MALAKHI 2
2
1Atu cu, nannih tlangbawi hna, hi biachahnak hi nannih caah a si: 2Nannih nih ka bia kha nan ngaih lo i ka min kha nan upat lo ahcun, nan cungah chiatnak ka tlunter lai, tiah ralkapbu Bawipa nih a ti. Nannih nih zei ah nan ka rel lo caah thluachuahnak nan hmuhmi cu chiatserhnak caah ka canter lai, chiatsernak ah ka canter taktak lai. 3Nan ban kha kan tan hna lai i nan hmaiah ek in kan cheh hna lai, nan puai ca i nan pekchanhmi saṭil ek cun kan cheh hna lai: cun ka hmaika khan kan dawi hna lai. 4Khi tikah hi biachahnak cu kan pek hna ti kha nan hngalh lai: Levi he biakamnak ka rak sermi cu vawlei ah a ril cang, tiah ralkapbu Bawipa nih a ti. #Nam 3.11-13 5Ka biakamnak cu amah sinah khan a rak um: Amah cu nunnak le rumnak ka rak pek: hmaizah awk tlak a simi tlangbawi rian kha amah cungah cun ka khin; a rak ka hmaizah i ka min kha a ṭih. #Nam 25.12 6Cawnpiaknak mi a rak pekmi hna kha biatak a si i dinlonak bia kha a kaa chungin a chuak lo; keimah he i rem tein le ding tein a kal i mi tampi kha sualnak chungin a khirh hna. 7Tlangbawi cu Ralkapbu Bawipa lamkaltu a si caah a bia kha mi nih an i tlaih i fimnak le cawnpiaknak kha amah sinin an kawl. 8Sihmanhsehlaw nannih nih cun cu lam cu nan pialtak i mi tampi kha nan cawnpiaknak thawngin nan rilhter hna, Levi mi sin i biakamnak ka rak sermi kha pakpalawng ah nan ser, tiah Ralkapbu Bawipa nih a ti. 9Cuticun nannih nih ka lam cu zeihmanh ah nan rel lo i cawnpiaknak nan tuahmi ah khan duhdanhnak nan ngeih caah kei zong nih midang mithmuh ah serhsat awk le santlailo ah kan ser ve hna.
10Kan dihlak in pa pakhat fa kan si lo maw? Pathian pakhat sermi kan si lo maw? Zeicahdah pakhat le pakhat cung i zumhawktlak lo i kan umnak thawngin kan pupa hna sin i biakamnak cu kan hrawh? 11Judah cu zumhawktlak lo a si ko, Israel ram chung le Jerusalem khua chungah mi nih fihnung a simi thil kha an tuah hna; Judah nih ramdang pathian fanu kha a duh hna i a ṭhit hna ruangah Bawipa thiannak kha a buar cang. 12Hi thil a tuahmi hna paoh cu, umhmun khuar in khua a sami an si ah, a vak a vai lengmangmi an si ah, Ralkapbu Bawipa sinah pekchanhnak kha rak pu hna hmanh seh law, Bawipa nih Jakob umnak hmun in a ṭhawl hna lai.
13Mah hihi thil dang pakhat nan tuah rihmi cu a si: nan ṭap nan ai i Bawipa biakṭheng cu nan mitthli in nan ciah, sihmanhsehlaw nan pekchanhmi thil cu zoh a duh ṭhiamṭhiam hna lo i nan sinin nan laksawng cu an cohlang ṭhiamṭhiam hna lo. 14Zeicahdah hitihin a si, tiah nan ti. Zeicahdah a si, ti ahcun, Bawipa cu nangmah le na tlanval lio na nupi karlak ah biahngaltu a si. Na nupi cu biakamnak in na hawikom le na nupi a rak si nain a cungah zumhawktlak loin nan um. 15Pathian nih nangmah cu amah he pum khat le thlarau khat in an ser lo maw? Cu bantukin a tuahmi ah cun aa tinhmi zeidah a si? Aa tinhmi cu Pathian a ṭihzahmi fale ngeih kha a si. Cucaah ahohmanh nih nan nupile kha zumhawktlak loin nan umtak hna lai lo. 16Mi nih a nupi kha a mak ah siseh, a kalter ah siseh, a cungah ṭhat lonak a tuah a si, tiah Israel Pathian, ralkapbu Bawipa nih a ti.
17Nan bia in Bawipa cu nan nor cang. Nan i thawh i, “Zeitindah kan nor?” nan ti. Ṭhat lonak a tuahtu vialte hna hi Bawipa mithmuh ah cun an ṭha ko i an cungah a lung aa lawm ko, nan tinak le, khuazei ah dah biading Pathian cu a um, nan tinak thawng hin nan nor cu a si.
Currently Selected:
MALAKHI 2: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006