2 Corintios 2
2
1Ma' vichiguiño' sahotaque quiyim liỹa sovitalo qamiri, qam se sahotaque quiyim ca ỹoviraxac chicqaugui ca rachicoxohi. 2Ma' no'm ỹim chicqochigui ca rachicoxohi, ca ¿negue' cá'maq ỹo'uet quet ca ñitoonaxac? Qaqamita, qam so'uet ca rachicoxohi. 3Vichiguiño' selatalo na'le qamiri aso ilaata, ma' se sahotaque quiyim 'xoic ca ỹachicoxo quiyim sovitalo qamiri, ta'ta'a quiyim 'viichii quet ca ñitoonaxac quiyim salequetauguilo qamiri. Ma' ỹim sa'deenta quiyim ñitoontac, ca' qamiá'ogue qamiri ñitoonaxaua'. 4Ma' na' seretegueñi aso ilaata ỹaatqajam 'xoic da shinta chaqai da ỹachitachic, vire'ta quena' ñoỹentac. Qam na' shiriñi aso ilaata se sahotaque quiyim 'ue ca rachicoxohi, ta'ta'a quiyim 'yiiñii quiyim 'xoic da i'xorenataxanaxa caqamiri.
Da ne'xorenataxanaxa quecá'maq 'ue ca lasauaxaset
5Qam no'm 'ue ca ỹo'uet ca nachicoxo, ca ca'maxare sqaỹimeta ỹo'uet ca ỹachicoxo, ma' qamiá'ogue qai'neeta, cocho'qui' 'ue da rachicoxohi. Qamiri shinac quiyim cocho'qui' rachigohi' nqai'ne' qamiri, qaiyi sqai paguec quiyim 'ec se sala'gue. 6Ca nouaxanaxaset 'viichii na'le cajo ỹale queca lapoxoguii, ca' nagui, ca nalootañi, yi, le'en. 7Ca' paguec la'maxa quiyim 'xoriñitac ca'maxare, palaxachii ca lasauaxaset, chaqai lo'daqaiñitac, 'neeto' caapeguem da lachicoxo. 8Vichiguiño' nagui liỹa yipaca'alo qamiri quiyim re'qoota nqai'ñii ca re'xorenataxanaxahi queca'maxare. 9Shiriñi na'le dajo caqamiri, qam sahotaque chi si'guiñii, qaiyi sa'den quiyim llic quiichi'nguilo naua ỹapaxaguinataxanaxaco. 10Ca' nagui cá'maq palaxachii ca lasauaxaset, ỹim qai'neeta sapalaxat ca lasauaxaset. Ma' cá'maq se'xoren quiyim 'ue ca ỹasauaxat, qam se'xoren, ma' sa'deentapegalo qamiri, ca da'maxare ỹauanchigui nqaishin so Cristo, 11qaiyi so na'ỹaapec qaica ca lligo coqomi', ma' sa'deenqachiguilo naua'que naua lco'ỹaxarico.
Se ỹa'maxañi so Pablo na' hueeta'ñi yi Troas
12Ca na' sovita yi na'a' Troas, ca sa'xat da na'qaatec queso Cristo. Ca' quiyi'maxare, ca ỹaatqajam qaica ca yanaxat quiyim so'ueenataxanot so qara'gaxala'. 13Qam ỹaatqajam se ỹa'maxagui na iuel, ma' se seuana so qarqaỹa Tito. Vichiguiño' chi sa'ue da la'xaỹaxac na'le yi qomyipi, ca saigue da Macedonia.
'Ñaaxaiqa nqai'ne' qomi' so Cristo
14Qam qomi' saanqot da qana'aachic ñi qota'a ñí'maq chicqochigui nqai'en so Cristo Jesús quiyim qomi' 'ue da qarquesaxanaxa, chaqai ỹachigoxochichiguilo qomi' quiyim qaỹa'den da na'qaatec queso'maxare. Qam da'maxare 'ec nqai'en ca lo'daxaraic lahita quiyim ỹaỹoxonec, ca' quelec na 'laua. 15Ma' qomi' shinqatari' ca lo'daxa lahita ca lichiinaxanaxat so Cristo quiyim ỹaanot ñi qota'a, dá'maq lahita quena' ỹaỹoxonec, ca' ỹoviraugui ná'maq mashic nca'leuec nqohin chaqai ná'maq ñaqai hueetaugui da no'maxac. 16Qam quená'maq ñaqai hueetaugui da no'maxac, dajo nichiinaxanaxat 'eco' ralauataxan da lahita, qam quená'maq mashic ca'laaxaic, 'nejem nqai'en ca lo'daxaraic lahita chicqaugui da nachaalataxac. Ca' ¿negue' queto' cá'maq nalootau'a dajo no'ueenataxanaxac? 17Qam qomi' mesqai 'ec semeenqata'pe naua la'qaatqa ñi qota'a, chaqai mesqai shinqata na liỹa ma' 'xoic na ỹashaxandec yaua na'qaatqa. Ta'ta'a quiyim qaraqamqata queda sa'xatqatac, ca ỹa'deente' qomi' ñi qota'a, ma' qomi' lelaatqa ñi'maxare quiyim so'ueenataxanqot so Cristo.
Currently Selected:
2 Corintios 2: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.