2 SAMUEL 8
8
David Nih A Ram A Kauh
(1Cha 18.1-17)
1Cun mah hnuah cun, David nih Filistin mi kha a tei hna i a tangchiah hna; Metheg-ammah kha Filistin mi hna kut chung khan a lak.
2Cun Moab kha a tei i tahnak hri in a tah hna i vawlei ah a ihter hna; tlang hnih cu thah awkin a tah i tlang khat cu pum tein zuah awkin a tah. Cun Moab mi cu David sal ah an cang i David sinah khan ngunkhuai an thawh.
3Cun David nih Zufrates tiva kha uk ṭhan awk i a kalpah ah Zobah siangpahrang Rehob fapa Hadadezer zong kha a tei. 4Cun David nih amah sin khan rangcung ralkap thong khat le za sarih le ke ralkap sang hnih a tlaih hna i David nih leng hnuktu rang vialte kha an tha a pheh dih hna, sihmanhsehlaw rangleng za khat ca i a za ding lawnglawng kha a nganh hna. 5Cun Damaskas khuami Siria mi nih khan Zobah siangpahrang Hadadezer kha bawmh awkah an rat tikah, David nih khan Siria mi cu sang hnih le thong hnih a rak thah hna. 6Cun David nih Damaskas khua chung i Aram ah khan ralvengtu ralkapbu a chiah hna i Siria mi cu David sal ah an cang i ngunkhuai kha an pek. Cun Bawipa nih David cu a kalnak kip ah khan teinak a pek lengmang. 7Cun Hadadezer sinum hna nih an i putmi sui phaw hna kha David nih a lak hna i Jerusalem ah a rak phorh hna. 8Cun Hadadezer khua a simi Betah le Berothai khan Siangpahrang David nih dar tampi a lak.
9Hamath siangpahrang Toi nih Hadadezer ralkapbu kha a ning piin David nih a tei dih hna ti kha a theih tikah, 10Hadadezer kha a doh i a tei caah amah cu va biakchawnh awk le va conglawmh awkah David Siangpahrang sinah khan a fapa Joram kha a hei thlah; zeitintiah Hadadezer nih khan Toi kha a rak doh lengmang tawn. Cun Joram nih ngun kheng le sui kheng le dar kheng kha a rak i phorh hna i. 11Mah hna zong cu Siangpahrang David nih Bawipa sinah a teimi miphun vialte hna sinin a lakmi sui le ngun hna he khan hmunkhat ah, a pekchanh hna; 12a teimi miphun hna cu Edom, Moab, Ammon mi, Filistin mi, Amalek mi le Zobah siangpahrang Rehob fapa Hadadezer kha an si.
13Cun David cu a min a thang ngaingai ko. A ra kir tikah Edom mi sang khat le thong riat cu Cite Nelrawn ah a thah hna. #Slm 60 (A tlangpi) 14Cun Edom ram chungah ralvengtu ralkapbu kha a chiah hna; Edom ram chungah a dihlak in ralvengtu ralkapbu kha a chiah hna i Edom mi vialte cu David sal ah an cang. Cun Bawipa nih David cu a kalnak kip ah teinak a pek lengmang.
David Bawi Hna
15Cucaah David nih Israel mi vialte cu a pen hna i David nih a mi vialte cu biading le ruannak in a uk hna. 16Cun Zeruiah fapa Joab cu ralkapbu haotu bik a si i Ahilud fapa Jehoshafat cu cazin ṭialtu a si; 17cun Ahilud fapa Zadok le Abiathar fapa Ahimelek cu tlangbawi an si i Seraiah cu caṭialtu a si; 18cun Jehoiada fapa Benaiah cu Khereth mi hna le Peleth mi hna cung i haotu a si i David fapa hna cu tlangbawi an si.
Currently Selected:
2 SAMUEL 8: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006