EZARAX 1
1
Sidah Sidu Giex Laung Khaing Babulon
1Ka daux num jah Kurux simiang haktiex Pasha tix kwang ka haktiex, sonsang grum naog gumlox#Ye 25:11, 29:10 pa hoik krai Siyiex khaing daux jheeh Yeramix, Siyiex hoik so rhawm simiang haktiex Pasha mai kieh nawh krai pao daux meung haktiex nawh kudah dee mai hoik tiem daux lai krai ah nin, 2Sairat simiang haktiex Pasha ah nin, “Siyiex piang raoma hoik tawx meung haktiex can pa koe khawmuik ka aux heue. Nawh Cao hoik tawx lox ka aux, sonsang sum aux nyiex bwan son Nawh Cao tix lhang ka daux veng Yerusaliem#Isa 44:28 ka daux haktiex Yudax heue. 3Ka daux pex mawh pui mawx pa mawh pui Nawh Cao kieh Siyiex ot mai nawh, kieh haok hu ka veng Yerusaliem ka daux haktiex Yudax mai sum nyiex bwan Siyiex ceu pui Isarelax Siyiex pa ot ka daux veng Yerusaliem mawh Siyiex heue. 4Can pui pa kawn deuk kudah dee ka dee peung pan nawh tix ot tivud ticu khankix, kieh pui khankix teem ka mau mai khri, khawm tobrie tix khankix ka nawh, lheu khaing krax tan pa koe khawm rhawm nawh tix tan khankix son nyiex bwan Siyiex daux veng Yerusaliem heue. 5Khaix an cao kaing nyiex ma cub pui Yudax mai Binyamin khankix mai cao giex kaing li pui Lewix khankix mai can pui pa hoik so Siyiex rhawm kix khawmuik, yaog tix kaox hu sonsang sum nyiex bwan Siyiex ka daux veng Yerusaliem heue. 6Pui pa ot hawt rawb rim kix khawmuik mai teem tawx kraung mau kraung khri khankix, khawm kraung khrai mai tobrie pa koe ngawh jum tix khankix lheu khaing can pa koe rhawm kix ti tan heue. 7Simiang Sairat teei kraung shiao khankix khaing nyiex bwan Siyiex, pa hoik rhim simiang Nebukhaneza ti teei khaing veng Yerusaliem mai pa hoik priex ti deuh ka daux nyiex bwan siyiex cie tix, 8mai Sairat simiang haktiex Pasha hoik teei ankix lih khaing daux taix Midaredat pa mawh cao priex kraung mai simin tix tawx ka cao kaing pui Yudax Sheshabaza heue. 9In mawh kraung shiao khankix, klong khri tixngoe mu, klong mau tix rheng mu mai vaig mau tixnga dim kre, 10pan khri tixngoe mu, pan mau pon yieh kao mu mai kraung shiao tang ceu khankix tix rheng ceu heue. 11Can kraung mau kraung khri khawmuik hoik koe phwan rheng pon yieh mai tixgliah dim ceu, Sheshabaza hoik teei kraung shiao ceu inkix khawmuik tau mai pui pa giex laung khankix khaing veng Babulon ing ka veng Yerusaliem heue.
Currently Selected:
EZARAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012