2 CHANRELNAK 35
35
Josiah Nih Lanhtak Puai A Tuah
(2Sia 23.21-23)
1Josiah nih Jerusalem ah Bawipa caah Lanhtak Puai a tuah i Lanhtak Puai tuufa cu thla khatnak thla ni hleili ni ah an thah. 2Tlangbawi hna cu anmahle an rian cio ah khan a thiah hna i Bawipa inn rianṭuannak ah cun a forh hna. 3Israel mi vialte kha a cawnpiak hna i Bawipa sinah a thiangmi Levi mi kha a thawh hna i, “Israel siangpahrang David fapa Solomon nih a sakmi inn chungah khan kuang thiang kha chia u, nan liang in nan i zawnh a hau ti lai lo. Atu cu Bawipa nan Pathian le a mi Israel mi an rian kha ṭuan tuah u. 4Israel siangpahrang David hmuhsaknak le a fapa Solomon hmuhsaknak kha zul in nan pale chung cio ning le nan bu nan i cheuning khan i tim tuah u. #2Cha 8.14 5Cun nan unau hna mi sawhsawh an pale innchungkhar bu ning cio khan nannih cu hmunthiang ah khan dir u law an bu cio caah cun Levi mi hna chung i an pale innchungkhar a cheuchum um cio hna seh. 6Cun Lanhtak tuufa kha that u law i thianh tuah u, Moses sinin Bawipa bia ningin tuah awkah nan unau hna kha timtuah hna u,” tiah a ti.
7Cun Josiah nih mi sawhsawh hna caah cun, a ummi vialte ca i Lanhtak Puai laksawng caah, a tuurun chungin tuufa le mehehfa sang thum le cawtum thong thum a thawh; mah hihi siangpahrang nih pumpak in a ngeih mi chungin an si. 8Cun a bawi hna nih khan mi zapi ca le tlangbawi ca le Levi mi hna caah lungtho tein an thawh ve. Pathian inn chung i a bawi bik pawl Hilkiah, Zekhariah le Jehiel nih Lanhtak Puai i pekchanh awk caah tlangbawi cu tuufa le mehehfa thong hnih le za ruk le cawtum za thum an pek hna. 9Levi mi lak i upa bik hna Konaniah le a unau Shemaiah le Nethanel, cun Hashabiah le Jeiel le Jozabad nih lanhtak puai i pekchanh awkah tuufa le mehehfa thong nga le cawtum za nga cu Levi mi kha an pek hna.
10Cun rianṭuannak cu timhtuah a si tikah, siangpahrang nawl peknak bangin, tlangbawi cu an hmun ah khan an dir i Levi mi cu an i ṭhenning khan an dir. 11Cun Lanhtak Puai tuufa kha an thah i tlangbawi nih khan an sinin an lakmi thisen cu an theh i Levi mi nih khan sa cu an phaw an hawh hna. 12Moses cauk chungah aa ṭial bangin, Bawipa sin i pekchanh awkah, mi sawhsawh pawl cu an pale innchungkhar ning in ṭhenmi bu ning khan phawt cio awkah, khangh thawinak hna kha cu a dang tein an chiah hna. Cu bantuk ṭhiamṭhiam in cawtum zong kha an tuah hna. 13Cun phunglam ningin lanhtak puai tuufa cu mei in an rawh; cun pekchanhmi thilthiang hna cu um le marlei le ukang in an chuan hna i mi sawhsawh pawl vialte kha khulrang in an pek hna. #Exo 12.8-9 14Cun a hnuah anmah ca le tlangbawi hna caah khan an timhtuah, zeicahtiah Aaron fapa hna tlangbawi hna kha khangh thawinak le a thau hna kha pekchanhnak ah khan zanṭim tiang an hna a hnawk; cucaah cun Levi mi hna nih anmah ca le tlangbawi hna ca i an timhtuahnak cu a si. 15Cun David le Asaf le Heman le siangpahrang i a hmutu Jeduthun hna nawl peknak bangin, hlasatu, Asaf fapale hna cu an hmun ah khan an um; cun kutka cawngtu hna kha kutka ah cun an um cio; an unau Levi mi hna nih an timhtuahpiak hna caah an rianṭuannak khan an kal ta a herh lo. #1Cha 25.1
16Cucaah Siangpahrang Josiah nawl peknak bangin, lanhtak puai cu tuah awk le Bawipa biakṭheng cung i khangh thawi-nak pekchanh awkah Bawipa rianṭuannak ca i thil vialte cu khi ni ah timh dih a si. 17Cun Israel mi a ummi hna nih cun khi caan ah Lanhtak Puai kha an tuah i thilnu telhlo changreu puai kha ni sarih an tuah. #Exo 12.1-20 18Profet Samuel chan hnuah cun cu bantuk cun Lanhtak Puai kha tuah a si bal ti lo; Josiah le tlangbawi hna le Levi mi hna le cuka i a ummi Judah ram mi le Israel ram mi vialte le Jerusalem khuami hna nih an tuahmi Lanhtak Puai bantuk cu Israel siangpahrang ahohmanh nih an tuah bal lo. 19Hi Lanhtak Puai cu Josiah a bawi kum hleiriat kum ah tuah a si.
Josiah Thihnak
(2Sia 23.28-30)
20Hi thil vialte hnuah, Josiah nih biaknak inn cu a timhtuah dih tikah khan, Zufrates tiva i a ummi Karkhemish khua i i doh awkah Izipt siangpahrang Neko cu a hung kal i Josiah nih a rak chuahhnawh. 21Sihmanhsehlaw a sinah lamkaltu a hei thlah hna i, “Judah siangpahrang, nangmah le keimah cu zeidah kan i ti awk a um? Nihin ah hin nangmah doh awkah ka ra lo, sihmanhsehlaw atu i a ka raltu innchungkhar he doh awkah ka ra; cun Pathian nih i khulranh tuah tiin nawl a ka pek. Ka sin i a ummi Pathian doh cu ngol tuah, zeicahtiah an hrawh sual lai,’ tiah a ti. 22Asinain Josiah nih hrial cu a duh lo i amah he i doh awkah cun a mui aa hleng. Pathian kaa chungin a chuakmi bia Neko bia cu a ngai lo i Megiddo nelrawn i i tuk awkah khan a kal. 23Cun thalkah thiam hna nih Siangpahrang Josiah kha an kah i siangpahrang nih cun a sinum hna cu, “Ṭhalo tein an ka hliam caah ka kalpi u,” tiah a ti hna. 24Cucaah a sinum hna nih cun rangleng chung khan an chuah i a rangleng pahnihnak in Jerusalem ah an tlunpi. Cun a thi i a pupa hna thlan ah khan an vui. Cun Judah mi dihlak le Jerusalem mi dihlak nih khan Josiah kha an ṭah. 25Jeremiah zong nih ṭah hla a lawh i hlasak thiammi pa vialte le nu vialte nih nihin tiang hin Josiah cu an hla ah an cuanter. Mah hihi Israel mi lakah phunglam ah an ser hna; zohhmanh, Ṭah Hla chungah an i ṭial. 26Josiah tuahsernak a tang rihmi hna, Bawipa phungbia ah aa ṭial ningin a tuahmi tuahsernak ṭha hna le 27a thil tuahmi hna, a hramthawk le a donghnak hna zong, zohhmanh Israel le Judah Siangpahrang hna Cauk chungah an i ṭial.
Currently Selected:
2 CHANRELNAK 35: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006