Malachi 1
1
1Hisia in Malachi ii Israel mite tungah a son tu Topa ii a piak thupuak ahi hi.
Topa ii Israel te A itna
2 Topa in a mite tungah, “No kong it tawntung hi,” ci hi. #Rom 9:13
Ahihang amate in, “Bangbangin nong itna hong lak kana ni ziam?” ci in zo kik hi. #Is 34:5-17; 63:1-6; Jer 49:7-22; Eze 25:12-14; 35:1-15; Amo 1:11-12; Oba 1-14
Topa in, “Esau le Jacob te sia unau laipee ahihang Jacob le a suan a paalte ka it a, 3tuaciang Esau le a suan a paalte ka ngaimaw hi. Esau ii mualtung ngam ka susia a, a leitang sia ngiate atu in ka nusiat hi,” ci in zo hi.
4Esau suan le paal Edom te in, “Ka khuate hong suksiatsak hi, ahihang tua khuate ka sa kik tu uh hi,” a ci ciang Topa in, “Khua sa kik ma hen — ka nuaitham kik tu hi. Mipite in tuate tungah, ‘Siatna ngam’ le ‘Topa ii a tawntung a thin uukna ngam’ a ci tu hi,” ci in zo kik tu hi.
5Israel mite in hite a mittang uh taw mu tu a, tuaciang amate in, “Israel ngam puasia ngawngawn ah Topa thahat hi,” ci tu uh hi.
Topa in Thiampite Teih
6Vaanglianbelpa Topa in thiampite tungah, “Tapa khat in a pa thasia a, innteang khat in a topa zakta hi. Keima sia na pa ka hi a — banghangin hong patoai ngawl nu ziam? Keima sia na topa khi hi — banghang hong zakta ngawl nu ziam? Note in kei hong zawngsak napi, ‘Bangbangin hong zawngsak khu ziam?’ na ci lai uh hi. 7Bangbang ziam cile hi bang hi — ka biaknatau tungah a man nei ngawl ante nong pia uh hi. Tua zawkciang note in, “Bangbangin hong zakta ngawl khu ziam, ci in nong dongh uh hi. Hong son tong — ka biaknatau na zawnsak vawtna, na thusim ngawlna taw nong zatak ngawlna uh kilangh hi. 8A mittaw, a ciina, ahibuale a peangbai nganno taw sangaw biakpiakna nong nei uh ciang, tuabangte phamaw sa ngawl na hi uh ziam? Ngamukmangpa tungah tuabang ngannote pia ka sin vun. Note tungah ama lungkimin maipha hong pia tu ziam?” ci hi. #Thkna 15:21
9Tu in no thiampite awng, ei tungah Pathian hong dik natu in hong ngen ka sin vun. Ama in na thungetna hong zo ngawl tu a, tua in noma mawna hi tu hi. 10Vaanglianbelpa Topa in, “Ka biaknatau tungah a kimang ngawl meite na hal ngawl natu in note khat in biakinn kongkhate khak le uh teh kong oai hi. No tungah ka lungkim ngawl a; kei kung nong paipui biakpiaknate kong saang buatu hi. 11Leimong khat pan mong khat ah a om mihingte in kei hong patoai uh hi. Amate in mun theampo ah ngimnamtui hong hal a, tuaciang a saan thamman sangaw biakpiaknate hong pia hi. Amate theampo in kei hong patoai uh hi! 12Ahizong note in keima biaknatau sia bangma man nei ngawlin na son uh ciang le tua biaknatau tungah na nialnamh ante na piak uh ciangin, keima hong simmaw na hi uh hi. 13Noma in, ‘Hite bangza in cimtak huai ziam!’ ci in nong mukmen uh hi. Nong biakpiak natu in a kingu nganno ahibuale a peangbai, a nanghno khat nong paipui uh hi. Note tung pan tuabangte hong saang tu in hong um nu ziam? 14A nganhon sung pan keima piak tu in hong kamciam a limci khat nei napi, a man nei ngawl nganno khat taw sangaw biakpiakna nei tu in hong theampa in haamsiatna thuak tahen! Banghang ziam cile keima kumpi lian khat ka hi a, ngam theampo pan mihingte in kei hong kiita uh hi,” ci hi.
Currently Selected:
Malachi 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016