2 SIANGPAHRANG 20
20
Hezekiah Zawtnak
(2Cha 32.24-26; Isa 38.1-8)
1Khi caan ah Hezekiah cu a zaw i a thi dengmang. Cun Amoz fapa profet Isaiah kha a sinah a ra i, “Hi bangin Bawipa nih, ‘Na innchungkhar kha a ningcang tein chia tuah; zeicahtiah na thi ko lai, na dam ṭhan lai lo,’ tiah a ti. 2Cun Hezekiah nih vampang leiah aa mer i Bawipa sinah thla a cam i, 3‘Maw Bawipa, zeitindah nangmah hmaiah zumhawktlak le lungcheubang loin ka kal tawn i nangmah mithmuh ah a ṭhami ka tuah kha na cinken nakhnga, kan nawl,” tiah a ti. Cun Hezekiah cu a ṭap thluahmah ko. 4Cun Isaiah cu a laifang tual khan a chuah hlanah khin Bawipa bia cu a sinah a ra i, 5“I let law ka mi hna bawi Hezekiah sinah cun, hi bangin Bawipa, na pu David Pathian nih, ‘Na thlacamnak kha ka theih i na mitthli kha ka hmuh; zohhmanh, kan damter lai; a ni thumnak ni ah Bawipa inn ah na hung kal lai. 6Cun na nunnak ah hin kum hleinga kan chap lai. Nangmah le hi khua cu Assiria siangpahrang kut chungin kan chuah hna lai i keimah ruang le ka sal David ruangah hi khua cu ka humhak lai,’ a ti tiah va chim,” tiah a ti. 7Cun Isaiah nih, “Theipi car hlum khat in rak pu u. Cun hei kalpi hna seh law, a dam ṭhan hnga, a hma cungah khan va chia hna seh,” tiah a ti.
8Cun Hezekiah nih Isaiah cu a thawh i, “Bawipa nih a ka damter lai i Bawipa inn ah a ni thumnak ah ka hung kal lai, tinak caah zeidah hmelchunhnak a si lai?” tiah a ti. 9Cun Isaiah nih, “Bawipa nih aa kam ciami cu a tuah lai i hmelchunhnak Bawipa sinin nangmah sinah a rami cu hihi a si: ni thladem hi hmailei ah maw kar hra a kal lai hnulei ah dah kar hra a kir lai?” tiah a ti. 10Cun Hezekiah nih a leh i, “Ni thladem caah cun kar hra hei sau deuh cu a fawimi thil a si ko, asinain ni thladem cu kar hra in kir deuh ko seh,” tiah a ti. 11Cun profet Isaiah nih Bawipa cu a auh i Ahaz ni tahnak ah a liam cangmi thladem kha kar hra a hnuh ṭhan.
Babilon Ram In Lamkaltu Hezekiah Nih A Rak Conglawmh Hna
(Isa 39.1-8)
12Khi caan ah Babilon siangpahrang Baladan fapa Merodak-baladan nih Hezekiah cu a zaw ti kha a rak theih caah lamkaltu hna cu ca le laksawng he a hei thlah hna. 13Cun Hezekiah nih a rak conglawmh hna i a ro inn vialte, ngun, sui, rimthawmi, a sungmi chiti, a ral hriamnam, a thil chiahnak inn hna chung i a ummi vialte kha a hmuhsak hna; a inn chung i a ummi siseh a ram chung i a ummi siseh, Hezekiah nih a hmuhsak lomi hna a um lo. 14Cun profet Isaiah cu Siangpahrang Hezekiah sinah a ra i, “Hi hna nih hin zeidah an chim? Cun khuazei in dah na sinah an rat?” tiah a ti. Cun Hezekiah nih, “Annih cu a hlatpi ram, Babilon in an ra,” tiah a ti. 15Anih nih, “Na inn chungah zeidah an hmuh?” tiah a ti. Hezekiah nih, “Ka inn chung i a ummi thil vialte cu an hmuh dih ko; ka thil chiahnak inn hna chung i a ummi thil ka hmuhsak hna lomi an um lo,” tiah a leh.
16Khi tikah Isaiah nih Hezekiah cu a thawh i, “Bawipa bia hi ngai tuah: 17Zohhmanh, na inn chung i a ummi thil vialte le nihin tiangin na pupa hna nih an khonmi thil hna cu Babilon i kalpi lai caan ni a ra lio; nganhtami thil zeihmanh a um lai lo, tiah Bawipa nih a ti. #2Sia 24.13-15; 2Cha 36.10; Dan 1.1-7 18Cun nangmah nih na hrinmi na fapa hna hrimhrim lakah hin a cheu cu kalpi an si lai i Babilon siangpahrang i a siangpahrang inn ah annih cu tilditmi an si lai,” tiah a ti. 19Khi tikah Hezekiah nih Isaiah cu, “Bawipa bia na chimmi cu a ṭha ko,” tiah a ti. Zeicahtiah, “Keimah chan chung i daihnak le himnak a um paoh ah zeidah?” tiah a ruah.
Hezekiah Thihnak
(2Cha 32.32-33)
20Hezekiah tuahsernak a tang rihmi le a ṭhawnnak vialte le zeitindah tili le tidong kha a ser i khuapi chungah ti kha a luhter ti kha, Judah Siangpahrang hna Chanrelnak Cauk chungah an i ṭial lo mei? 21Cun Hezekiah cu a pupa hna sinah a it i a fapa Manasseh cu amah hmun ah khan a hung bawi.
Currently Selected:
2 SIANGPAHRANG 20: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006