1 Samuel 1
1
Ti Anae ta x'ac'bat jun squerem yu'un ti Diose
1Ta vitstic ta yosilal ti Efraín ti sbiinoj Ramae, nacal jun vinic ti ja' yuts' yalal ti Sufe, ti sbiinoj Elcanae. Taje, ja' xnich'on ti Jerohame, smom xtoc ti Elihue. Ti smuc'-ta-muc'tote, ja' ti Tohue, xnich'on ti Sufe, ti liquemic talel ta stojol snitilultac ti Efraine. 2Cha'vo' yajnil ti Elcanae. Ana sbi ti june, Penina sbi ti xchibale. Ti Peninae oy yalabtac. Ja'uc ti Anae, mi junuc. 3Scotol jabil, ta xloc' batel ti Elcaná ta slumale, ta snijanel xchimanel sba ta yich'el ta muc', ti ta yac'bel milbil matanal ti Dios ti scotol xu' yu'un ti oy ta Siloe. Ti bu taje, ochemic ta yajpaletac Dios ti cha'vo' xnich'nab ti pale Elie, ti sbiinoj Ofni ti june, ti sbiinoj Finees ti xchibale.
4C'alal ta xlic yac' milbil matanal ti Elcanae, ta xac'be yich' spuculal ti Peninae, scotol ti squeremetique, ti stsebetic ti yajnile. 5Ja'uc ti Anae, lec t'ujbil ta xac'be yich' ti spuculale, yu'un xc'uxubinoj ta j'ech'el ac'o mi macbil yalajeb yu'un ti Diose. 6Ti Anae, c'a'epal satinbil x'ile, ilbaj x'utat, chbaba c'optaat, q'uexlaltasbil yu'un ti Peninae ta scoj ti pasbil ta machero yu'un ti Diose.
7Ti jujun jabil ti ta xbatic ta xch'ulna Diose, ja' jech s'elan ta x'utilanvan ti Penina ti va'i s'elan taje. Jech o xal ti Anae x'oc'olet, mu'yuc ti ve'el yu'une. 8Va'i un, xi albat yu'un ti Elcaná ti smalale: “¿C'u cha'al ta xa'oc', Ana, ti mu'yuc ve'el avu'un ta at-o'ntone? ¿Mi mu x'ech'uc to jc'oplal ta xava'i ta avo'nton, mi mu ja'uc mu sta sc'oplal ta xava'i ta avo'nton ti oyuc lajunvo' avalabe?”
9Oy jun velta ti c'alal oyic ta Siloe, ti laj yo'ntonic ta ve'ele, va'i batel ti Anae. Ja'uc ti pale Elie chotol ta muc' ta chotlebal ta nopol ochebal sti' xch'ulna ti Diose. 10Ti Anae mu x'ech' ta xa'i. Xtuch'et xa yo'nton oc' lic c'opojuc ti'inuc ta sc'oponel ti Diose. 11Xi laj yac' ti strate ta yalbele: “Ti scotol xu' avu'une, Dios, ti tauc la xava'an aba ta yet'esbel svocol ti avajtunel li'e, ti vuluc to la ta avo'nton ta yac'belun junuc jquereme, ta xcac'bot ta avajtunel ti c'u sjalil ti xch'iel sc'opojele. Ti svinajeb ta xc'ot ta avajtunele, mu'yuc ta xich' loc'bel ti sjole.”#Nm 6.5.
12Ti jech jal ta xc'opoj xti'in ta stojol Dios ti Anae, ti Elie laj sq'uelbe ech'el ti yee. 13Ja'uc ti ants une, yo'nton no'ox sna' ta xc'opoj xti'in ta stojol ti Diose. Mu ja'uc jutebuc xvinaj ti c'usi ta xale. C'ajomal no'ox xvinaj xbac'bun ti yee. Ja'uc ti Elie laj snop ti ta xyacube. 14Xi laj yalbee:
—¿C'usi to ora ta x'ech' avo'nton ta yacubel? ¡Ictao xa ti uch'bajele!
15—Mu jechuc ti va'i s'elan ta xavalbun une, yojtot —xi laj stac' ti Anae—. Ma'uc ma' ti cuch'oj une, mi ja'uc jtosuc uch'bolal ti c'usi paseme. C'ajomal no'ox mu xnel mu x'ech' ti jvocol ta xca'ie. Ta jbusan ti yatel co'nton ta stojol ti Diose. 16Mi ja'uc xc'ot ta ajol ti ja' jun chopol antsune. C'ajomal no'ox ta xic'opoj ta xiti'in ta stojol Dios ti c'u xa sjalil li' oyune, ti xyal xmuy ti co'nton yu'un ti vul o'ntonale.
17—Tsotsan, junuc avo'nton, batan —xi tac'bat yu'un ti Elie—. C'otuc ta pasel yu'un ti Dios yu'un Israel ti c'usi laj ac'anbee.
18—Colaval ta j'ech'el —xi laj stac' ti antse.
Ts'acal to un, ti Anae sut batel ti bu lic ech'ele, c'ot ve'uc. J'ech'el nom c'ot ti vul o'ntonal yu'une. 19C'alal sacub ti osil ta yoc'omale, ti c'alal c'opoj ti'in xa comel ta stojol ti Diose, sut batel ta snaic ti oy ta Ramae. Va'i un, ti Elcanae lic xchi'in ta vayel ti Ana ti ja' yajnile. Ti Diose laj svules ta yo'nton ti xvocolet ti ants ta stojole. 20Ti Anae lic xchi'in ti yole. C'alal sta yoraile, voc' jun squerem ti laj yac'be sbiin Samuel, ja' ti laj sc'anbe ti Diose.
21Laj taj une, bat ti Elcanae xchi'uc scotol yalab xnich'nab ta Siloe yo' jech ta xc'ot ta pasel yu'un ti c'usi yaloje, ta yaq'uel ti milbil matanal ta sventa tsuts ti jabile. 22Ja'uc ti Anae mu'yuc xbat yu'un xi laj yalbe ti smalale:
—Avi tana li'e, ja' to ta xibat mi laj quictabe xchu' ti olole. Va'i unbi, ta xquic' batel yo' jech j'ech'el ta xquicta comel ta yajtunel ti Diose.
23Xi tac'bat yu'un ti Elcaná ti smalale:
—C'otuc ta pasel ti c'usi lec ta xavile. Li' to comane ja' to ti c'uxi laj avictabe xchu' ti olole. C'otuc ta pasel yu'un strate ti Dios ti c'usi yaloje.
Ja' jech com, lic sts'ites ti yole ja' to ti c'uxi laj yictabe ti xchu'e. 24C'alal laj yictabe ti xchu'e, uni biq'uit olol to yic'oj batel ta xch'ulna ti Dios ti oy ta Siloe. Ja' jech xtoc yic'oj batel oxib ch'iom tot vacax, xchi'uc yich'oj batel chib xcha'vinic ta litro trigo, xchi'uc jbej yavil vino ti meltsanbil ta nucul ti noj ta vinoe. 25Va'i un, lic yich' milel ti jcot ch'iom vacaxe. Laj yac'beic jelavel ta sc'ob Elí ti olole. 26Xi albat yu'un ti Anae:
—Ch'ayo jmul jcolo', yojtot, ti jech li' to cuxulot avi tana ta melele, vu'unun ma' ti ants li' to ox ay sta ta c'oponel ti Dios ta sts'el ti bu chotolote. 27Ti olol li'e, laj jc'anbe ti Dios ti ac'o xiyac'bune. Laj yac'bun un. 28Loc' ayan ta co'nton ti ta xcac' tunuc yu'un ti Diose, ti yajtunel ta xc'ot o ti c'u sjalil ti xch'iel sc'opojele.
Va'i un, ti Elie snupilan xa banomil laj spatan sba ta lumtic ta stojolal ti Diose.
Currently Selected:
1 Samuel 1: TZC00
Highlight
Share
Copy
Want to have your highlights saved across all your devices? Sign up or sign in
Biblia en Tzotzil de Chamula, Chiapas, México © Sociedad Bíblica de México, A.C. 2000