Hageo 1
1
Qohinac quiyim qano'xonshiguim so no'ueenaxanaxaqui
1Na' ỹovi' 'óna ñaaxa, cinco shiriguiri, ca' queso 'auaxaic na'xa'a queso liỹa shiraigo na' neetaho quiyim nashi so Darío quiyi Persia, ca' ñi qara'gaxala' retaqaugui so letaxaỹaxaqui Hageo. Ỹaatqajam 'naapega so nashi ỹoiquentac yi 'laua Judá, só'maq llaalec so Salatiel, leenaxat Zorobabel, chaqai so lashi na netaxaỹaxanqajanqaipi, llaalec so Josadac, leenaxat Josué.
2-3Ca ñi qara'gaxala' sqaica lqalanec na' retaqaugui so letaxaỹaxaqui Hageo, 'neetasa' da la'qaatec:
—Najo qomyipi 'naac quiyim saqa' ỹovita ca laloqo' quiyim liỹa qano'xonshiguim ñi nqouagaxainaxaqui caỹim. 4¿Ca chi laloqo'o' nagui caqamiri quiyim ñiitauguilo naua lo'yaxanqa 'imqa, ca' quiñi qouagaxainaxaqui caỹim, ca' chaqaidaata da 'neetari' ropoqota iterejlec? 5Ỹim na'gaxala' sqaica lqalanec, shinac nagui caqamiri quiyim ỹaatqajam, 'ajñita dá'maq 'ñiitari'. 6Qamiri 'xoic ná'maq qadañicshiquii, qam sqa lo ná'maq naqachii ala na'maxare; qui'iitac, qam se rquemari; ni'chiitac, qam se neme na raquipii; ñiiñi naua pa'iichiguilo qatoohi, qam se npa'eeuec na roshicmaxahi; chaqai ná'maq ro'ueenataxanaxaguii laseue' lliỹa'ñigui ana qachoxoguii huacnaxa. 7Ỹim na'gaxala' sqaica lqalanec shinac caqamiri quiyim ỹaatqajam 'ajñita dá'maq 'ñiitari'. 8Mohi, quiipegueto naua qa' ladocahi, ca' huaxanaxañii quena qo'paq, ca' liỹa no'xoñiishiguim ñi no'ueenaxanaxaqui. Ca ma'le, ca' ñitoon, ca' sachaxan ma'le da iquesaxanaxa. 9Qamiri ỹaatqajam 'xoic da rimiitaxanaxaguii, qam sqa lo ná'maq nachiỹa; chaqai ná'maq 'maxachii quenauá'maq qauootori, ca chaqa'ma' spe'teuec. ¡Ca' có, sqaica! ¿Chi'negue? ¡Sá'ic!, ma' ñi iuo' nqouagaxainaxaguii ñaqaiñi saqa' qanadalaxashiguim, qam qamiri nquipichita'pegueto 'maxachiñi nauá'maq chi ra'aachiri. Ỹim na'gaxala', se'taxajñi da ỹa'qaatec. 10Vichiguiño' sqaica ca ỹaxat caqamiri, ca' na 'laua se ishit ỹa'ue ca ala na qadañicshiguii. 11Ỹim ná'maq ñoviraxat ná'maq nashiviaxa lodegaxat quena 'laua, quenaua qari ladocahi, quena trigo, quenaua 'uva lomaate', chaqai quena oliva lomaateripi, chaqai ná'maq nanecsec ala quena no'ueenaxa, chaqai quena qomyipi chaqai quena iseripi chaqai quená'ogue ná'maq lo'ueenatqaipi.
12Ca' so Zorobabel, Josué chaqai so liỹa qomyipi ỹaatqajam 'xoic da lqolonaxa na' 'xaỹalo naua la'qaatqa ñi qota'olec queso letaxaỹaxaqui Hageo, dá'maq chilnataxanco' ñi qara'gaxala' qota'olec quiyim qaỹa'xat. 13Co'na'le, ca' so Hageo só'maq letaxaỹaxanqajnec ñi qara'gaxala' ỹa'xato' dá'maq qohinapega quiñi qota'olec, ca 'naaco':
—Ñi qara'gaxala' 'neetasa' da la'qaatec: Ỹim na'gaxala', se'taxajñi da ỹa'qaatec, ỹim salequetauguilo qamiri.
14-15Ca' chaqaido' da 'ne'tegue ñi qara'gaxala' quiyim ỹa'ñaxatetalec so Zorobabel só'maq nashi quiyi Judá, chaqai so Josué só'maq lashi na netaxaỹaxanqajanqaipi, chaqai sá'ogue so liỹa qomyipi na' ỹovi' 'óna ñaaxa, cinco shiriguiri, chaqai veinticuatro na'xata' quiyim nashi so Darío quiyi Persia. Ca' taañi so qomyipi quiyim liỹa no'xonshiguim so 'imec nqouagaxainaxaqui quiñi qota'olec sqaica lqalanec.
Currently Selected:
Hageo 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.