HABAKUK 1
1
Lox Kok Yo Cao Jhai Khankix
1Grawng riang susai pa hoik yaox cao jhai Habakuk, 2Nawh ah nin Siyiex eue, aux kok yo ka Maix mai Maix Cao ang mhong kawn sang rheung miex grheung lie? Aux kok yo ka Maix kheu yaox krax pa kied kin mai Maix Cao ang taoh ka aux, kawn sang rheung miex grheung lie? 3Maix Cao lai jhi aux yaox krax pa lud yuh ka mawx? Maix Cao yaox krax kha rhawm aux lai ang jhak yuh ka mawx lie? Krax pa tud rhim mai krax pa kin koe ka plak sivoe aux, krax pa thung thiang mai krax pa simah simiang kawx koe heue. 4Mawh kheu nan, gumlox beenli hoik bhaw hu mai ceu pa rahsee ang lai pon jhi lih sidawng heue. Grawh grawng nawh, pui ang rahsee hoik lai lawm pui pa rahsee, mawh kheu nan, krax prawng ca pa ang mawh ang meh lih ti koe heue.
Lox Pa Deeh Pawk Siyiex
5Jhak ti yaox ka daux sinax ceu pui tang ceu khankix mai koe krax pa kied daox deng kah liak! Grawh grawng nawh, aux tak sang yuh kaing tix ceu ka daux baux singaix pex khankix, viang hoik koe pui pa krai ka pex kawx pex ang lai yum rhawm ka heue.#Cau 13:41 6Grawh grawng nawh Aux hoik yaog pui Khaladie kaoh, #2Sim 24:2 pa mawh ceu pui pa kied lang teung mai pa kied phai, pa yaog ti hu tah ka daux haktiex, sonsang teei ti cie dee ot dee koe khankix, pa ang tie mawh cie kix heue. 7Kix mawh pui pa kied kin mai pa kied koe krax lhat kah, krax prawng ca kix mai krax koe min pakngai kix, hoik mawh pa tang yuh lih khaing tokaux kix heue. 8Brung kix nie lheu phai khaing sivai maox mai nie lheu kin khaing sox la pa lih plak ponsawm heue. Pui naing brung kix liu brung hoek khaing dee singai, kix pu ti hoek awm klang krih pa ki sang ih heue. 9Kix khawmuik hoek sonsang yuh krax pa kin kha rhawm, pakngai kix mawh pa hoik veeh ti hu sivoe awm bhaung pa phlu ti hoek khaing plak lih singaix, kix kraix khrawm pui pa giex laung khankix awm mhaik heue. 10Kix salao ka simiang mai nyiah ka simiang khankix, kix ngia ka dee pa kaux cong ankix kudah, grawh grawng nawh, kix pum ti deuh lon tiex mai rhim ti teei heue. 11Khaix an, bhaung tah kix luan, mawh kheu koe phimap kix mai nawh deuh sibrawm tix mawh Siyiex tix heue.
Lox Chawk Cao Jhai Bawg Ra
12Siyiex leeing ju pa mawh Siyiex aux, Cao pa singax singeh aux eue, mawh ang Maix mawh pa koe tom ju dix lie? Ex tak ang lai yaox ti yum kah heue. Siyiex eue, Maix hoik tat ti deuh kix mawh son pa prawng carang ting eue, Maix hoik yuh ti deuh kix mawh son pa sivied ti sidiex heue. 13Ngai Maix mawh pa singax ang pon jhak ka ceu pa ang rahsee mai ang pon jhak ka ceu pa lud vao, Maix jhak ka pui ankix pa yuh kaing ceu pa ang kaux sijax, Maix lai yawg tix yuh ka mawx? Yam bleet pui pa ang rahsee ka pui pa nie koe krax pa rahsee khaing tix, Maix lai ang nye yuh ka mawx lie? 14Maix kieh pui khankix awm kax pa koe daux rawm sigrit sigra mai awm ceu pa mu ti hu piang tiex khankix pa ang koe cao pa kwang yuh ka mawx lie? 15Nawh miiet kix haok khawmuik ka miiet, nawh giex kix ka rub mai teei rub bluh kix tau khawmuik, mawh kheu nan, nawh koe krax gaux rhawm mai koe krax nyawm rhawm kah heue. 16Mawh kheu nan, nawh appong ti tan ka rub mai gleeing ti tan nyawng bhawng ka rub heue. Grawh grawng nawh, khaing ceu inkix, nawh pon ti cie pa kied koe ngawh koe jum mai pa ih pa kied kluing kied bee heue. 17Mawh kheu nan, nawh khex sang yi yuh rub tix mai sang pah ceu pui khankix yum ang jud mai krax pa ang tix lhawk kah lie?
Currently Selected:
HABAKUK 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012