2 Corintios 11
11
So Pablo chaqai saua se lelaatqa so Cristo
1¡Saxanchi' shichii quet quiyim cocho'qui' na'ñaxachiiguit da 'ec ñiualoxonqaishic! Quecanchaqai 'neeta, qam na'ñaxachiiguit aỹim. 2Ma' ỹim 'eco' 'ue da ico'ualaxanaxac caqamiri, qam dajo ico'ualaxanaxac ỹaatqajam chicqo'ot ñi qota'a. Ma' ỹim sahotaque so'naxanguita qamiri so Cristo, chaqai sahotaque sauegueu'alo qamiri so'maxare, 'nejem aca nequetegaxai se ỹauanapega 'on, ỹalamqa'chiguit ca loua. 3Qam quedá'maq 'ne'teco' na'le da lco'ỹaxaric so nanaic na' ỹachiguiñi aso Eva, ca 'eco' 'ue da ỹoqolonaxa ma' sqoue quiyim 'ue ca ỹachi'iñi qamiri qai'neeta. Ca ỹashaxanec da ra'deenataxanaxaguii, ca ỹoỹoote'ogalo qamiri quiyim sqai viilec so Cristo. 4Ma' qamiri ỹaatqajam na'ñaxachiiguit ná'maq ỹoviretape'ogalo qamiri ỹa'xatetac ca liỹa Jesús sqai 'nejem só'maq sa'xatqatac qomi', chaqai livillii'chiguit só'maq ỹoqa'a espíritu quesó'maq shi'gue coñiguit, chaqai da na'qaatec ỹoqa'a quedá'maq na'qaatec chicqaugui da nca'laxa shi'gue 'xaitapega. 5Ma' peeta'a se ỹapaquerauec caỹim ná'maq quiita'pegue' ná'maq 'naac napacalec na lelaatqaipi so Jesús. 6'Eno'm quedá'maq itaxaỹaxac sqailligueme' yalogoñi, qam mesqai quedá'maq ỹa'deenataxanaxac. Ca' dajo ỹaatqajam sichoxotqa'tema qamiri quená'ogue ná'maq so'ueetaq.
7¿Loqo'm se ỹa'maxañi da shine'tegue na'le caqamiri na' sqaca nqaishin aca laseuete na' sa'xatetac caqamiri da na'qaatec chicqaugui da nca'laxa, ñineequesen sa'nquira, qaiyi ñanochishiguim qamiri? 8Ca' ỹim 'ec souootaxana'gue ana lam ná'maq liỹaripi shi'gue icoñiguit da na'qaatec na' secoñiguit aca ñishiuete, ca' souen na' sentauguilo qamiri. 9Chaqai na' 'ue ca ỹouenaxanaxa na' sentauguilo qamiri, qam sqaica ca so'taxatetac caqamiri. Ma' saua qarqaỹa' chigoqtegue da Macedonia nañaane' cá'maq souentaque. Qam 'ue da itelaxa quiyim 'ue ca so'taxatetac caqamiri. Ca' se neme chaqaida shintari'. 10Ỹaatqajam se'taxachichiguiñi quedá'maq shintari', quiyim sa'den dá'maq lliqueta chicqo'ot so Cristo, chaqai qai'neeta sa'den quiyim qaica ca ishit naqat da chicqochigui da ñitoonaxac quená'ogue na neetalec na 'laua Acaya. 11¿Chi'neco' ma' shi'ntegue dajo da ỹa'qaatec? ¿Loqo'm dá'maq quiyim se yqo'talo qamiri? Ñi qota'a ỹa'deenta quiyim ỹaatqajam yqo'talo qamiri.
12Qam ỹim shiquetalec quiyim qaidaata dá'maq shintari' queda so'ueetetac, qaiyi qaica ca lligo ná'maq chi ỹahotaque cá'maq chicqochigui quiyim 'ue ca netoonaxac, 'nejme' qomi'. 13Qam mese nelaatqa queso Jesús, qam chi rayinaxanta'pe, no'ueetesagui quiyim 'ec lelaatqa so Cristo. 14Qam quedajo qaica ca qara'laaque, ma' so na'ỹaapec qai'neeta no'viichigui ca no'ueenataxac ca 'ec lelaatec ñi qota'a chicqashiguim, 'ue na lauaq. 15Ca vichiguiño' se qara'la'a quiyim ná'maq lelaatqaipi so'maxare chi ỹadenaxachichigui quiyim 'ec lo'yaxanec ca ỹo'ueetetac. Qam cá'maq nouaxanaxaset ma'le na'maxare qaipacqajanchigui ma'le ná'ogue ná'maq ỹo'ueetec.
Da le'xoric so Pablo ma' lelaatec so Jesús
16Ca lotqai liỹa shinac: quiyim qaica ca 'neetapega ỹim hualoxonaq. Qam no'm chaqaida hueetapigui qavillii, qam yayaxañiỹac quiyim setaqa, shintari' meca hualoxonaq, qaiyi aỹim qai'neeta cocho'qui' 'ec 'ue da ñimaqajnaxac. 17Sa'xatetac dajo, qam se qailarilec queso qara'gaxala'. Ta'ta'a quiyim 'ec ỹim hualoxonaq, qam dajo taỹaugui quiyim ñimaqajan. 18Ma' mashic 'xoic ná'maq nemaqajanteguelec ná'maq hueetalec najo 'laua, ca' ỹim qai'neeta ñimaqajan. 19Ma' 'neetapigui qavillii ỹaatqajam qamiri 'deenaxanqachaqaqa, ca na'ñaxachiiguit ná'maq hualoxonyipi. 20Ma' qamiri na'ñaxachiiguit ná'maq ỹo'uet quiyim qamiri lelaatqa, loqo'm que'eetapiguilo qamiri, chaqai 'ec qamiri lalamaxarete', chaqai qaica ca ỹauaapigui qamiri, chaqai ỹouaxantapiguilo naua rashigori. 21'Eno'm 'ue da ỹayiloxo quiyim sa'xat dajo, qam ¡qaica ca qarquesaxanaxa quiyim shinqa'teguelo qamiri dajo!
Qam quecá'maq liỹa quiyim ishit ỹo'uet, ca' ỹim liỹa, 'eno'm quedá'maq ỹa'qaatec 'ec hualoxonqaishic. 22¿Na'maxare peeta'a hebreo laseripi? Ỹim liỹa. ¿Na'maxare chicqaugui so llaalqaipi so Israel? Ỹim qai'neeta. ¿Na'maxare lauaripi so Abraham? Ỹim qai'neeta. 23¿Na'maxare peeta'a lelaatqaipi so Cristo? Qam ỹim sapacauec quena'maxare, 'eno'm 'ec ỹim hualoxonaq quiyim shinac dajo. Ma' paguec da ỹo'ueenataxanaxac quena'maxare, paguec da ñouaxanaxac quena'maxare, chaqai paguec da ñcoñiitaxac, chaqai 'xoic seuetaugui da lichic da nelauaxa. 24Chaqai cinco qaỹa'ue da ñouaxanaxac quena judío laseripi quiyim ỹovi' treinta y nueve qayalashin. 25Chaqai tres qayouaxantac, qaỹahote'e ỹo'o qo'paq, chaqai 'óna qayinaqatac quena qa', chaqai tres iyinñi aca ñoqotetau'a qom lahi' huaxaỹaqse, chaqai 'óna na' seuetañigui aso huaaxai late'ogue', 'óna na'xa'a chaqai 'óna pe. 26Chaqai 'xoic na ỹouoxoc, ca' seuana na lichic ana lachiugue, chaqai lichic na cuataxairipi, chaqai na lichic na chi iuo' laseripi, chaqai na se iuo' laseripi. Chaqai seuana da lichic na na'aateripi, chaqai quena no'ueenaxa, chaqai ana huaaxai. Chaqai seuana na lichic ná'maq 'naac qarqaỹaripi, qam 'maatqaiquipi. 27Chaqai 'xoic na ỹo'ueenataxanaxac, chaqai da ñanaqataxac. Chaqai 'xoic se seshit quiyim selaq, chaqai 'xoic ỹoqopaaxa chaqai na ỹaquip. Chaqai 'xoic quiyim ñqopaaqachit, chaqai yalauat quen na no'oomaxa, chaqai sentauec qaica ca sanñi.
28Nauajo, chaqai 'vii naua liỹa', qam naua'que naua na'xata' sa'deentapega ná'ogue ná'maq mashic icoñiguit da na'qaatec. 29Ma' no'm 'ue cá'maq ra'lliiñi, 'ec aỹim ná'maq sa'lliita. Chaqai no'm 'ue ca huaañi nqohin, ca' ỹim 'ue i'xoric queda ỹayiloxo, chaqai 'ue da iuel. 30Ca no'm 'ue ca maqajnaxac, ca' ỹim ñimaqajan, qam quedauajo ma' re'oq nqai'en quiyim qaica ca iquesaxanaxa. 31Ca' ñi qota'a, ñí'maq leta'a so qara'gaxala' Jesucristo, ma' ta'chiguit se neme quiyim qaimaqachin, ñi'maxare ỹa'den quiyim lliqueta dá'maq sa'xatetac. 32Ca na' seueta'ñi yi Damasco, ca só'maq nashi reloqota'a yi'maxare, lotaua só'maq ỹaatqajam nashi, leenaxat Aretas, ca ỹo'ueete' saua neloxoỹa' quiñaua lasomi' yi na'a', ma' ỹahotaque ycoñi'. 33Qam queetougui nqohin aỹim aso nqote so lquepaxaset yi na'a', qayilliitañigui aso canasto, ca' qayayit queso'maxare.
Currently Selected:
2 Corintios 11: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.