YIIEM DOE 1
1
Krax Kham Geu Veng Yerusaliem
1Veng pa hoik naog ot pui ka in dix, yam in lai ngawm ti ot yiien yawg nong nong yuh ka mawx! Nawh pa hoik sax ting sax lhaong ka daux sinax ceu pui khankix ka in dix, yam in lai hoik awm miexmai yuh ka mawx! Laux simiang daux sinax haktiex ku meung ka in dix, yam in hoik lih ti mawh siliex heue. 2Nawh yiiem sigrien sigre ka daux ponsawm, rawm ngai nawh khankix lih ka piang sibax nawh, sinax daux paox moh nawh, pa tawx krax nyawm rhawm ka nawh ang lai koe tix kaux kawx heue. Paox grawm paox gru nawh khawmuik hoik yuh krax pie lhen ka nawh, kix hoik lih ti mawh pui koeng nawh heue. 3Pui Yudax hoik yaox ti kham krax pa kha rhawm mai kham krax pa cau tix daux kaing pa nu sigrien sigre, nawh ot ka daux sinax ceu pui tang meung khankix mai nawh ang lai yaox krax pa laux lee tix, can pui pa hawt leue khaix nawh khawmuik, krup nawh ka dee sikhawp krax heue. 4Daux krax hu veng Zion khankix koe krax pa khi rhawm, kheu jao ang pui tix kaux kawx hoek ti sang yuh pawie krax pa singax singeh heue. Siviex veng nawh khankix mawh pa hoik yiien, cao giex kaing li nawh khankix hoik ngia ngheeik, bunkrih nawh khankix mawh pa hoik kham krax laux rhawm mai nawh kawx mawh pa yaox ti kham krax laux rhawm pa kied lang teung heue. 5Pui koeng nawh khankix hoik deeh mawh cao simiang nawh, pui khoi nawh khankix koe krax haok huan mai Siyiex hoik kieh nawh kha rhawm tix kheu jao kied nie haoh hun krax pa lud yuh nawh heue. Kawn praix nawh khankix hoik yaox ti hu ka daux krax pa giex laung pui koeng heue. 6Min sire kawn bun veng Zion hoik grai hu khawmuik heue. Kawn simiang nawh khankix hoik awm cak pa ang yaox ka rib dee sawm tix maix pa to ti hu daux pa ang ti koe riang koe rao, sivoe pui pa pheet ti hawt khaix nawh heue. 7Ka daux yam koe krax kha rhawm veng Yerusaliem mai yam vung vang nawh mai nawh deeh doh keud ka ceu pa nyawm rhawm tix khawmuik, ka pa hoik pon nawh ti koe daux baux tawm taix pui pa koeng, pui pa sang teem ka nawh ang lai koe pie tix kaux kawx, pui koeng hoik yaox mai hoik nyiah ka nawh heue. 8Veng Yerusaliem hoik kied ting lud tom nie, mawh kheu nan, nawh hoik mawh ceu pa seeing heue. Can pui pa nab yam ka nawh khawmuik, deeh koe krax pa salao ka nawh, kheu jao yaox kix ang nawh ceep kraung heue. Mawh heue, tokaux nawh hoik ngia ngheeik mai deeh veeh ti hu plak khaix heue. 9Krax pa seeing nawh hoik koe ka piang sibex dhah nawh heue. Nawh ang lai keud ka dee sidah ju tix, mawh kheu nan, krax pa laux leeing nawh hoik mawh pa daox am pui ka mai nawh ang lai koe cao pa tawx krax nyawm rhawm pie tix kaux kawx heue. Siyiex eue, jhak ka krax pa kha rhawm aux liak! Mawh kheu pui koeng hoik tang yaw tokaux cao tix heue. 10Pui koeng khankix tang nyeu taix tix tud rhim ka ceu pa koe nawh khankix heue. Nawh hoik yaox ka laig ceu pui khankix ka dah dee pa singax singeh nawh, ka pui ankix pa hoik tawm Maix Cao ti deuh, son ang kix pon ti laig ka daux bang pui hun Maix Cao heue. 11Pui nawh koe krax ngia krax ngheeik, kix sawg ka pa ih, kix hoik loh pa ih ka kraung khrai tix mai sonsang taoh ka ju tix heue. Siyiex eue, jhak ti yaox liak! Grawh grawng nawh, aux mawh pa hoik pon krax pa salao pui heue. 12Pex khawmuik pa tiang ti hu hawt baoh an khankix eue, mawh ang an saux ka rhawm pex lie? Jhak ti yaox liak! ceu pa awm krax pa laux rhawm lauxrhi aux koe ang koe lie? Ka pa hoik dawg hoek ka piang aux mai ka pa kieh Siyiex aux kha rhawm tix, ka daux singaix kied song rhawm song rhi Nawh Cao heue. 13Khaing ka plak piang, Nawh Cao hoik ploi ngu laig ka daux si-ang aux khankix mai an hoik kheem ti pex ka aux heue. Nawh Cao hoik taong ti deuh kie son sideeing caong aux mai kieh aux deeh veeh tix ing taug mao leeing lang singaix heue. 14Khaox glawm krax pa lud aux hoik mawh pa phyawk tix ka khaing taix Nawh Cao, ankix hoik mawh pa vung viien tix vien tau mai sau nawh hoek ka piang ngawg aux, Nawh Cao hoik kieh riang rao aux yawm hu, Siyiex hoik ap aux ka daux tawm taix, pui ankix pa ang aux pon tiebtie heue. 15Siyiex hoik dig pui pa kied ting riang ting rao khankix pa ot ka daux sigreung aux, Nawh Cao hoik kok cub pui hun tix cub hoek tuktiak ka aux, sonsang kleeig pui awn ju aux khankix phawng heue. Siyiex hoik biiet bunkrih Yudax awm biiet rawm plix siiet heue. 16Kheu jao grawng ceu inkix aux yiiem mai ngai aux hoik lih rawm ngai, grawh grawng nawh, cao pa tawx krax nyawm rhawm pa tak sang deeh taoh ti teei ju aux, mawh pa kied singai khaing aux heue. Kawn praix aux khankix hoik voi, mawh kheu hoik pex pui koeng heue. 17Kawn bun Zion yaog taix tix mai pui pa sang tawx krax nyawm rhawm nawh ang koe heue. Siyiex hoik tawm ti deuh lox ka son grawng Yakop, ka tak sang mawh pui pa ot hawt vung viang nawh khankix pui koeng nawh, mai veng Yerusaliem hoik mawh ceu pa ang singax ka daux sinax kix heue. 18Siyiex mawh pa rahsee heue. Grawh grawng nawh, aux hoik lheu ka gumlox pingnyap Nawh heue. Pui khawmuik eue, nghiet heue. Mai jhak ka krax pa kha aux rhawm tix, bunkrih aux mai pui awn ju aux khankix hoik kham ka krax pa giex laung tix hu heue. 19“Aux kok yo ka pui pa moh aux khankix, viang mawh nan, kix hoik pie lhen ka aux heue. Cao giex kaing li mai kuad song aux khankix, hoik dud rhawm ka daux veng, glang yam sawg kix pa ih sonsang deeh taoh ju tix heue.” 20“Siyiex eue, jhak aux liak! Aux mawh pa kha rhawm mai daux vaig daux tu aux hoik ru raox, rhawm aux mawh pa hoik lukliak ka daux aux heue. Mawh kheu aux hoik mawh pui pa kied ting lud, ka plak praix koe vaig lawm sang teei aux yum, ka daux nyiex mawh pa awm krax yum heue. 21Kix hoik mhong lox pa ngia ngheeik aux, pui pa sang tawx krax nyawm rhawm ang lai koe ka son aux heue. Pui koeng aux khawmuik hoik mhong ka grawng krax pa kha rhawm aux mai kix koe krax gaux rhawm ka hoik yuh Maix Cao ka ankix heue. Kieh singaix krax pa hoik pao Maix Cao ti deuh hoek liak! Sonsang pon kix tix awm aux heue.” 22Kieh krax pa caox caig yuh kix hoek ka plak sivoe Maix Cao khawmuik mai yuh ka piang kix awm pa hoik yuh Maix Cao ka aux, kheu jao krax pa lud aux khankix khawmuik heue. Grawh grawng nawh, krax pa ngia ngheeik aux khankix koe tom nie mai rhawm aux hoik kied koe krax laux rhawm heue.
Currently Selected:
YIIEM DOE 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012