2 SAMUEL 24
24
David Nih Israel Mi le Judah Mi A Rel Hna
(1Cha 21.1-27)
1Israel mi hna cungah Bawipa thinhunnak cu a alh ṭhan i, “Va kal law, Israel mi le Judah mi vialte kha va rel hna,” tiin David kha an cung i hnahnawhnak tuah awkah a lungthin a thawhter. 2Cucaah siangpahrang nih cun Joab le ralkapbu haotu a sin i a ummi hna kha a thawh hna i, “Israel phun dihlak chungah khan, Dan in Beersheba tiang, i chawk u law, mi kha va rel hna u, mi kha zeizat dah an si hngalh ka duh,” tiah a ti. 3Sihmanhsehlaw Joab nih siangpahrang cu a thawh i, “Bawipa na Pathian nih, siangpahrang ka bawipa nih a mit in a hmuh khawh lioah, atu i nak hin let za khat in mi cu chap ko hna seh; sihmanhsehlaw zeicahdah mah bantuk tuah hi siangpahrang ka bawipa nih hin na duh?” tiah a ti. 4Sihmanhsehlaw siangpahrang bia nih cun Joab le ralkapbu haotu hna cu a tei hna. Cucaah Joab le ralkapbu haotu hna cu mi kha rel awkah siangpahrang hmaika khan an chuak. 5Jordan tiva kha an tan i Aroer le Gad lei i a va kal i Jazer i a va lanmi nelrawn laifang i a ummi khua in an i thawk. 6Cun Gilead le Hit mi ram i a ummi Kadesh an phan; cun Dan an phan, cun Dan cun an i kual i Sidon an phan i 7Tair ralhruang le Hiv mi le Kanaan mi khua vialte kha an phan; cun Judah ram Negeb ah khan an vung kal i Beersheba tiang an kal. 8Cucaah annih nih ram vialte kha an ṭol dih hnuah Jerusalem ah khan thla kua le ni kul an rauh hnuah an ra phan. 9Cun Joab nih siangpahrang kha minung an relmi hna a zat cu a pek: Israel chungah phawnam tlai kho ralṭhami sing riat an um, cun Judah mi cu sing nga an si.
10Sihmanhsehlaw mi an rel dih hna hnuah khan David cu lung sivang in a um. Cun David nih Bawipa sinah cun, “Ka tuahmi ah hin fak piin ka sual cang. Sihmanhsehlaw, maw Bawipa, hruhnak piin ka tuah cang caah, na salpa ka ṭhat lonak hi ka hlohpiak ko sawh, tiah kan nawl,” tiah a ti. 11-12Bawipa nih David profet a simi Gad kha a thawh i, “Va kal law David cu, Bawipa nih i thim awk thil pathum ka pek, aa thimmi paoh cu ka tuah lai, a ti, tiah va chim,” a ti. A thaizing ah David cu a thawh hnuah khan 13Gad cu a sinah khan a va kal i Bawipa nih a chimhmi kha a va chimh i, “Zeidah naa thim lai? Na ram chung i kum thum mangṭam maw, na ral hna sinin thla thum zam maw, na ram chung i ni thum chung rai tlun dah? Cucaah i ruat law Bawipa sinah zei bialehnak dah ka kirpi lai ka chim tuah,” tiah a ti. 14Cun David nih Gad cu a thawh i, “Harnak nganpi chungah ka um; Bawipa kut chungah cun tla ko u sih, zeitintiah anih cu a zaangfahnak a ngan, sihmanhsehlaw minung kut chungah cun tla sawh hlah u sih,” tiah a ti.
15Cucaah Bawipa nih zingka khan a caan khiahmi tiang Israel mi cungah rai kha a tlunter i mi cu, Dan in Beersheba tiang, sang sarih an thi. 16Cun vancungmi nih khan hrawh awkah Jerusalem leiah a kut a hei samh tikah, ṭhat lonak kha Bawipa cu aa ngaichih i mi lak i rawhralnak a tuahtu vancungmi sinah khan, “A za cang, na kut kha ṭhum cang,” tiah a ti. Cun Bawipa vancungmi cu Jebus mi Araunah phuhri pawngah khan a um. 17Cun mi a that lentu vancungmi kha a hmuh tikah David nih Bawipa sinah bia a chim i, “Zohhmanh, ka sual cang i ṭhalo ngaiin ka tuah cang; sihmanhsehlaw hi tuu hna nih hin zeidah an tuah? Na kut cu keimah le ka pa innchungkhar cungah si ko seh, tiah kan nawl,” tiah a ti.
18Cun cu ni ah Gad cu David sinah a ra i amah cu, “Hung kal law, Jebus mi Araunah phuhri ah Bawipa caah biakṭheng hung ser tuah,” tiah a ti. 19Cucaah Gad bia ning cun David cu Bawipa nih nawl a pek bangin a hung kal. 20Cun Araunah nih khua a vun zoh i amah leiah siangpahrang le a sinum hna an rat kha a hmuh; cun Araunah cu a va chuak i vawlei lei hoih in siangpahrang cu upatnak a pek. 21Cun Araunah nih, “Zeicahdah siangpahrang ka bawipa cu a salpa keimah sinah hin na rat?” tiah a ti. David nih a thawh i, “Rai hi mi sinin a kian nakhnga, Bawipa sin i biakṭheng saknak caah na phuhri hi cawk awkah,” tiah a ti. 22Cun Araunah nih David cu, “Siangpahrang ka bawipa nih a ṭha a timi paoh i lak seh law, pechan ko seh; hika ah khangh thawinak caah cawtum an um, cun a thing caah rawl velhnak fung le cawtum hna hngawng kual thing an um. 23Mah vialte hi, maw siangpahrang, Araunah nih siangpahrang kan pek” tiah a ti. Cun Araunah nih siangpahrang cu, “Bawipa na Pathian nih in cohlang ko seh,” tiah a ti. 24Sihmanhsehlaw siangpahrang nih Araunah cu a thawh i, “Asilo, a man in kan cawk ko lai, zeicahtiah Bawipa ka Pathian sinah, a man zeihmanh ka liam lomi khangh thawinak cu ka pechan kho hna lai lo,” tiah a ti. Cucaah David nih phuhri le cawtum cu ngun shekel sawm nga in a cawk hna. 25Cun David nih khika ah Bawipa caah biakṭheng a ser i khangh thawinak hna le daihnak thawinak hna kha a pekchanh hna. Cucaah ram ca i nawlnak cu Bawipa nih a cohlan i Israel mi sinin rai cu a ṭian.
Currently Selected:
2 SAMUEL 24: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006