjoylej banomil ti lequil ach' c'ope, xchi'uc yo' jech ich'bil ta muc' ta xc'ot jech c'u cha'al c'ot ta atojolique. 2C'oponic Dios xtoc yo' jech mu xismaccutic ta be ti jchopol o'ntonetique, yu'un mu scotolic c'otem ta yo'ntonic ta xch'unel ti Cajvaltique. 3Ti jech oy yutsil slequil yo'nton ti Cajvaltique, ta xac'boxuc yip avo'ntonic, ta xchabioxuc yo' mu xastsaloxuc ti pucuje. 4Yu'un jpatoj co'ntoncutic ta stojol ti Cajvaltique ti staoj ono'ox yav ta xapasic batel ti c'u s'elan calojboxuque. 5Ac'o xa scoltaoxuc ti Cajvaltique yo' jech ta xac'uxubinvanic jech c'u cha'al ta xc'uxubinvan ti Diose, yo' jech ta xavich'beic smuc'ul stsatsal yo'nton ti Cristoe.
Tsots sc'oplal ti abtele
6Ti jech jchi'il jbatique, ta jpasoxuc ta mantal ta sventa ti Cajvaltic Jesucristoe, mu xats'acliic ti jch'unolajeletic ti buch'utic mu sc'an x'abtejique, ti mu xco'olaj jech ta spasic jech c'u cha'al laj jchanubtasoxuque. 7Yu'un xana'ic xa ti xi s'elan laj cac' avilic ti cuxlejale: Yu'un ti vu'uncutique li'abtejcutic ti c'alal oyuncutic to ox ta atojolique. 8Mi junuc oy buch'u laj jc'anbe jve'elcutic ta matanal no'ox, yu'un laj jtojcutic. Yu'un c'ac'al ac'ubal cac'ojbecutic yipal abtel yo' jech mu xcac'boxuc avocolic ta smalq'uineluncutic.#Hch 18.3; 1 Ts 2.9. 9Ac'o mi tsots sc'oplal ja' avabtelic ta smalq'uineluncutic yo' ta xacoltauncutic, ja'uc le'e, li'abtejcutic yo' jech ta xachanic ec. 10C'alal oyuncutic to ox ta atojolique, xi s'elan laj calcutic ava'iic ti mantale: “Ti buch'u mu sc'an x'abteje, c'u ono'ox xi ta xve'.” 11Yu'un oy bu laj ca'icutic sc'oplal ti oy jlom avu'unic ti ja' xa no'ox ti bu xva'vunet ta x'ech' yu'un ti c'ac'ale, mu'yuc ta x'abtej, ti sujoj sba yilel ti oy c'usi ta spas c'alal jeche' no'ox x'ech' yu'un ti c'ac'ale. 12Ti buch'utic jech ta spasique, ta jc'ubanbecutic, ta xcalbecutic mantal ta sventa ti Cajvaltic Jesucristoe, ac'o spas tsatsal ta abtel yo' ta sta sve'el ti jech cuxule.
13Mu xalubtsajic ta spasel ti c'usi leque, Jchi'iltac.#Gá 6.9. 14Mi oy buch'u mu xac' ta venta ti va'i s'elan laj cal ta jvune, q'uelic lec ti buch'u jech ta spase. Mu xatsacbeic ta muc' ti sc'ope yo' jech ac'o q'uexavuc. 15Ja'uc le' une, mu xacontrainic, bijubtasic, yu'un co'ol achi'il abaic.
Sc'oplal ti slajeb chabanuque
16Ti Cajvaltic ti oy slamajemal yo'ntone, ac'o yac'boxuc ta atojolic ti slamajemal yo'ntone yo' jech ta xcuch avu'unic ti c'usiuc no'ox ta xc'ot ta atojolique. Ac'o xa xchi'inoxuc comel ti Cajvaltic acotolique.
17Vu'un Pablo, laj jts'iba talel ta jc'ob ta jpirma jtuc ti chabanel li'e. Ja' jech s'elan ta xcac'be jpirma ta scotol ti jvuntaque. 18Acotolicuc, ac'o sva'an sba ta atojolic ti Cajvaltic Jesucristoe. Jechuc
Currently Selected:
2 Tesalonicenses 3: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000