Ezequiel 1
1
Qaiuana so nqa'xanaxaqui ñi qota'olec
1-3Ỹim netaxaỹaxanqajnec, ỹeenaxat Ezequiel, ỹim llaalec so Buzi, 'ue so na'xa'a seueto'ot na lahi aso lachiugue Quebar, quiyi Babilonia. Salequetaugui na'le ná'maq ỹoqa'a da qai'xategue 'laua. Ca' quiyi, ca 'eco' huachigui na piguim, ca' 'ue so iuanaxanaxac, seuane'ta ñi qota'olec na' ime' saua veintinueve ñaxari, tres shiriguiri chaqai cinco na'xata', na' ỹovite' saua cinco ñaxari quiyim qai'xategue da ỹoqa'a 'laua so nashi Joaquín. Ca' ñi qara'gaxala' qota'olec ỹashil-lec aỹim. 4Ca' seuana na'le quiyim 'ue so nonot quesaxanaxaic chicqa'gue da rapiguim, chaqai so naueguelec lodegaxat chicqotapougui so norec 'ec nqai'legaxaripi, ca' quenaua lahil 'ue so quesaxan lauaq. Ca' quena lavinñi so norec 'ue so qashilqueta'a 'ec lecat lahi qaisaullaxateta. 5Ca' quena lavinñi 'vii saua cuatro ise', qam 'ec qomi'. 6Quiñi 'óna quesaua'maxare 'vii naua cuatro lashiigo' chaqai cuatro naua laua'; 7ỹalamrete' naua lichil, ca' naua lenachi' 'ec huaca llaalec, qam qashilgue' 'ec na bronce qaiqueuoqueta. 8-9Chaqai quenaua cuatro lashiigo' chaqai naua cuatro laua', sauajo ise' 'vii naua lqai'laqate' quenaua cuatro lahil, pa'aasañi quenaua laua'. Naua laua' ỹoviretecta'. Quena' queete', ca' se naqalcqoiñi, ta'ta'a quiyim ỹalamqaterec. 10Ca' naua lashiigo' saua cuatro 'neetasa': queda reloqota'gue 'ec na qom lashic; queda loic, ca 'ec na sauaxaic leta'a; queda nemaq, ca 'ec na tooro; chaqai queda qoshiita'gue, ca 'ec na o'ic. 11Naua laua' ỹiquesashiguim. Ca saua dos laua' ỹoviretecta', ca' quesaua liỹa' dos, ca' ỹapoosalec na loshicmaxa. 12Sá'ogue quena' eec, ca' ỹalamqata, se naqalgoxoñi. Ca' eec, qam ỹalamqata queeta'pegue' da lquesaxanaxa ñi qota'olec dá'maq icaxatesac. 13Ca dá'maq 'neesari' saua'maxare 'ec aca poqo ỹaviquetaugui, loqo'm 'ec ca ncoỹeraxanaxat ỹaviquetaugui queetegueñiguilo saua'maxare; so norec ỹaatqajam chalego lauaq chaqai chicqotapougui na nqai'legaxa. 14Ca' saua ise' chalego na liyigue' ỹopilaxatesac yi'maxare, chaqai 'ec na nqai'legaxa.
15Ca' na' ỹaatqajam sa'ajante' saua'maxare, ca' seuane'ta hueesañi quiyi 'laua saua nahoglena laviol, huaqate'e' quiñi 'óna. 16Ca' saua cuatro laviol ỹaatqajam nishiiquiaxaua', dá'ogue da no'ueenataxague', chaqai richaañi da lqashilegaxa 'ec na qa' leenaxat topacio. Ca 'ec 'ue aca liỹa lavio pa'aauo. 17Ca saua'maxare ishit que' canchaqai sham taategue, qam se naqalcqoiñi. 18Ca' seuana quiyim saua cuatro laviol 'ue so lahi' ỹaqaletenlec 'xoic na lauaq. 19Ca' quena' que' saua ise', ca' saua laviol qai'neeta que'. Ca' quena' saua ise' ne'laxachishiguim quena 'laua, ca' qai'neeta saua laviol ne'laxachishiguim. 20Saua ise' que', qam queesa'pegue' da lquesaxanaxa ñi qota'olec ñí'maq idaxansa'pe, ca' saua laviol liỹaasashiguim saua'maxare quena' ne'laxachishiguim, ma' saua laviol 'ec inoqueta'guita saua ise'. 21Ca' saua ise' quena' redahi', ca' saua laviol qai'neeta redahi'; chaqai quena' saua'maxare huere'e, qai'neeta saua laviol huere'e; chaqai quena' saua ise' ne'laxachishiguim, ca' saua laviol qai'neeta ne'laxachishiguim, ma' saua ise' inoqueta'guita saua'maxare.
22Ca' 'ue so pa'aatashiguim naqallichinchiguiñi na lqahic, ỹaatqajam qashilec 'ec na chaañi. 23Ca' quena pa'aañi queso pa'aatashiguim quena lqahic, ca' ỹiqueterec naua laua' saua ise' ỹoviretecta'. Chaqai quesaua liỹa', ca ỹapoosalec na loshicmaxa. 24Chaqai sa'xaỹa qai'neeta da lelamqa' naua laua' quena' que': Da lelamaxa 'ec ana lachiugue quena' nqo'ñishiguim, 'ec da lavillaxac ñí'maq qota'olec qaica ca lqalanec, da lelamaxa 'ec na 'xoic nouaataxanaq nalauataxai. Quena' hua'e, ca' nañaañiñi naua laua'. 25Ca' 'ue so lelamaxa chicqojlec só'maq pa'aatashiguim naqallichinchiguiñi naua lqahigo' saua'maxare. 26Ca' queda pa'aashiguim quesó'maq quejlgoto naua lqahigo' saua'maxare 'ue so seuana 'ec nashi nqa'xanaxaqui, 'ec na qa' zafiro, ca' sojo qa'xanaxaqui 'ue so nqa'xantalec 'ec qom. 27Ca queso'maxare quena taashi'mquera quena lasot re'qoota da lqashilegaxa 'ec na lecata lahi quena' qashilec nqohin hueetañigui ca norec. Ca' queda hua'nquira seuana so 'ec norec. Ca' quenaua lahil 'ue na lauaq, 28'ec na qoñi'gue quena' re'oq quena naueguelec quena' chita'gue ỹaxanegue na ỹaxat. Ca' chaqaida 'neeta na' re'oq da lauaq ñi qara'gaxala'. Ca' na' seuana, ca' ñqa'paxañiguit na 'laua, soviraxatañi na ỹatap.
Currently Selected:
Ezequiel 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.