2 Timothy 1
1
1Christ Jesus taw kikop a, ih nei hong kikamciam nuntakna a thangsak tu in Pathian ii deina taw a kisawl Christ Jesus sawltakpa Paul in,
2Ka it ka tapa Timothy tungah lai kong thaak hi: #Sawl 16:1
Ih Pa Pathian le ih Topa Christ Jesus in thuthiamna, hesuakna le thinnopna hong pia tahen.
Lungdamkona le Hanthotna
3Ka taanghpupite ii sep bangin thinsung thiangtho taw a na ka sepsak Pathian tungah lungdam ka ko hi. Sun taw zan taw ka thungetna sungah nang kong phawk a, ama tungah lungdam ka ko hi. 4Na thituite ka phawk a, tua ahikom, ka lungdamna a kicin natu in, nang kong mu nuam mama hi. 5Na pi Lois le na nu Eunice te zongh ii a nei bang a na nei thintak upna sia ka phawk hi. Nang zongh tuabang ma in nei tu ni hi ci in kong muang tatak hi. #Sawl 16:1 6Hi thu hu in, na tungah khut kong ngak ciang Pathian hong piak tel sia na nuntaksak natu in kong phawksak hi. 7Banghang ziam cile Pathian hong piak Thaa in eite hong lauthauhsak bua hi; tua hizaw ngawlin, a Thaa in vaangletna, itna le eima le eima ki uk zawkna taw hong kidimsak hi.
8Tua ahikom, Topa atu tetti panna ah maizum heak in, Christ atu in thongtaakpa kei atu zonghin maizum heak in. Tua hi zaw ngawlin Pathian nasep natu thahatna hong piak bangin, Lungdamna Thupha atu thuakna sungah na kihel in. 9Ama in ama aituam mihingte ih sua natu in eite hong hun a, hong sam hi; eite ii sepnate hang hi ngawlin, ama tupna le thuthiamna hang ahi hi. Hun kipat ma in ama in Christ Jesus tungtawnin hi thuthiamna hong pia hi, 10ahihang tu in ih Hunpa Christ Jesus hong paina tungtawnin tua thu hong kilak hi. Ama in thina vaangletna bosak zo a, tuabangin lungdamna thu tungtawnin thimawk nuntakna hong lak zo hi.
11Lungdamna Thupha a thangsak tu le a hil tu in, Pathian in sawltak panmun kei hong suanh a, #1 Tim 2:7 12tuaciangin hi thu hu in hite ka thuak hi. Ahihang thinmuanna taw ka kidim nginge lai hi, banghang ziam cile ka uppa ka he a, ama in kei hong muang a hong aapsa teng sia tua Ni dong ama in hong kepcingsak thei tu ci in ka he hi. 13Thumaan kammal kong hilte na kholet in a, na zui tu etteena in nei in, tuaciangin Christ Jesus taw kikopna sungah, eite aa ahi upna le ki itna sungah na kip in. 14Ih sungah hong teang Thaa Thiangtho vaangletna tungtawnin, nang tungah, hong kimuang a hong ki aap naphate keamcing in.
15Phygelus le Hermogenes kihelin, Asia ngammi theampo ii kei hong taisat siat sia na he hi. 16Topa in Onesiphorus innkuan sungah hesuakna tungsak tahen, banghang ziam cile tamvei ma ka thin hong nuamsak hi. Thonginn sungah ka om sia, ama in hong maizumpui ngawl a, 17Rome khua a thet po ciangin hong mu dawdong hong zong hi. 18Tua Ni ciangin Topa in ama tungah hesuakna pia tahen. Ephesus khua ah zongh, kei atu in ama in bangza in hong seam ci sia na heak mama ahi hi.
Currently Selected:
2 Timothy 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016