1 SIANGPAHRANG 14
14
Ahijah Nih Jeroboam A Chimhchung
1Khi caan ah Jeroboam fapa Abijah kha a zaw. 2Cun Jeroboam nih a nupi kha a thawh i, “Tho law, Jeroboam nupi na si kha hngalh lo dingin i hleng law, Shiloh ah va kal tuah; zohhmanh, khika ah profet Ahijah kha a um, amah cu keimah kha, hi mi hna cungah siangpahrang na si lai, a ka titu kha a si. 3Cun changreu tlang hra, changreu thlum tlawmpal le khuaihliti thawl khat in i phorh law amah sinah cun va kal tuah; amah nih ngakchia hi zeitindah a um lai kha a rak in chimh lai,” tiah a ti.
4Jeroboam nupi nih cu bang cun a tuah; a tho i Shiloh ah a kal i Ahijah inn kha a va phan. Ahijah cu khua a hmu kho ti lo, zeicahtiah a kum a upa cang i a mit khua a hmu ti lo. 5Cun Bawipa nih Ahijah cu a thawh i, “Zohhmanh, Jeroboam nupi cu nangmah kha a fapa kong hal awkah na sinah a ra lio; zeitintiah amah cu a zaw. Amah cu hitin na rak chimh lai,” tiah a ti.
A rat tikah nu dang bantuk aa siter. 6Sihmanhsehlaw innka i a vung luh i ke thawng kha Ahijah nih a theih tikah, “Rung lut tuah, Jeroboam nupi; zeicahdah midang bantuk naa siter? Zeitintiah nangmah ca i thawng chia ngai chim awk kha fial ka si. 7Va kal law Jeroboam kha, ‘Hi bangin Bawipa, Israel Pathian nih, “Nangmah cu mi zapi hna lakin kan hlorh i ka mi Israel mi hna hruaitu ah kan ser i 8David innchungkhar sinin pennak kha ka thleh i nangmah kha kan pek; asinain, ka nawlbia kha a ul hna i a lung dihlak in a ka zul i ka mithmuh ah a dingmi lawng a tuahtu ka sal David bantuk kha nang cu na si lo, 9nang tu nih cun na hlan i a rak ummi vialte hna nakin thil ṭhalo na tuah deuh i pathian dang le thletmi milem kha na ser hna, ka thin na ka phawh i na hnulei ah na ka hlonh; 10cucaah zohhmanh, Jeroboam innchungkhar cungah ṭhat lonak ka tlunter lai i Jeroboam sin hin pa paohpaoh, Israel mi chung i miluat si hna seh, miluat lo si hna seh, ka hloh hna lai i, mi nih ek cu an khangh hirhiar bangin, Jeroboam innchungkhar cu ka khangh cikcek hna lai. #1Sia 15.29 11Jeroboam chungkhar a simi paoh khuapi chungah a thimi cu uico nih an ei lai; ramlak i a thimi cu van i a zuangmi va nih an ei lai, zeicahtiah Bawipa nih a chim cang,” a ti,” tiah va chim. 12Cucaah tho law na inn ah va kal tuah. Na ke nih khua chung a lamh ah khin ngakchia cu a thi lai. 13Cun Israel mi vialte nih an ṭah lai i an vui lai; zeitintiah Jeroboam chungkhat hna lakah amah lawnglawng hi thlan ah vui a si lai; zeicahtiah Jeroboam chungkhar chungah hin amah ah hin cun Bawipa, Israel Pathian i a ṭha a timi thil zeimaw a um. 14Cuhleiah nihin ah Jeroboam innchungkhar a hloral ding Israel mi siangpahrang pakhat Bawipa nih aa serh lai. Cun hi hnuah cun, 15ti chungah phaikung aa hninh lengmang bantuk khin Bawipa nih Israel cu a tuk lai i annih nih an Asherim an i ser hnanak thawngin Bawipa kha a thin an hunter caah, an pupa hna sinah a pekmi hi ram ṭha chung hin Israel mi cu a phawi hna lai i Zufrates tiva ral ah khin a ṭhek hna lai. 16Cun Israel mi cu, Jeroboam amah sualnak ruang le Jeroboam nih Israel mi a sualter hnanak ruangah khan, a hlawt hna lai,” tiah a ti.
17Cun Jeroboam nupi cu a tho i a kal i Tirzah khua kha a phan. Cun cu inn innka hram a va phak tikah ngakchia kha a thi. 18Cun Bawipa nih a sal profet Ahijah in a chimmi bia ning khan Israel mi vialte nih an vui i an ṭah. 19Jeroboam tuahsernak a tang rihmi, zeitindah ral a tuk ti tehna, zeitindah a pen ti tehna cu, zohhmanh, Israel Siangpahrang hna Chanrelnak Cauk chungah an i ṭial. 20Cun Jeroboam nih a pen chung cu kum kul le kum hnih a si; a pupa hna sinah khan a it i a fapa Nadab kha amah hmun ah cun a hung bawi.
Rehoboam Pennak
(2Cha 12.1-16)
21Cun Solomon fapa Rehoboam nih khan Judah ram cu a pen. Pen hram aa thawk ah khan Rehoboam cu kum sawm li le kum khat a si i, Bawipa nih Israel mi phun vialte chungin amah min chiahnak caah aa thimmi Jerusalem khua ah khan kum hleisarih a bawi. A nu min cu Naamah a si, Ammon minu a si. 22Cun Judah mi nih Bawipa mithmuh i a ṭha lomi thil kha an tuah i an pupa hna nih an tuahmi vialte nakin tam deuh in an tuahmi sualnak cun Bawipa cu a nahchuahnak an thawhter. 23Zeitintiah annih zong nih khuahrum bo tehna, lungphun tehna, Asherim tehna kha tlang sang kip cung le thinghring tang kip ah an i ser i #2Sia 17.9-10 24cu ram chungah biaknak lei pa hlawhhlang zong an um. Israel mi hna hmai in Bawipa nih a ṭhawlmi miphun hna nih an tuahmi fihnung vialte kha an tuah ve. #Deu 23.17
25Siangpahrang Rehoboam, siangpahrang a si a kum nganak ah Izipt siangpahrang Shishak nih Jerusalem kha a hung doh; 26Bawipa inn chung rothil le siangpahrang inn chung rothil kha a lak hna; zeizong vialte kha a lak dih hna. Solomon nih a sermi sui phaw vialte zong kha a lak hna i #1Sia 10.16-17; 2Cha 9.15-16 27Siangpahrang Rehoboam nih anmah can ah cun dar phaw a ser hna i siangpahrang inn innka a cawngtu ralkap bawi hna kut chungah khan a chiah hna. 28Cun siangpahrang nih Bawipa inn chungah a luh fate, ralvengtu nih khan an i put hna i ralvengtu hna khaan ah khan an rak chiah ṭhan tawn hna.
29Rehoboam tuahsernak a tang rihmi le a tuahmi vialte cu Judah Siangpahrang hna Chanrelnak Cauk chungah an i ṭial lo mei? 30Cun Rehoboam le Jeroboam karlak ah khan ral a um thluangthluan. 31Cun Rehoboam cu a pupa hna sinah khan a it i David khua chungah khan a pupa hna sinah cun an vui. A nu min cu Naamah a si, amah cu Ammon minu a si. Cun a fapa Abijam kha amah hmun ah cun a hung bawi.
Currently Selected:
1 SIANGPAHRANG 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006