Génesis 48
48
Efrainta Manasestawan Jacob bendecisqanmanta
1Chaykunapa pasasqanmanta huk tiempo pasaruqtinmi, Joseyman willamuranku khaynata:
—Papayki Jacobmi onqosqa kashan, nispa.
Chaymi Joseyqa ishkaynin wawankunata pusarikuspa papanpa kasqanman riran. Chay wawankunapa sutinmi karan Manasés hinallataq Efraín. 2Hinaqtinmi Jacobmanqa willaranku:
—Wawayki Joseymi hamushan, nispa.
Chaymi Israelqa kallpanchakuspa camanpi tiyariran. 3Hinaspan Joseyta niran:
—Tukuy Atiyniyoq Diosmi rikhuriykuwaran Canaán lawpi Luz nisqa lugarpi. Hinaspan noqapa favorniypi rimaspa, 4khaynata niwaran: “Noqan ashka wawayoq kanaykipaq bendecisqayki. Hinaspan mirayniykitapas ashkaman tukuchisaq. Qanpa mirayniykimantan paqarinqa ashka *nacionkuna. Hinaspapas kay llapallan allpataqa mirayniykimanmi qosaq huk herenciata hina wiña-wiñaypaq”, nispa. 5Kay Egipto nacionman manaraq hamushaqtiymi, Efrainwan hinallataq Manaseswan chay ishkaynin wawaykikuna kay Egipto nacionpi naceranku. Paykunan noqapa wawaykuna hina kanqaku, imaynan Rubenpas hinallataq Simeonpas wawaykuna kanku, chay hina. 6Ichaqa Efrainpa hinallataq Manasespa qepanmanña naceq wawaykikunaqa qanpan kanqa. Hinaspapas paykunaqa wawqen Efrainmanta hinallataq wawqen Manasesmantañan herenciataqa chashkinqaku. 7Padan-aram lawmanta kutimushaqtiymi, mamitayki Raquelqa wañukapuran. Chaymi Canaán lawpi Efrata llaqtachaman riq ñan patapi paytaqa p'ampamurani. Chay Efrata llaqtachapa huknin sutinqa Belén llaqtan, nispa.
8Israelqa Joseypa ishkaynin wawankunata qawarispan tapuran khaynata:
—¿Pikunataq paykunarí? nispa.
9Chaymi Joseyqa contestaran:
—Paykunaqa kay Egipto nacionpi naceq wawaykunan. Paykunatan Dios qoykuwaran, nispa.
Hinaqtinmi Jacobqa niran:
—Noqaman ashuykachimuway. Noqan Señor Diosmanta paykunapaq mañakusaq, saynapi bendecisqa kanankupaq, nispa.
10Israelpa ñawinkunaqa manañan allintañachu rikuran, ancha ancianoña kasqanrayku. Chaymi Joseyqa wawankunata ashuykachiran. Hinaqtinmi Israelqa much'aykuspa abrazaykuran. 11Hinaspan Israelqa Joseyta niran:
—Noqaqa manan piensaraniñachu uyaykita kaqmanta rikuytaqa. Ichaqa Diosmi permitiykuwanraq, qanta hinallataq wawaykikunatapas rikuyunaypaq, nispa.
12Hinaqtinmi Joseyqa papanpa moqonmanta wawankunata urayachispa, qonqoriyukuran mat'inpas pampaman tupanankamaraq. 13Chaymantan Joseyqa ishkaynin wawankunata marq'arikuran, Efrainta phaña makinpi, Manasestataq lloq'e makinpi. Hinaspan papanman ashuykachiran. Saynapin Efrainqa Israelpa lloq'e ladonpi karan, Manasesñataq Israelpa phaña ladonpi. 14Ichaqa Israelqa makinta cruzanachispanmi, phaña makinta chutarispa sullk'a kaq Efrainpa umanman churaykuran. Lloq'e makintañataqmi Manasespa umanman churaykuran. Saynatan Israelqa ruwaran Manasés kurak kasqanta yachashaspanpas. [Nota: Jacobqa costumbrenkuta mana kasuspan, sullk'a kaq Efrainpa umanman phaña makinta churaykuspa, payta aswan masta bendeciran.] 15Hinaspan Jacobqa Joseyta bendeciran khaynata:
—Abueloy Abrahampa hinallataq papay Isaacpa servisqan Diosmi,
nacesqaymantapacha asta kunankama noqataqa cuidawashan.
16Paymi tukuy mana allinmanta librawaqniy Angelqa.
Paypuniyá kay wawaykikunataqa bendecichun,
saynapi paykunantakama abueloy Abrahampa,
papay Isaacpa
hinallataq noqapa sutiypas yuyarisqa kananpaq.
Ashka wawayoq kaspayá, kay pachapi miraychis, nispa.
17Jacobqa nieton Efrainpa umanmanmi phaña makinta churaykuran. Chayta rikuspanmi Joseyqa hukmanyaruran. Hinaspan papanpa phaña makinta Efrainpa umanmanta Manasespa umanman cambiaran. 18Hinaspan papanta khaynata niran:
—Papáy, amayá saynatachu ruway; Manasesmi kurak kaq wawayqa. Paypa umanmanyá phaña makiykitaqa churaykuy, nispa.
19Ichaqa papanqa manan munaranchu makin cambiaytaqa. Hinaspan khaynata niran:
—Wawalláy, yachanin chaytaqa. Manasesqa importante runamanmi tukunqa. Hinaspapas paymantaqa huk hatun llaqtan paqarinqa. Ichaqa sullk'a kaq wawqen Efrainmi paymantaqa aswan más importante kanqa. Paymantan ashka nacionkuna paqarinqa, nispa.
20Chay p'unchawmi Jacobqa paykunata bendeciran khaynata:
—Qankunapa sutiykichispin
Israelmanta miramuq runakunaqa bendecinqaku khaynata:
“Diosyá bendecisunki
imaynan Efraintapas Manasestawan bendeciran chay hinata”, nispanku.
Saynata nispanmi Jacobqa Efrainta primerta bendeciran, Manasesmanta aswan más importante kananpaq. 21Chaymantan Israelqa Joseyta niran:
—Noqaqa wañuypa patallanpiñan kashani. Ichaqa Diosmi qankunawan kashan. Paymi abueloykichiskunapa ñawpaq tiyasqanku allpaman kutichisunkichis. 22José, qanmanmi qoyki wawqeykikunamantapas aswan más allin kaq herenciata. Chay herencia qosqayqa Siquem lugarpi allin allpan. Chay lugartan noqaqa amorreo runakunamanta qechurani *espadaywan hinallataq *flechaywan peleaspa, nispa.
Currently Selected:
Génesis 48: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional