2 SAMUEL 10
10
Ammon Mi le Siria Mi Kha A Tei Hna
(1Cha 19.1-19)
1Cun mah hnuah cun Ammon mi hna siangpahrang cu a thi i a fapa Hanun nih amah hmun ah khan bawi a cang. 2Cun David nih a thawh i, “Nahash fapa Hanun hi a pa nih ka cungah zumhawktlak tein a rak um bantuk khan a cungah zumhawktlak tein ka um ve lai,” tiah a ti. Cucaah David nih a pa kong ah khan amah cu va hnemh awkah a sinum a hei thlah hna. Cun David sinum hna cu Ammon mi hna ram chungah khan an va phan. 3Sihmanhsehlaw Ammon mi an bawi hna nih khan an bawipa Hanun cu, “David nih nangmah sinah hnemtu a hun thlah hna caah hin na pa kha a upat tiin maw na ruah? David nih hin khua chung hi kawl awk le ngiatthlai awk le tei awkah a sinum hna hi a hun thlah hna, a si lo maw?” tiah an ti. 4Cucaah Hanun nih David sinum hna cu a lak hna i an khahmul a hnarcheu cio a meh hna i an khelbo zawn ah an puan cu a laifang in a tan hna i a kalter hna. 5Mah cucu David kha an chimh tikah anmah don awkah mi a hei thlah hna; zeitintiah an ning a zak ngaingai ko. Cun siangpahrang nih cun, “Nan khahmul a corh ṭhan hlan tiang Jeriko khua ah cam ko u, cun nan ra kir ṭhan te lai,” tiah a ti hna.
6Ammon mi hna nih annih cu David huat kan phor cang ti kha an theih tikah, Ammon mi hna nih cun mi an hei thlah hna i Beth-rehob i Siria mi hna le Zobah i Siria mi hna, ke ralkap sang hnih le Maakah ram siangpahrang le a mi thong khat, cun Tobram mi sang khat le thong hnih kha an i ruaih hna. 7Mah cucu David nih a theih tikah Joab le a ṭhawngmi ralkapbu vialte kha a thlah hna. 8Cun Ammon mi hna cu an ra chuak i hauka luhnak ah khan raldoh awkah an i tiang; cun Zobah le Rehob i Siria mi hna le Tob le Maakah mi hna cu anmah tein ramlak ah cun an um ve ko.
9Joab nih hmailei he hnulei he an ka tuk lai ti kha a hmuh tikah, Israel mi chungin thim khunmi a cheu kha a thim hna i Siria mi dohtu dingah khan a ningcang tein ṭan hmun a khuarter hna; 10cun a tang rihmi a mi hna cu a unau Abishai kut tangah a chiah hna i Ammon mi hna dohtu dingah khan a ningcang tein ṭan hmun a khuarter hna. 11Cun anih nih, “Siria mi hi ka caah an ṭhawn tuk ahcun na ka bawmh lai; sihmanhsehlaw Ammon mi hna kha na caah an ṭhawn tuk ahcun, ka ra lai i kan bawmh lai. 12Ralṭha ngaiin um tuah, cun kan mi hna le kan Pathian khua hna caah hin pasal si u sih; cun Bawipa nih a ṭha a tining paoh in tuah ko seh,” tiah a ti. 13Cucaah Joab le a sin i a ummi hna nih cun i tuk awkah Siria mi cu an hei fuh hna i an hmaiah cun an zam. 14Cun Ammon mi hna nih Siria mi an zam ti an hmuh tikah annih zong, cu bantukin Abishai hmai khan an zam ve i khua chungah khan an lut. Cun Joab cu Ammon mi he i tuknak khan a kir i Jerusalem ah a tlung.
15Sihmanhsehlaw Siria mi hna nih Israel mi nih an kan tei ti kha an hmuh tikah, hmunkhat ah an i pum ṭhan. 16Cun Hadadezer nih mi a hei thlah hna i Zufrates tiva ral i a ummi Siria mi hna kha an ratpi hna; Hadadezar ralkap phu ralbawi Shobak nih khan a hrui hna i Helam an ra phan. 17Mah cucu David kha an chimh tikah Israel mi vialte kha hmun khat ah a pumh hna i Jordan tiva kha an tan i Helam kha an phan. Cun Siria mi nih khan David doh awkah cun a ningcang tein ṭan hmun an rak khuar i amah he cun an i tu. 18Cun Siria mi cu Israel mi hna hmai in an zaam i David nih mi chungin rangleng za sarih aa citmi hna le rangcung ralkap sang li kha a thah hna i an ralkapbu ralbawi Shobak kha a hliam i cucaah cun khika ah a thi. 19Cun Hadadezer sal a simi siangpahrang vialte nih khan Israel mi nih an kan tei ti kha an hmuh tikah, Israel mi he cun remnak an ser i an kut tangmi ah an cang. Cucaah Siria mi nih Ammon mi hna bawmh kha an ngamh ti lo.
Currently Selected:
2 SAMUEL 10: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006