2 SIANGPAHRANG 7
7
1Sihmanhsehlaw Elisha nih a thawh i, “Bawipa bia hi thei tuah: hi bangin Bawipa nih, Thaizing atu tik hrawngah hin Samaria khua hauka ah hin changvut dip rel khat cu shekel pakhat ah, cun barli rel hnih cu shekel pakhat ah zuar a si lai, a ti,” tiah a ti. 2Cun siangpahrang nih a kut aa hngatchanmi ralbawi nih khan Pathian mi cu a thawh i, “Bawipa hrimhrim hmanh nih van ah khin thlalangawng hna a ser hmanh ah, mah thil hi a si kho hnga maw?” tiah a ti. Sihmanhsehlaw anih nih, “Na mit hrimhrim in na hmuh lai, sihmanhsehlaw a ei cu na ei lai lo” tiah a ti.
3Cun kutka luhnak ah cun mi pali an um i annih cu mithinghmui an si; cun pakhat le pakhat kha bia an i ruah i, “Zeicah hen mah kah hin kan thih tiangin kan ṭhut ko? 4‘Khua chungah lut u sih,’ tiah khua chungah cun mangṭam a um i khika ah kan thi ko lai; cun hika i kan ṭhut ko zongah, kan thi ṭhiamṭhiam lai. Cucaah cun ra u law, Siria mi hna riahhmun ah khan va kal u sih; kan nunnak kha an kan zuah a si le kan nung lai, cun an kan thah a si le kan va thi ko lai ta,” tiah an ti. 5Cucaah mui chupchap ah khin Siria mi hna riahhmun i va kal awkah cun an i thawh; sihmanhsehlaw Siria mi hna riahhmun tonter an va phanh tikah, zohhmanh, khika ah ahohmanh an rak um lo. 6Zeitintiah Bawipa nih Siria ralkapbu hna cu rangleng thawng le rang thawng le ralkapbu nganpi thawng kha a theihter hna i cucaah pakhat le pakhat cu, “Zohhmanh, Israel siangpahrang nih kanmah doh awkah Hit mi siangpahrang hna le Izipt mi siangpahrang hna kha aa ruaih ko hna hi ta,” tiah an i ti. 7Cucaah mui chupchap ah cun an zam i an riahbuk hna le an rang hna le an laa hna cu an lektak hna i an riahhmun cu a umning te khan an zamtak i annih cu an nunnak ruah ah an zam. 8Cun hi mithinghmui hna cu riahhmun tonter i an rat tikah khan, riahbuk pakhat chungah an lut i an ei i an ding i sui le ngun le hnipuan kha an i lak hna i an kal i an thuh hna; cun an ra ṭhan i riahbuk a dang pakhat chungah khan an lut i a chung thil cu an i kalpi hna i an kal i an va thuh hna.
9Khi tikah pakhat le pakhat cu, “Kan tuahmi hi a ding lo. Nihin hi thawng ṭha ni a si; kannih nih dai ziar in kan um i zinglei khua ceu kha kan ngan ahcun, dantatnak nih a kan phak lai; cucaah ra u law va kal u sih law siangpahrang innchungkhar kha va chim hna u sih,” tiah an ti. 10Cucaah an ra i khua kutka cawngtu kha an auh hna i, “Siria mi riahhmun ah kan va kal i zohhmanh, khika ah ahohmanh an rak um lo, minung thawng le thlam zeihmanh a leng lo, aa hrengmi rang hna le aa hrengmi laa hna le an umning tein a ummi riahbuk hna dah ti lo cu zeihmanh a um lo,” tiah an chimh hna. 11Khi tikah kutka vengtu hna cu an au i siangpahrang innchungkhar cu an va chimh hna. 12Cun siangpahrang cu zan ah cun a tho i a sinum hna cu, “Siria mi hna nih kannih an kan timhhnawhmi hi kan chimh tuah hna lai. Annih nih kan rawl a ṭam kha an hngalh; cucaah ramlak i i thuh awkah an riahhmun cun an chuak i annih nih, ‘Khua chung hin hung chuak ko rih hna seh law, a nung in kan tlaih hna lai i khua chungah cun kan lut lai,’ tiah an ruah,” tiah a ti. 13Cun a sinum pakhat nih a thawh i, “A tang rihmi rang hna lakah panga hi aho ho nih dik i kalpi hna seh law annih cu thlah hna u sih law zoh u sih; zeicahtiah hika i a tangmi hna zong hi Israel mi bu a ning piin a rawk cangmi bantuk kha pei an si ṭhiamṭhiam ko lai cu,” tiah a ti. 14Cucaah rangleng cittu mi pahnih an lak hna i siangpahrang nih, “Va kal u law va zoh u,” tiin, Siria ralkapbu kha va dawi awkah a thlah hna. 15Cucaah Jordan tiva tiang an dawi hna; cun zohhmanh, Siria mi nih an i hnawhsarenak ah an hlonh tami hnipuan hna le thilri hna kha lampi ah cun a thluangthluan in an ril liangluang ko. Cun lamkal hna cu an kir i siangpahrang kha an chimh.
16Khi tikah mi zapi cu an chuak i Siria mi riahhmun kha an va ramh. Cucaah changvut dip rel khat cu shekel pakhat ah zuarh a si i barli rel hnih cu shekel pakhat ah zuarh a si, Bawipa bia bang khan, 17Siangpahrang nih khan a kut aa bochanmi ralbawipa kha kutka cawngtu ah cun a thiah i, siangpahrang nih Pathian mi sinah a vung kal i anih nih a rak chimning khan, mi nih khan kutka ah cun an cil ciammam i a thi. 18Zeicahtiah Pathian mi nih siangpahrang sin i, “Thaizing atu tik hrawng ah hin, Samaria hauka ah, barli rel hnih cu shekel pakhat ah zuarh a si lai i changvut dip rel khat cu shekel pakhat ah zuarh a si lai,” tiin a rak chim tikah khan, 19ralbawipa nih cun Pathian mi kha, “Bawipa hrimhrim hmanh nih van ah khin thlalangawng a ser hna hmanh ah, mah bantuk thil cu a cang kho hnga maw?” tiah a rak leh. Cun anih nih a rak thawh i, “Na mit cun na hmuh sawk lai, sihmanhsehlaw a ei cu na ei lai lo,” a ti. 20Cucaah a cungah cu bantukin a tlung; mi nih khan kutka ah cun an cil ciammam i a thi.
Currently Selected:
2 SIANGPAHRANG 7: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006