Josué 2
2
So Josué 'vii saua ilate' quiyim ra'ajnaxanta yi Jericó
1Quiyi Sitim, ca' so Josué ỹa'vii saua ilate' nemootaxanterec dos ỹale', ca 'naapegalo':
—'Ajnaxañiỹa yi 'laua yí'maq neetalec yi na'a' lodegaxat Jericó.
Ca saua'maxare que', ca ỹovirera'o' yi la'a' aca 'aalo nanatqa lo'o' quiyi Jericó, leenaxat Rahab. Ca huera'ño' lelaxasqote' queca pe. 2Qam 'uo' so quepegue' so lashi yi Jericó, ca ra'qaataxana, 'naaco':
—'Vii saua Israel lase' novirero na' napalchiguiñi, na'ajnaxanda'a najo 'laua.
3Ca' so nashi ilata da la'qaatec aso Rahab, 'naaco':
—Nelachire'ogue najo caua ỹale' novirera'a na ra'aachi', ma' caua'maxare chi nelaatqa qara'ajne'.
4Qam aso'maxare ỹoxochiñi saua ỹale'. Ca 'naaco':
—'Nesa ma' 'vii saua ỹale' hueesa'ñi na ỹa'a', qam se sa'den ca chicqora'gue. 5Qam mashic shi'gue que' na' napalchiguiñi na' sham qaỹapogui ñi lasom na na'a'. Qam qamiri no'm chaqa'ma' co'uaachilgoto, ca' viriỹalgoto ma'le.
6Qam ỹaatqajam llic quiyim aso'maxare ỹaviquishiguim saua ỹale' quena lelaq so lauo' 'imec. Ca' saua'maxare nañoxochiñi, inoxonyigui ca lino napoonecsec qaỹashiviaxatetac.
7Ca' so nalliripi so nashi co'uajlgoto taatere'uegue da pa'a'gue aso lachiugue Jordán, chi qaỹoviretaxaso'ma so napacqajnatec. Ca co'na' chi inoxonec so ỹalliripi, ca' qaỹapogui ñi lasom yi na'a'. 8Ca co'na' saqa' laxe' saua na'ajnaxanqajanqa, ca' aso Rahab quishiguim quena lelaq ca lauo', ca 'naaco' quesaua'maxare:
9—Ỹim sa'den quiyim ñi ra'gaxalari ỹaanema qamiri najo 'laua, ma' ñi'maxare ỹo'uet quiyim 'xoic da qarqolonaxa. Ma' ná'ogue ná'maq neeta'ñi najo ileuapeguem da lqolonaxa sauaxate' qamiri. 10Ma' sa'deenaq na' qamiri noxoñiuec quiyi 'laua Egipto, ca' ñi qota'olec shicchigui nqai'en so huaxaỹaq caso huaaxai leenaxat toc, qaiyi qamiri shichii paguiỹa'ta. Chaqai qai'neeta sa'deenaq nomachiichiguiñi yi Sehón chaqai Og saua dos lashil na amorreo laseripi quená'maq pa'aata'gue da lahi aso lachiugue Jordán. 11Ca' mashic chalego da qarqolonaxa na' sa'deenaq, ca vire'ta qaica ca ishit nalauajto qamiri. Ma' ñí'maq ra'gaxalari qota'olec caqamiri, ñi'maxare ỹoiquentac da pa'aashiguim quena piguim chaqai quena pa'aañi quena 'laua. 12Vichiguiño' sashiilahi quiyim nallichiỹalta' quiñi ra'gaxalari quiyim 'maxachii'tegue aỹim chaqai na iuo' laseripi pacqajñichigui dá'maq shi'nteguelo qamiri. Vii ca itanec quiyim 'chiichiguiñi nqai'ñii dajo, 13chaqai qaica ca 'ñiigue queda nachaalataxac ñi ita'a, añi ỹate'e chaqai naua ỹaqaỹa' ỹale' chaqai naua 'aalo, chaqai ná'ogue ná'maq chi lalamaxaret, ¡nca'leuec nqai'ñii!
14Ca saua'maxare 'neraco':
—Saanaxauec dá'maq chi qanachaalataxac ma'le, qaiyi se qaỹalauate' qamiri, qam no'm sqaica ca 'xachim dajo. Ca ma' ñi qara'gaxala' ỹaanema qomi' najo 'laua, ca' qomi' sa'maxatqa'teguelo qamiri chaqai ipaquichigui nqaishinaq da qara'qaatec.
15Ca ma' asó'maq Rahab na'deeto ca lauo' queso lquepaxaset yi na'a' lodegaxat, ca' ỹahote'e so ñic na' inoxonaxaterec queda lahi queetouguilo nqai'ne' añi nqote ñi lauo'. 16Ca 'naapegalo':
—Quiishi'megue ana qa' ladocai, qaiyi se qaỹanatalo qamiri quecá'maq idaañitapegaxari. Nañoxochiñi quiyi'maxare quecaua tres na'xata', toco' ma' liỹa noviro quena na'a'. Ime, ca' qaigueme repaguiỹa quecá'maq 'iỹa'gue.
17Ca' saua'maxare 'neraco':
—Qomi' ỹaatqajam sepacqajanqachigui ma'le dá'maq qara'qaatec quiyim sahoqe cá'maq vi'saque quiyim saanqaem qami'. 18Qam ma' qomi' ñinoxonaxau'a najo 'laua, ca' qami' coñichiro najo ñic toc cañi nqote na qauochi' cañí'maq queetouguilo nqai'ñi' qomi'. Ca ma' ime, ca lapooñirata' quena ra'aachi' ca qataa'i', qachii'i', caua rqaỹachi', chaqai ná'ogue na lauoyac ca qataa'i'. 19Ca no'm 'ue ca inoxonec queca ra'aachi', ca ca'maxare chi nasauaxatalta', no'm ileu se qarasauaxaset. Qam no'm 'ue ca i'guentau'a ca hueeta'ñi ca ra'aachi', ca' qomi' qarasauaxaset. 20Chaqai no'm 'ue ca 'xachi' ma'le quedajo, ca' qomi' soorec quiyim se sepagaxalec da qara'qaatec dá'maq saanqaem qami' quiyim sepacqajanqachigui.
21—Ajá'a, chaqaida nqaishinaq —'naaco' aso'maxare.
Ime, ca' niquinto saua'maxare, ca saua'maxare que'. Ca na' ime, ca aso'maxare coñiro so ñic toc cañi nqote ñi lauo'.
22Ca' saua dos na'ajnaxanqajanqa que', ca nqañoxoterougui aso qa' ladocai quesaua tres na'xata'. Ca' so nouaataxanyipi ỹaatqajam nimitetapigui, qam se ỹanatalo saua'maxare, vire'ta na' pilda'a yi Jericó. 23Co'na'le, ca' saua na'ajnaxanqajanqa renoterec caso qa' ladocai, paquera'ta aso lachiugue, ca' pilta yi neeta'ñi so Josué. Ca' ra'qaataxantem quedá'ogue dá'maq 'neeto' na'le. 24Ca 'neraco':
—Ñi qara'gaxala' qota'olec ỹaanema qomi' quiyim qodoxonec yá'ogue yi 'laua, ma' yá'ogue yí'maq neetalec yijo 'laua ileuapeguem da lqolonaxa.
Currently Selected:
Josué 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.