2 CHANRELNAK 11
11
1Rehoboam cu Jerusalem ah a rat tikah, Judah le Benjamin innchungkhar chung khan ralkap thim ciammammi sang riat kha. Rehoboam pennak lak ṭhan awk ca i Israel mi doh awkah khan a pumh hna. 2Sihmanhsehlaw Pathian mi Shemaiah sinah khan Bawipa bia a ra i, 3“Judah siangpahrang Rehoboam, Solomon fapa le Judah le Benjamin ram chung i a ummi Israel mi vialte sinah khan, 4‘Hi bangin Bawipa nih, Nan hung kal awk a si lai lo i nan unau Israel mi cu a doh zong nan hung do hna lai lo. Hi thil cu keimah sinin a rami a si caah nan inn cio ah kir dih u, a ti,’ tiah va chim,” tiah a ti. Cucaah Bawipa bia cu an ngaih i an kir i Jeroboam cu an doh lo.
Rehoboam Hunchonak
5Rehoboam cu Jerusalem ah a um i i vennak caah Judah ram chungah khua a ser hna. 6Bethlehem, Etam, Tekoa, 7Beth-zur, Soko, Adullam, 8Gath, Mareshah, Zif, 9Adoraim, Lakhish, Azekah, 10Zorah, Aijalon, le Hebron khua hna kha a ser hna, annih cu Judah le Benjamin ram chung i kulhnak a ngeimi khua an si. 11An ralhruang hna cu fek tein an ser hna i an chungah ralbawi hna le rawl khonmi hna le chiti le mitsur hang a chiah hna. 12Cun khua kip ah khan phaw le fei a chiah hna i khua fek ngaingai ah a ser hna. Cucaah Judah le Benjamin ram cu a co hna.
13Cun Israel ram dihnak ah a ummi tlangbawi hna le Levi mi hna nih khan amah cu an umnak hmun kip khan an fuh cio. 14Levi mi hna nih an i hrawmmi ram hna le an thilri kha an kaltak hna, zeicahtiah Jeroboam le a fapale hna nih khan Bawipa tlangbawi rian an ṭuannak khan an dawi hna i 15a sermi khuahrum bo hna le mehehtum hna ca le cawfa hna caah khan amah a fapale hna kha tlangbawi ah a ser hna. #1Sia 12.31 16Cun Bawipa, Israel Pathian kha kawl awkah a lung in aa seh chihmi hna nih cun, Bawipa, an pupa hna Pathian sin i raithawi awkah khan Israel phun vialte chungin annih cu an zulh hna. 17Judah pennak cu an fehter i Solomon fapa Rehoboam cu kum thum chung an himter, zeicahtiah annih nih kum thum chung cu David le Solomon lam kha an zulh.
18Rehoboam nih Mahalath kha nupi ah a ṭhit, amah cu David fapa Jerimoth le Jesse fapa Eliab i fanu Abihail i an fanu a si; 19cun fapa a hrinpiak hna: Jeush, Shemariah le Zaham an si. 20Amah hnuah cun Absalom fanu Maakah kha a ṭhit i Abijah, Attai, Ziza le Shelomith a hrin hna. 21Rehoboam nih Absalom fanu Maakah cu a nupi dang hna le a nuchun vialte hna lakah a dawt bik (nupi hleiriat le nuchun sawm ruk a ngei i fapa kul le pariat le fanu sawm ruk a ngeih hna); 22Rehoboam nih Maakah fapa Abijah cu siangpahrang i ser awkah a timh caah, a unau hna lak i amah changtu dingah a ser. 23Fim tein khua a khan i Judah le Benjamin ram chung i a ummi kulhnak a ngeimi khua ah khan a fapale hna cu a ṭhenṭhek dih hna; cun tirawl tlamtling tein a pek hna i nupi tampi a ṭhitpiak cio hna.
Currently Selected:
2 CHANRELNAK 11: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006