2 SIANGPAHRANG 12
12
Joash Pennak
(2Cha 24.1-27)
1Jehu a bawi kum sarihnak ah Joash cu bawi hram aa thawk i Jerusalem in kum sawm li a uk. A nu min cu Zibiah a si, Beersheba khuami a si. 2Tlangbawi Jehoiada nih a cawnpiak caah Joash nih a chan chung vialte Bawipa mithmuh i a dikmi kha a tuah. 3Asinain khuahrum bo hna kha an hrawk hna lo i khuahrum bo ah cun mi nih rai an thawi i zihmui an khangh ṭheo ko.
4Joash nih tlangbawi kha a thawh hna i, “Bawipa inn chungah rak putmi thil thiang man tangka vialte, ahohmanh cu zat cio na thawh awk a si tiin tuahpiakmi — cu zat cu nang na thawh awk a si ti i tuakpiak ciomi tangka — le lungtho tein Bawipa inn chungah ratpimi tangka kha, #Exo 30.11-16 5tlangbawi nih anmah le an hngalhtheihmi hna cio sin khan la hna seh; cun inn kha remh awk a herhnak zawn paoh remh hna seh,” tiah a ti. 6Sihmanhsehlaw Joash siangpahrang a bawi kum kul le kum thumnak tiangah tlangbawi nih inn kha khuazeihmanh an remh rih lo. 7Cucaah Joash Siangpahrang nih tlangbawi Jehoiada le tlangbawi dang kha a kawh hna i, “Zeicahdah inn kha nan remh hlei lo? Cucaah atu cu nan hawikom sinin tangka la ti hlah u, sihmanhsehlaw inn remhnak ah khan pe u,” tiah a ti hna. 8Cucaah tlangbawi hna nih khan mi sinin tangka lak ti loin annih nih inn kha remh lo cu an hna a tla.
9Khi tikah tlangbawi Jehoiada nih thingkuang pakhat a lak i a chin ah awng pakhat a vih i biakṭheng pawngah khan, Bawipa inn chung i vung luh tikah orhlei kamah khan a chiah; cun innleng a cawngtu tlangbawi hna nih khan Bawipa inn chung i rak putmi tangka vialte cu, cu chungah cun an sanh dih. 10Cun thingkuang chungah tangka tampi a um ti an hngalh fate, siangpahrang Caṭialtu le tlangbawi ngan kha an hung i Bawipa inn chungah an hmuhmi tangka cu an rel i sawngkhoi in an beo hna. 11Cun thlai ciami tangka cu Bawipa inn a zohkhenhtu rianṭuantu hna kut chungah cun an pek hna; cun annih nih Bawipa inn i rian a ṭuanmi lehtama le inn satu hna kha le 12lung remhtu hna le lung tantu hna kha an pek hna i Bawipa inn remhnak ding ca i thingah le khoihmi lung cawknak le inn remhnak ca i a herhmi paohpaoh ah khan an hman. 13Sihmanhsehlaw Bawipa inn caah cun ngun hmaihum le mei hmihnak le khengkuar le muko le sui umkheng paohpaoh le ngun umkheng paohpaoh cu, Bawipa inn chungah rak putmi tangka in ser a um lo, 14zeicahtiah mah tangka cu Bawipa inn a remhtu rianṭuantu hna kha pek an si. 15Rianṭuantu hna pek awkah an kut chungah tangka an pekmi hna cu zeitindah tangka kha nan hman tinak an hal ṭhan ti hna lo, zeicahtiah annih nih lihchim lo tein an tuah. 16Phungbuar thawinak tangka le sual thawinak tangka cu Bawipa inn chungah an luhpi hna lo; tlangbawi hna ta a si. #Lev 7.7
17Khi caan ah khan Siria siangpahrang Hazael cu a hung kal i Gath kha a tuk i a lak. Sihmanhsehlaw Jerusalem doh awk i hung kal aa timh tikah khan, 18Judah siangpahrang Joash nih a pupa Judah siangpahrang hna Jehoshafat le Jehoram le Ahaziah nih an rak pekchanhmi biakam thawinak vialte le amah biakam thawinak le Bawipa inn chung le siangpahrang inn rokuang chung i a ummi sui vialte kha a lak hna i Siria siangpahrang Hazael kha a kuat hna. Khi tikah Hazael nih Jerusalem cu a kaltak ṭhan.
19Joash tuahsernak a taang rihmi le a tuahmi vialte cu Judah siangpahrang hna Chanrelnak Cauk chungah an i ṭial lo mei? 20A sinum hna kha an tho i an rawi i Silla i vung kalnak lam i a ummi Millo inn ah khan Joash cu an thah. 21Amah kha a tu i a thattu hna cu a sinum Shimeath fapa Jozakar le Shomer fapa Jehozabad an si. David khua chungah a pupa hna sinah an vui i a fapa Amaziah cu amah hmun ah khan bawi a cang.
Currently Selected:
2 SIANGPAHRANG 12: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006