Nahum 1
1
1Hi thu in Nineveh taw kisai thu hi a, Elkosh khua mi Nahum ii mukholna thu khat tepteena ahi hi. #Is 10:5-34; 14:24-27; Zep 2:13-15
Nineveh tungah Topa ii Thin uukna
2 Topa Pathian in ama a demte
kuama dual ngawl hi;
ama in ama a nalhte daan pia hi.
A thin uukna taw amate thuk kik hi.
3 Topa thin uuk papaih ngawl a,
ahihang ama vaanglian in
a maw a khial te daan pia ngawlin
tha thong ngeingawl hi.
Topa paina munah
vuipi suangval va a;
meeite sia a peang taw a sina pan
a leang leivui khute ahi hi!
4Ama in tuipi thupia a,
tuasia kang hi!
Ama in ngunte kosak ngiungeu hi.
Bashan lote vulin,
Carmel mual sia ang a,
tuaciang Lebanon paakte vul hi.
5 Topa mai ah mualpite
liingin kektham a;
ama mai ah mualnote
tuitham hi.
Topa a kilangh ciang
leitung kilok a;
leitung le a mite theampo
liing hi.
6Ama a thin uuk ciang
akua nungta zo lai tu ziam?
A lauhuai mama a thinsona ah
akua nungta zo nawn tu ziam?
A thin uukna meikuang tha suk a;
suangte tamhthamin ama ii mai ah leivui suak hi.
7 Topa pha hi;
ngimna hun sungah a mite sungsia hi;
Ama kung a zuante ama in keamthiam hi.
8Tuipawm lian khat bangin
a ngalte sucip a;
ama a nalhte
thina thuaksak hi.
9 Topa langpan in
bang vawt sawm nu ziam?
Ama in no hong susia tu hi.
Kuama in khatvei kaan ama nalh ngawl hi.
10Lingngui kivialte le
taangphaw ko bangin
no zukhamte hong kihaltum tu hi!
11Nineveh awng, ngitlo vai vive a tum, Topa langpan a sawm khat na kung pan hong pai hi. 12Hisia in Israel a mite tungah Topa ii cina hi; “Assyria te hat in mihing tam napi amate kisusia a bo tu hi. Ka mite awng, note kong thuaksak a, ahizong tuabangin kong vawt kik buatu hi. 13Tu in note tungah Assyria vaangletna ka bosak tu a, hong heenna thikkhaute ka sutan tu hi,” ci hi.
14Hisia in Assyria te taw kisai Topa thutanna hi: “Amate min a zomto tu in suan le paal nei ngawl tu hi. Amate ii pathiante biakinnte sungah a om milimte ka susia tu hi. Assyria te atu in thaankuul khat ka vawtkhol tu hi — amate a nungta tu in kilawm ngawl uh hi,” ci hi.
15En vun, thupha puak kamtai khat mualtung tawnin hong pai hi! Ama in zawna taangko tu in hong pai ahi hi! Judah mite awng, na poaipi khaam vun a, Pathian tungah ciliap huai takin, na kamciam sate pia vun. Mi ngilote in na ngam uh hong sim ngei nawn ngawl tu hi. Amate kisusia diipdeap zo hi!#Is 52:7
Currently Selected:
Nahum 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016