KAWNCAU 1
1
Teei Yesux Haok Raoma
1Thawphilux eue,#Luk 1:1-4 lai pa hoik tiiem aux phao ka, mawh grawng pa jah Yesux ti yuh mhai grawng pa gau Nawh khawmuik, 2Tom sidah hoek singaix pa rieb ti teei Nawh Cao haok, khaix hoik tawm Nawh lox ka daux Khuan Singax, ka kawncau pa ting Nawh khankix, pa hoik laug Nawh ti teei heue. 3Ka kix kawx Nawh Cao jhi yaox tokaux pa im tix, khaix hoik geu Nawh ti yum, ka daux mhai rug pa mawh meh tom nie mai kieh kix yaox tokaux tix, ka daux tixpon ngaix mai krai grawng ceu pa dex dawd mai Meung Siyiex heue. 4Yam khrawm Nawh Cao tau mai kix, Nawh tawm lox ka kix son ang kix sang lih khaing veng Yerusaliem, krox tom hoik pon, awm lox mukheu pa tawx Keeing Cao,#Luk 24:49 pa ah Nawh, “Hoik mhong pex ka Aux. 5Grawh grawng nawh Yohan cubcom ka rawm tete heue, viang mawh nan, khaix in ang awt rheung miex ngaix tix, pex tak sang cubcom ka daux Khuan Singax heue.”#Mat 3:11; Mak 1:8; Luk 3:16; Yo 1:33 6Mawh kheu nan, yam hoik khrawm kix paox tix, kix chawk Nawh Cao ah nin, “Simiang eue, Maix sang deeh tawx meung ka pui Isarelax yam in lie?” 7Nawh Cao deeh ah nin ka kix, “Bawg yam khankix pa hoik ciak Keeing Cao ti deuh, daux sibrawm tokaux tix, ang mawh pa sang tawx pex tawng. 8Viang mawh nan pex tak sang pon sibrawm, yam hoik hoek Khuan Singax Singeh piang pex mai pex tak sang mawh pui pa kham mhai rug son Aux, jah ka veng Yerusaliem khawm meung Yudax khawmuik mai meung Samarix mai hoek tom dee sidah haktiex heue.”#Mat 28:19; Mak 16:15; Luk 24:47-48 9Khaix hoik krai Nawh Cao ceu an khankix, yam kawn jhak kix, teei Nawh Cao haok mai paiawm rieb ti teei Nawh khaing dee chix yaox kix.#Mak 16:19; Luk 24:50-51 10Yam kawn maong kix ti jeung ka raoma, jhak heue, pui ra kaux pa ceep kraung pa paing cung liep kix, 11pa ah nin, “Pui Galilie khankix eue, pex cung ti jhak ka raoma yuh ka mawx? Yesux in, pa hoik rieb ti teei haok ka daux meung raoma khaing pex, tak sang deeh hoek, awm yaox pex Nawh haok hu ka daux meung raoma heue.”
Matthix Plud Yudax
12Yam an kix deeh khaing gawng pa kok mawh Sanlun, pa dex ka veng Yerusaliem, pa singai krax singaix twah, tix singaix heue. 13Yam hoik laig kix tan, kix haok daux lawg plak piang, dee ot kix, khawm Petrux, Yohan, Yakop, Andare, Philipux, Thomax, Bathawlamie mai Mathiex, Yakop kawn Alaphie mai Simon Zelot mai Yudax pux Yakop heue.#Mat 10:2-4; Mak 3:16-19; Luk 6:14-16 14Kix khawmuik ih rhawm paox tix, nied ti rawg bwan, tau mai bun khankix, khawm Marix miex Yesux mai pux Nawh Cao khankix heue. 15Ka daux ngaix bawg yam an, Petrux kaoh cung sinax puxaik khankix, pui pa khrawm ti tan dex koe tiyieh tixnga kaux mai nawh ah nin, 16“Puxaik khankix eue, lox Phuk lai singang khri, pa hoik krai Khuan Singax Singeh ka jheeh Davit grawng Yudax, pa thong kix pa hoik hu giex Yesux, phan ang naog ang doh pon heue. 17Grawh grawng nawh, hoik simin nawh tau ka daux ex mai nawh hoik pon ti yuh kaing cao sidiex gau in, pa mawh son cie tix heue. 18Pui in teei ngawh riang phimap ceu pa hoik yuh tix mai liag haktiex ti dah mai nawh goh gup kaing tix mai vaig nawh bih mai kraung vaig nawh glhua khawmuik heue. 19Pui pa ot ka daux veng Yerusaliem khawmuik tawng grawng an, tom hawt ka daux lox kix kok haktiex an mawh, Akeladamax, pa ah nan sang ah “Haktiex Nham” heue.#Mat 27:3-8) 20Mawh kheu hoik tiiem ka daux phuk lai Yaogyaw ah nin, “Kieh yuh dee ot nawh yi, ang koe tidtix mai paw kieh pui ot tan tix kaux kawx,”#Yaog 69:25 mai “Kaing pa giex nawh kieh pui tang kaux teei heue.”#Yaog 109:8 21“Mawh kheu nan ka daux pui khankix pa hoik rom tau mai ex, yam ot Simiang Yesux ti lai ling tau mai ex, glang gleeing ku bawg yam, 22jah ka yam cubcom Nawh mai Yohan,#Mat 3:16; Mak 1:9; Luk 3:21tom sidah hoek singaix, yam rieb ti teei Nawh haok khaing ex.#Mak 16:19; Luk 24:51Ka daux kix tix kaux tak lai mawh, pui kham mhai rug tau mai ex, grawng pa kaoh Nawh Cao khaing krax yum heue.” 23Kix laug ra kaux pa mawh Yosiep, pa kok mawh Basabax, ceu kaux ru nawh mawh Yusatu mai Matthix heue. 24Kix rawg bwan ah nin, “Simiang eue, Maix pa tawng rhawm kawn pui khawmuik, ka daux kiex ra kaux pa hoik laug Maix, mawh kaw pa yuh ka mawx jhi ex yaox liak. 25Sonsang kieh nawh teei kaing cao sidiex cao gau in mai sonsang yuh kawncau pa ting, ka dee hoik rau hoik gwieh Yudax, yuh ka mawx sonsang pon hu nawh ti ot dee ot cie tix heue.” 26Kix nieb ti yaox grawng kiex mai caw ka Matthix heue. Simin nawh tau mai kawncau pa ting kao tix kaux an heue.
Currently Selected:
KAWNCAU 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012