Juan 14
14
So Jesús chaqaiso só'maq nayic tai'a ñi qota'a
1Sqaica huapigui qavillii. Ta'ta'a quiyim viilec ñi qota'olec, chaqai viilec aỹim qai'neeta. 2Ma' yi la'a' ñi ita'a ỹaatqajam 'xoic na na'aateripi. Ma' quet mesqaida, ca shi'gue quet shinapegalo qamiri. Aỹim shic, qam sa'maxajñi ca ra'aari. 3Ca ma' ime ashic, ca sa'maxajñi ca ra'aari, ca lotqai liỹa yapil, ca sauegue' qamiri, qaiyi cá'ogue cá'maq senqata'ñi. 4Qamiri 'yiiñii dá'maq saigue, chaqai 'yiiñii na nayic.
5Ca' so Tomás 'naaco':
—Qami' qara'gaxala', se sa'deenaq cá'maq 'itegue; ¿huose'quet sa'deenaq ca nayic?
6Ca' so Jesús 'naaco':
—Ỹim ná'maq ỹim nayic, chaqai aỹim lliqueta, chaqai qai'neeta ỹim nca'laxa. Ỹim qaỹimeta ñigo, ca ishit qaỹovira'a ñi qota'a. 7Quetqai huañiua', ca huañiỹa quet qai'neeta ñi ita'a. Ca' nagui chaqa'ma' shi'gue huañiỹa, ma' shi'gue 'ajñitac.
8Ca' so Felipe 'naaco':
—Qami' qara'gaxala', vite quiyim 'oonoqui' seuanaxa ca qota'a, ca' yí.
9Ca' so Jesús 'naaco':
—Felipe, shi'gom iỹareta'pe qamiri, ¿qam saqa' huañirapiguiỹa'o'? Cá'maq iuana ỹim, ca' iuana ñi qota'a. Ca' ¿chi'negue ma' yashiila'isac quiyim huañita ñi qota'a? 10Ca ¿sqai vi'relec quiyim ỹim seuetagui ñi qota'a, chaqai ñí'maq qota'a hueetagui aỹim? Dauá'maq sa'xateta'pe caqamiri se ñanoiquentac quiyim sa'xate'. Ñi qota'a ñí'maq hueetagui aỹim, chaqaiñi ñí'maq ỹo'uet dá'maq chi lo'ueenataxanaxac. 11Viilec quiyim ỹim seuetagui ñi qota'a chaqai ñi qota'a hueetagui aỹim, loqo'm noma'chi', ca' viilec aỹim quecá'maq so'uet. 12Ỹaatqajam llic da shinac caqamiri, quiyim quecá'maq huelec aỹim, ca ishit ỹo'uet qai'neeta dá'maq so'uet, chaqai paguec lecaic ma'le ca ỹo'uet, ma' ỹim shicpegue' ñi qota'a. 13Chaqai cá'ogue cá'maq shiilaxañiỹaque qamiri quiyim quiichigui nqai'ñii da ỹeenaxat, ca ỹim so'uet, qaiyi najo ñaalec ichoxot da lquesaxanaxa ñi leta'a. 14Ỹim so'uet canchaqaica shiilaxañiỹaque qamiri quiyim quiichigui nqai'ñii da ỹeenaxat.
So Jesús 'naac quiyim nela' ma'le so Espíritu Santo
15No'm qamiri yi'xoriñii, ca na'xaỹaxañii'talo naua ilaataxanaxaco. 16Ca' ỹim ñi'xoresene'tot ma'le ñi qota'a, quiyim nela' ca liỹa quiyim ỹotauane' chaqai ỹa'ñaxate' qamiri, chaqai quiyim chaqa'ma' hueeto'oto qamiri, 17so Espíritu só'maq ichoxot dá'maq ỹaatqajam lliqueta. Na qomyipi hueetalec na 'laua se ishit icoñiguit, ma' se iuana chaqai se ỹa'den. Qam qamiri mashic huañiỹa, ma' mashic hueeto'oto qamiri, chaqai chaqa'ma' liyi no'ueeno'oto qamiri. 18Aỹim se salachii; liỹa yapil ma'le, qaiyi sentauguilo qamiri. 19Qam sqaỹalqotac, ca' na qomyipi tot iuañiua', qam qamiri huañiỹa ma'le aỹim. Ma' qamiri rca'lliiuec, ma' ỹim yca'leetauec. 20Ca' quecajo na'xa'a, ca' retañii ma'le quiyim ỹim seuetagui ñi ita'a, chaqai qamiri viitagui aỹim, chaqai aỹim seuetauguilo qamiri. 21Cá'maq ỹa'deene' chaqai na'xaỹaxanalo naua ilaataxanaxaco, ca'maxare re'oq quiyim ỹaatqajam llic yi'xoren. Chaqai ñi ita'a i'xoren cá'maq yi'xoren, chaqai ỹim qai'neeta se'xoren, chaqai ñachaxana ma'le ca'maxare.
22Ca' so Judas (qam mesqai so Iscariote) 'naaco':
—Qami' qara'gaxala', ¿chi'neco' ma' qoqometa qomi' nachaxañitalo, qam se nachaxañita ná'ogue na qom hueetalec na 'laua?
23Ca' so Jesús 'naaco':
—Cá'maq yi'xoren, ca' na'xaỹaxana cá'maq shinac, chaqai qai'xoren quiñi ita'a. Ñi ita'a chaqai aỹim ñanaguinaqpegue', ca' qouora ma'le ca'maxare. 24Cá'maq se yi'xoren, ca se na'xaỹaxana dá'maq sa'xatetac. Dá'maq na'qaatec na'xaỹaxañitapega se ỹalamaxaret; chicqo'ot ñi qota'a ñí'maq yila'.
25Dá'ogue dajo sa'xate'tema qamiri nagui ma' ñaq salequetauguilo qamiri. 26Qam ca Espíritu Santo, cá'maq nelatalo qamiri ma'le ñi qota'a, quiichigui nqai'en da ỹeenaxat, qaiyi ỹotauane' chaqai ỹa'ñaxate' ma'le qamiri, ca'maxare rapaxaguiñiigue ná'ogue chaqai no'uenaxanaxane' qamiri quedá'ogue dá'maq shinac.
27Qaidaata da neuagaxa 'ue quiyim shique'elo qamiri. Saañiỹaxarom da iuagaxa, qam sqai shine'tegue dá'maq 'ne'tegue na qom hueetalec na 'laua quena' ỹaan da leuagaxa. Sqaica huapigui qavillii, chaqai se ro'chii. 28Ma' shi'gue 'xahitac quiyim shinac quiyim ỹim shic, chaqai quiyim yapil, qaiyi lotqai liỹa salequetauguilo qamiri. Quiyim ỹaatqajam llic yi'xoriñii, ca' netooñii quet quiyim 'yiiñii shicpegue' ñi qota'a, ma' ñi'maxare ỹapacauec lecaic caỹim. 29Saqa' ỹovita, ca chaqa'ma' sa'xat dajo, qaiyi ma' ỹovirelec, ca' viilec.
30Totqai queeta quiyim 'xoic ca itaxaỹaxac caqamiri, ma' naata'quena na na'ỹaapec ná'maq relaataxanac quena 'laua. Qam na'maxare qaica ca lquesaxanaxa caỹim. 31Qam chaqaida dá'maq qohine'tegue, qaiyi ná'maq hueetalec na 'laua ỹa'den quiyim aỹim se'xoren ñi qota'a, chaqai quiyim so'uet cá'maq yilarelec. Ne'laxachishiguim. Qolqa'e najo.
Currently Selected:
Juan 14: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.