2 SAMUEL 9
9
David Nih Mefibosheth Kha A Zaangfah
1Cun David nih, “Jonathan ruangah an cung i zaangfahnak ka langhter khawh nakhnga, Saul innchungkhar lakah khan a tangmi aho tal an um maw?” tiah a ti. #1Sam 20.15-17 2Cun Saul innchungkhar sinum pakhat a min Ziba a simi kha a um i amah cu David sinah cun an kawh; cun siangpahrang nih amah cu, “Nangmah cu Ziba na si maw?” tiah a ti. Anih nih, “Amah cu na salpa hi ka si,” tiah a ti. 3Cun siangpahrang nih, “Pathian zaangfahnak cu a cungah ka langhter khawh nakhnga, Saul innchungkhar chungin a um rihmi pakhat tal an um ti hnga lo maw?” tiah a ti. Ziba nih siangpahrang sinah cun, “Jonathan fapa pakhat a um rih; amah cu a ke a bei,” tiah a ti. #2Sam 4.4 4Siangpahrang nih cun amah cu, “Khuazei ah dah a um?” tiah a ti. Cun Ziba nih siangpahrang sinah cun, “Amah cu Lodebar ah Ammiel fapa Makhir inn ah a um ko,” tiah a ti. 5Cun David Siangpahrang nih mi a hei thlah hna i Lodebar i Ammiel fapa Makhir inn khan an va lak. 6Cun Saul fapa Jonathan i fapa Mefibosheth cu David sinah a ra i a kun i upatnak kha a pek. Cun David nih, “Mefibosheth,” tiah a ti. Cun anih nih, “Zohhmanh, na salpa hi,” tiah a leh. 7Cun David nih amah cu, “Na thinphang hlah; na pa Jonathan ruangah na cungah zaangfahnak kan hmuhsak lai i na pu Saul ram vialte kha kan khirh ṭhan lai; cun ka cabuai ah rawl na ei zungzal lai,” tiah a ti. 8Cun upatnak kha a tuah i, “Na salpa hi zeidah ka si i uico thi cia bantuk keimah hi na ka hramh?” tiah a ti.
9Cun siangpahrang nih Saul sinum Ziba kha a auh i, “Saul ta a simi thil vialte le a innchungkhar vialte ta a simi kha na bawipa i a fapa sinah hin ka pek cang. 10Cun nangmah le na fapa hna le na sinum hna nih amah vawlei cu nan thlawhpiak lai i na bawipa fapa hi cu ka cabuai ah rawl a ei zungzal lai,” tiah a ti. Ziba cu fapa hleinga le sinum pakul a ngei. 11Cun Ziba nih siangpahrang cu, “Siangpahrang ka bawipa nih a salpa a ka fial ningin, cu bantukin na salpa nih ka tuah dih lai,” tiah a ti. Cucaah Mefibosheth cu, siangpahrang fapa pakhat ve bantukin David cabuai ah khan rawl a ei. 12Cun Mefibosheth nih fapa note pakhat a ngei i a min cu Mika a si. Cun Ziba inn chung i khua a sami vialte kha Mefibosheth sinum ah an cang dih. 13Cuticun Mefibosheth cu Jerusalem ah a um; zeitintiah siangpahrang cabuai ah khan rawl a ei zungzal. Amah cu a ke a pahnih in a bei.
Currently Selected:
2 SAMUEL 9: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006