Josué 1
1
So Josué qaroỹaxana quiñi qota'olec
1Ca co'na' mashic ileu so Moisés só'maq lelaatec ñi qara'gaxala', ca' ñi qara'gaxala' retaxaỹa'pegue' so Josué só'maq llaalec so Nun só'maq chaqai'en lotaua so Moisés, 'naaco':
2—Ma' mashic tot qaica so ilaatec Moisés, ca' qami' chaqaqami' ná'maq ỹapaca'ta nqai'ñi' ana lachiugue Jordán, riỹa'isa'ta ná'ogue na llaalqaipi so Israel, qaiyi quiipegue' yí'maq 'laua saanema qamiri. 3Sepacqajanchigui dá'maq ỹa'qaatec na'le queso Moisés na' shinac ỹim saanema qamiri ná'ogue ná'maq 'laua mashic co'viilec. 4Ca' ỹim saanema qamiri ma'le yi 'laua chicqochi'ñi yi 'laua qaica qom, chaqai ana quemaralec qa' ladocai quiyi Líbano, ỹovira'oga aso chalego lecaic lachiugue Eufrates, liỹa'ogue' yá'ogue yi na'laua na hitita laseripi, chaqai ỹovira'oga aso huaaxai, leenaxat Mediterráneo. 5Qaica ca ishit quiyim loxonec qami' quiyim ñaq rca'lli'sauec, ca ỹim iỹaatac qami' ma'le dá'maq shinta'gue na'le queso Moisés. Se salachi'sac chaqai qaica ma' shique'e quet qami'. 6Qam ỹaatqajam na'ñaxachi', se ileuapigui qavilli', ma' qami' naloqojñirec ma'le yi 'laua, 'ỹaañitem na qomyipi, ma' yi'maxare sachaxantapeguem na'le so 'auaxaic leta'allipi quiyim saanem. 7Qam chaqaidaata sahotaque quiyim na'ñaxachi' chaqai se illivigui na qavilli', chaqai ỹaatqajam pacqajñichiriguilo na ỹaqataxaco ỹaanema qami' na'le so ilaatec Moisés. Ỹaatqajam pacqajñichiriguilo naua'maxare, qaiyi 'ue ca 'negue cá'maq canchaqaica coñita. 8Pilaxachisa'gue dá'maq 'naac ana lere hueetalec na laqataxaquipi ñi qota'olec. 'Yiiñisapegalo quiyi na'xa'a chaqai quiyi pe, qaiyi se neme 'viichi'sac dá'maq 'neeta da naqataxac. Ca cá'ogue cá'maq 'viichi' ma'le cá'ogue ỹa'maqachiguiñi. 9Ỹim ná'maq selachi' quiyim na'ñaxachi' chaqai se ileuapigui qavilli'. Se ro'chi'i' chaqai se reualliriñi, ma' ỹim ra'gaxalachi' qota'olec caqami', ca ỹim ñauequeta'pegue' qami' quecanchaqa 'itegue.
So Josué na'maxajñi quiyim rouootaxana'gue yi 'laua
10Co'na'le, ca' so Josué ila' so lashillipi so qomyipi:
11—Quiiguilo naua'que naua ra'aachiri ma'le, ca ná'ogue 'ñiỹapega quiyim ỹa'maxatetañi ca nouene', ma' quenauajo tres na'xata', ca sapagaxata aso lachiugue Jordán, qaiyi senqalec yí'maq 'laua ỹachaxantapeguema qomi' ñi qara'gaxala' qota'olec quiyim ỹaanema qomi'.
(1.12-18 So Josué ila' so qomyipi.)
Currently Selected:
Josué 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.