1 TIMOSE 1
1
Lox Nawb Bwan
1Pawlux pa mawh kawncau pa ting Yesux Khrit, kheu pa nhie Siyiex Cao Taoh ex mai Yesux Khrit pa mawh ceu pa keud pot jun pot ex, 2tawx ka Timose,#Cau 16:1pa mawh kawn aux tete ka daux krax yum rhawm heue. Kieh koe bwanson, pa caux rhawm mai pa nhim pa kaoh khaing Siyiex, Keeing Cao mai Simiang ex Yesux Khrit liak.
Tawx Satix Ka Pui Gau Pa Tang Siyox
3Awm khyox khaw aux ti nhie maix kawn baox ot ka daux veng Efesux yam hu aux ka meung Makedonix, sonsang gau maix ka pui tix blah, son ang kix sang gau ceu pa gau pa tang pa siyox, 4son ang sang nghiet ka lox been pa ang tie mawh mai ka grawng doeh ru pa ang jud ang jai khankix, pa nie kieh thung thiang paox tix, khaing grawh grawng pa yuh ceu pa hoik een Siyiex rhawm kah, pa koe ka daux krax yum rhawm heue. 5Dee sidah lox tawm an, mawh krax moh, pa lih kaoh khaing rhawm rhi pa singax singeh, dee chix keud chix tawng pa mhawm, krax yum rhawm pa mawh meh heue. 6Ka grawng ceu an khankix tix blah hoik via hoik lud hu ka daux pa sikah lox giex going. 7Kix simie ti mawh sara cao gau lox lai beenli, viang kix ang tawng grawng pa ah tix mai ceu pa dhua kix mawh pa nie mawh heue. 8Ex tawng grawh grawng lox lai beenli mawh pa mhawm, phan pui chix shiao awm pa caw pa khaw mai been, 9mai een ti tawng grawh grawng lox lai beenli ang mawh pa hoik yuh son pui rahsee, mawh son pui pa ang hawt beenli mai pa ang chix cu chix nghiet, son pui pa ang nab ang yam pa yuh ceu pa ang khaw ka Siyiex, pui ting map, son pui pa ang singax singeh son pui pa ang chix nab chix yam son pui pa tap toi miex keeing tix khankix, son pui pa pah pui yum, 10son pui pa phit vao, son pui pa phit vao ka paox simex tix, son pui pa briex pui, son pui pie lhen, son pui pa kham mhai ruk pa ang mawh ang meh, tang ceu can pa ang caw ka lox ceu pa gau, pa mawh pa meh, 11pa khaw ka lox bwan gaux rhawm pa ting min plakngai cie Siyiex pa ting bwanson, pa hoik tawx hoik pong ka aux heue.
Yaogyaw Ka Bwanson Siyiex
12Aux yaogyaw bwanson Nawh Cao, pa mawh Simiang ex Yesux Khrit, pa hoik kieh aux koe riang rao heue. Mawh kheu hoik sawn Nawh aux mawh pa kaux sijax mai ciak ti kieh aux yuh kaing jhaw Nawh, 13viang aux hoik mawh, pui pa salao ka Siyiex, pui pa tuktiak tukte, pui pa nieb pon yuh pa ang cee ang cak glang ka in kawx heue.#Cau 8:3, 9:4-5 Aux hoik pon krax caux rhawm mawh kheu hoik yuh aux khankix kheu ang tix tawng, ka daux pa ang yum rhawm heue. 14Bwanson Simiang Siyiex ex kied ting kied nie tau mai krax yum rhawm mai krax moh pa koe ka daux Yesux Khrit heue. 15Lox in mawh pa kaux sijax mai pa keung ti rieb ti teei khawmuik, pa ah, “Yesux Khrit hoek ka piang haktiex sonsang taoh pui phimap khankix,” mai aux mawh kun pui phimap heue. 16Mawh kheu in aux hoik pon bwanson pa caux rhawm, sonsang plak jhi Yesux Khrit ceu pa lang gun lang yeung Nawh Cao ka daux aux pa mawh kun pui phimap, sonsang mawh mhai son pui pa tak sang yum rhawm ka Nawh Cao tom pon ju leeing ju khaix in sax heue. 17Yam in kieh Simiang leeing ju, pa ang chix laux chix yum mai pa ang chix yaox ka ngai, pa mawh Siyiex tix kaux khaing, koe krax yung yi mai min pakngai ku ju leeing ju liak! Amen.
Yuh Naing Pa Mhawm
18Kawn aux Timose eue, lox tawm in aux tawx pong ka maix, awm pa khaw mai pa hoik dawg grux keud grawh grawng maix, yuh ka mawx kheu an kix maix tak pon yuh naing, pa mawh naing pa mhawm heue. 19Jhawp ka krax yum rhawm mai ka dee chix keud chix tawng pa mhawm, pui tiblah hoik tik khaing kix mai hoik kieh rau krax yum rhawm laux leeing kheu heue. 20Humene mai Alezandre ankiex kawx mawh ka daux kix, pa hoik tawx hoik pong aux ka Satan, sonsang gau kiex, ti ang salao ka Siyiex heue.
Currently Selected:
1 TIMOSE 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012