2 SAMUEL 7
7
Pathian Nih David Sinah Biakamnak A Ser
(1Cha 17.1-15)
1Cun siangpahrang cu amah inn ah a um i Bawipa nih a velchum i ral a ummi vialte hna lakin dinhnak a pek tikah, 2siangpahrang nih profet Nathan cu a thawh i, “Zohhmanh, kei cu sidar thing inn chungah ka um i sihmanhsehlaw Pathian kuang cu puan thlam chungah a um ko,” tiah a ti. 3Cun Nathan nih siangpahrang cu a thawh i, “Va kal law na lung chung i a ummi paoh cu va tuah ko, zeitintiah Bawipa cu na sinah a um,” tiah a ti.
4Sihmanhsehlaw cu zan ṭhiamṭhiam ah cun Bawipa bia cu Nathan sinah a ra i, 5“Va kal law ka sal David kha, ‘Bawipa nih hi bangin a ti: Ka umnak ding caah nangmah nih inn na ka sakpiak hnga maw? 6Israel mi kha Izipt ram in ka chuahpi hna ni thawk in nihin tiang, inn chungah ka um rih lo, sihmanhsehlaw ka umnak ca i puan thlam chungin kaa chawk lengmang ko. 7Israel mi vialte he kaa chawhnak hmun dihlak ah, ka mi Israel mi hna kha zohkhenh awk i nawl ka pekmi Israel mi biaceihtu hna aho sin tal ah, “Zeicahdah sidar inn na ka sakpiak lo?” tiah bia kaa khat tal ka chim maw?’ a ti tiah va chim. 8Cucaah atu cu ka sal David kha hi bangin na va chimh lai, ‘Hi bangin ralkapbu Bawipa nih a ti, nangmah cu ka mi Israel mi cungah bawi si awkah phong lak, tuu na zulhkhalh hnanak khan kan lak; 9cun khuazeika na kalnak hmanh ah nangmah sinah ka um i na hmai in na ral vialte kha ka hloh dih hna; cun vawlei cung i mi lianngan hna min bantukin min ngan kan serpiak lai. 10Cun ka mi Israel mi hna caah hmun pakhat ka tuah lai i anmah hmunte ah cun an um nakhnga le hnahnawh an si ti nakhnga lo, ka phun hna lai; 11hlan lio i ka mi hna cungah biaceihtu ka rak chiah hna caan bantuk khan, zaang en hmangmi hna nih an hrem ti hna lai lo; cun nangmah cu na ral vialte hna sinin dinhnak kan pek lai. Cu hleiah Bawipa nih nangmah cu Bawipa nih inn pakhat an serpiak lai, tiin an thanh. 12Cun na ni kha a tlin i na pupa hna sinah na ih tikah, nangmah pum chungin a chuak laimi na fapa cu nangmah hnuah a chan ka thawhter lai i a pennak kha ka fehter lai. #Slm 89.3-4; 132.11; Jhn 7.42; Lam 2.30 13Amah nih ka min caah inn pakhat a sak lai i a pennak bawi ṭhutdan cu zungzal in ka fehter lai. 14Keimah cu a pa ka si lai i amah cu ka fapa a si lai. ṭhat lonak a tuah tikah minung fung le minung fapa hna tuknak vual in ka chimhhrin lai; #Slm 89.26-27; 1Kor 6.18; Heb 1.5 15sihmanhsehlaw nangmah hmai in ka ṭhialmi Saul sinin ka lak bantuk khan a sinin a fekmi ka dawtnak cu ka la lai lo. 16Cun na inn le na pennak cu ka hmaiah a zungzal fek dingin ser a si lai; na bawi ṭhutdan cu zungzal in a hmun lai,’ a ti,” tiah a ti. #Slm 89.36-37 17Hi bia vialte ning le hi langhnak vialte ning hin, Nathan nih David kha a chimh.
18Khi tikah David cu a lut i Bawipa hmaiah a ṭhu i, “Maw Bawipa Pathian, keimah cu ahodah ka si i ka innchungkhar zong hi zeidah an si, hi tiang nangmah nih na ka hruai hi? 19Asinain mah hi cu nangmah mit ah cun maw Bawipa Pathian, a hmemi thil a si ko; caan saupi lio in na sal innchungkhar kong zong hi na rak chim chung cang i hmailei ciruang ding hna zong kha na ka hmuhsak cang, maw Bawipa Pathian! 20Cun David nih na sinah zei hlei dah a chim khawh ti lai? Zeitintiah, maw Bawipa Pathian, nangmah nih na sal cu na hngalh ko! 21Nangmah na biakamnak ruangah le nangmah na lung ning tein, hi lianngannak cu na sal kha hngalhter awkah nangmah nih na tuah cang. 22Cucaah nangmah cu na ngan ko, maw Bawipa Pathian; zeitintiah kannih nih kan hna in kan theihmi vialte ah nangmah bantuk an um lo i nangmah hleiah Pathian dang zeihmanh an um lo. 23Pathian nih amah mi si awk ca i tlanh awkah a kalhnawh hna i amah ca i min pakhat i ser i, amah mi hna hmai in miphun pakhat le cu miphun khuazing hna kha ṭhawl in annih cu thil lianngan le ṭihnung a tuahpiakmi hna, na mi Israel mi hna bantuk hi, vawlei cungah hin zei miphun tal an um ti maw? #Deu 4.34 24Na mi Israel cu zungzal in nangmah mi si awkah nangmah nih na caah na fehter i nangmah cu maw Bawipa, an Pathian ah na cang cang. 25Cun maw Bawipa Pathian, na sal le a innchungkhar kongah na rak chimmi bia kha atu cu zungzal ca in fehter ko law, na chim bang khan tuah ko; 26cun ‘Ralkapbu Bawipa cu Israel Pathian a si,’ tiin na min cu a zungzal in upat a si lai i, na sal David innchungkhar cu nangmah hmaiah fehter si ko seh. 27Zeitintiah maw ralkapbu Bawipa, Israel Pathian, nangmah nih hi phuannak cu na sal sinah, ‘Nangmah cu innchungkhar pakhat kan serpiak lai,’ tiin na rak ser cang; cucaah na sal nih nangmah sinah hi thlacamnak hi a cam ngam. 28Cucaah maw Bawipa Pathian, nangmah cu Pathian na si i na bia cu biatak an si i nangmah nih hi thil ṭha cu na sal kha na kamh cang; 29cucaah atu cu na salpa innchungkhar hi na hmaiah zungzal in a um nakhnga, thluachuahnak ka pekpiak ko sawh; zeitintiah maw Bawipa Pathian, nangmah nih na chim cang i na salpa innchungkhar cu nangmah thluachuahnak in thluachuah pek si zungzal ko seh,” tiah a ti.
Currently Selected:
2 SAMUEL 7: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006