EFESUX 1
1
Lox Nawb Bwan
1Pawlux pa mawh kawncau pa ting Yesux Khrit kheu alo Siyiex, tawx ka pui pa singax pa ot ka daux veng Efesux #Cau 18:19-21, 19:1 mai ka pui pa kaux sijax ka daux Yesux Khrit heue. 2Kieh pex koe bwanson, pa nhim pa kaoh khaing Keeing ex Siyiex mai Simiang Yesux Khrit heue.
Bwan Plak Khuan Daux Cao Khrit
3Kieh keeing Siyiex mai Simiang ex Yesux Khrit ting bwanson, pa hoik tawx bwanson pa dex mai khuan ku ceu ka ex ka meung raoma daux Cao Khrit, 4awm hoik laug Nawh Cao ti teei ex daux Cao Khrit, tom ka sang jah ti kaw haktiex, sonsang mawh ex pa singax, pa ang koe dee cha pa loig sivoe Nawh ka daux krax moh, 5hoik grux ciak ti kieh ex mawh kawn tokaux Nawh Cao, kheu Yesux Khrit, awm pa khaw caw mai alo Nawh, 6sonsang yaogyaw min pakngai bwanson Nawh pa hoik yuh bwanson ti tawx ka ex ka daux kawn pa moh Nawh, 7pa hoik pon ex krax taoh kah, kheu nham Nawh, sonsang pon ex pa pluat phimap awm pa khaw#Kaw 1:14 mai bwanson pa mi pa koe Nawh, 8pa hoik kieh Nawh koe tom nie, plak ex ka daux pingnya mai daux krax tawng, 9yam kieh ex tawng alo Nawh pa hoik mox kah, awm pa khaw mai alo Nawh pa hoik bak yiak ti kieh mawh daux Khrit, 10yam hoik naog bawg yam khankix, ti kraix khrawm kieh grum kuceu khawmuik, can ceu pa koe piang raoma mai can ceu pa koe ka piang haktiex li mawh tix mu khaing ka daux Khrit. Pa ah aux, mawh ka daux Nawh heue. 11Pa hoik kieh ex mawh sin, kheu hoik ciak ti deuh ex awm pa khaw mai pa hoik bak yiak, kaw pa yuh kuceu khawmuik hawt alo pa keud tix, 12son ex pa hoik keud pot jun pot ka daux Cao Khrit ka sivoe paox tix, sang mawh son pa yaogyaw min pakngai Nawh heue. 13Ka daux Nawh kawx, pex hoik mhong gum lox pa mawh meh, pa mawh lox bwan gaux rhawm pa dex mai krax taoh pex mai kheu hoik yum rhawm ka daux Nawh, hoik tawk cum ka pex ka Khuan Singax pa dex mai lox sijax mukheu heue. 14Khuan an mawh gawng ka grawng sin ex, tom bawg yam sang taoh Nawh Cao cie tokaux tix, sonsang yaogyaw min pakngai Nawh heue.
Rawg Bwan Tawx Rhawm Pingnya
15Kheu hoik mhong aux grawng krax yum rhawm pa koe pex ka daux Simiang Yesux mai krax moh pa koe pex ka pui singax khawmuik, 16aux tom yaogyaw bwanson, son pex ang jud ang jai mai simawd pex ka daux pa rawg bwan, 17Siyiex ex Yesux Khrit, pa mawh Keeing min pakngai, tak tawx rhawm pa koe pingnya pa chix keud chix doh, ka daux krax tawng yung ka Nawh Cao, 18sonsang kieh ngai rhawm rhi pex riang, sang tawng pex pa keud pot jun pot pa hoik kok Nawh pex ka, mawh pa yuh ka mawx, grawng sin pa sang pon Nawh Cao ka daux pui singax khankix ting miex ding, 19siawp sibrawm pa kied ting Nawh, ka plak ex pa yum rhawm ting miex ding, awm pa khaw mai pa yuh siawp sibrawm pa ting riang Nawh an, 20pa yuh Nawh daux Cao Khrit, yam kieh Nawh Cao Khrit deeh kaoh im khaing krax yum mai kieh Nawh ngawm plak taix khawn dawm Nawh Cao ka#Yaog 110:1daux raoma, 21kied ting ka piang ceu pa giex kaing, pa koe min pakngai, siawp sibrawm mai simiang haktiex, can ceu kaux ku ceu pa hoik kok kah, ang joeng mawh ngie ka ju haktiex in, viang mawh nan khawm daux ju pa tak sang hoek phao khaix khawmuik heue. 22Nawh Cao hoik teei ti deuh kuceu khawmuik ka greem caong Nawh #Yaog 8:6mai tawx ti kieh Nawh mawh Kaing ka piang ku ceu khawmuik ka daux ceu cao, 23pa mawh tokaux Nawh, #Kaw 1:18 pa grum naog Kaw pa kieh grum naog ku ceu khawmuik heue.
Currently Selected:
EFESUX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012