1 SAMOELAX 1
1
Nyiex Ma Elakanax
1Koe pui veng Ramathaimzophim tix kaux ka ton Epharem, ceu kaux nawh mawh Elakanax kawn simex Yeroham, pa mawh kawn simex Elihu, kawn simex Tawhu, kawn simex Zupha pa mawh ceu pui Epharem. 2Mai nawh koe moeng ra kaux, ceu kaux mawh Hanax mai Penina, Penina koe kawn praix mai Hanax ang koe kawn praix. 3Pui in lih khaing veng ot tix ku num sonsang krub mai tan ka Simiang Siyiex pa ting piang khawmuik ka veng Shilaw, kawn simex Elix ra kaux mawh Hawphanix mai Phiniet, pa mawh cao giex kaing li Siyiex. 4Singaix yam yuh Elakanax krax tan nawh tawx nyum son moeng tix Penina mai son kawn simex kawn bun tix. 5Nawh tawx nyum cie Hanax ra son kheu jao moh nawh Hanax, viang mawh nan, Siyiex ang kieh nawh koe kawn. 6Penina nie song rhawm ka Hanax sonsang kieh khrup rhawm kheu ang Simiang Siyiex kieh nawh koe kawn. 7Ceu an hoik lih mawh ku num, yam laig nawh ka daux nyiex bwan Simiang Siyiex mai so Hanax khrup rhawm. Mai Hanax yiiem ang lai ih priex preem heue.
Grawng Lox Tiextu Hanax
8Mai Elakanax mex nawh ah nin, “Hanax eue, yiiem maix kheu patix? ang maix ih nyaux kheu tix? laux rhawm maix kheu tix? aux hoik lheu mhawm son maix khaing kawn simex kao kaux ang mawh lie?” 9Khaix hoik ih nyaux Hanax daux veng Shilaw, nawh yaog ti kaoh, Elix cao giex kaing li ngawm piang khaox gaong praok rong siviex nyiex bwan Simiang Siyiex. 10Hanax kied laux rhawm sigrien mai rawg bwan ka Siyiex, yiiem mai pa khrup rhawm tix. 11Nawh tiextu ah nin, “Simiang Siyiex Cao pa ting piang khawmuik eue, phan Maix koe rhawm ti kia ngien ka krax kham geu siliex bun tix, doh keud ka aux, paw piawm ka siliex bun Maix, phan Maix tawx kawn simex ka siliex bun Maix tix kaux, aux tak ap nawh ka Simiang Siyiex glang singaix im ju nawh mai ang khlao ka kaing nawh.”#Si 6:5 12Yam rawg Hanax bwan ang jud ang jai plak sivoe Simiang Siyiex, Elix cao giex kaing li dong ngai tix ka jheeh nawh. 13Hanax rawg bwan daux rhawm tix, mawh ngie siyieb jheeh nawh pa chuh mai ang mhong ka lox nawh, Elix cao giex kaing li keud nawh yoek. 14Elix cao giex kaing li ah nin ka nawh, “Mawh kawn sang yoek maix miex grheung lie? teei ti tik rawm plix siiet singai khaing maix.” 15Hanax deeh pawk ah nin, “simiang eue, ang mawh, aux mawh bun pa laux rhawm, aux ang nyaux rawm plix siiet mai plai khiien, aux hieh plih rhawm tix ka plak sivoe simiang Siyiex. 16“Paw doh keud siliex bun maix, mawh bun pa caox, aux krai ka daux pa laux rhawm mai pa khi rhawm tix tom nie.” 17Elix deeh pawk ah nin, “Kieh maix hu nhim mai Siyiex pui Isarelax tak tawx ka maix awm pa rawg maix ka Nawh Cao.” 18Mai Hanax ah nin, “Kieh siliex bun maix, yaox pa koe min plak sivoe ngai maix.” Khaix an Hanax deeh hu krax hu tix mai ih priex mai ngai baoh nawh ang lai koe krax laux rhawm heue.
Grawng Keh Samoelax
19Mai kix kaoh ponngawb caocao mai krub ka Simiang Siyiex mai kix deeh ing ka nyiex tix daux veng Ramax, Elakanax dex dawd tau mai moeng tix Hanax mai Simiang Siyiex doh keud ka nawh, 20khaix an, Hanax koe kaux mai keh kawn simex tix kaux mai kok ceu kaux nawh mawh Samoelax ah nin, “Mawh kheu hoik mhaing nawh ka Simiang Siyiex.” 21Elakanax mai pui nyiex nawh haok yuh krax tan sijax mukheu awm pa yuh ku num ka Simiang Siyiex. 22Viang mawh nan, Hanax ang cu ti hu, nawh ah nin ka mex tix, “Aux ang nyang hu, kieh kawn nyawm prah peuex ha, aux tak viex nawh hoek sivoe Siyiex mai prah nawh ot tan leeing ju.” 23Mai mex nawh Elakanax deeh ah nin, “Yuh awm pa koe rhawm maix, pau tom prah kawn nyawm peuex, yuh tom grum naog gumlox Siyiex.” Mai Hanax ot ka nyiex tom hoek bawg yam prah nawh peuex. 24Yam hoik prah kawn nyawm ka peuex miex tix, kiex viex kawn nyawm hu mai tix, tau mai mawie mhaing naog loe num tix mu, nghox ca tix e pha mai singiien hak plix siiet tix mu mai viex hoek ka nyiex bwan Simiang Siyiex daux veng Shilaw, kawn nyawm an kawn awn ju. 25Khaix an, kix pah mawie mhaing an mai viex kawn nyawm hoek ka Elix. 26Mai Hanax ah nin, “simiang aux eue, awm im ju maix cao simiang aux, aux mawh bun pa hoik cung hawt maix tin mai pa rawg bwan ka Simiang Siyiex. 27Mawh kheu aux rawg bwan sonsang pon kawn nyawm in mai Simiang Siyiex hoik tawx awm pa rawg aux ka Nawh Cao. 28Mawh kheu aux hoik pon nawh khaing Simiang Siyiex, aux tak deeh ap nawh ka Simiang Siyiex, glang yam im ju nawh kieh mawh pa yuh kaing jhaw Siyiex.” Mai kix krub ka Simiang Siyiex tan heue.
Currently Selected:
1 SAMOELAX 1: WCL
Highlight
Share
Copy
Want to have your highlights saved across all your devices? Sign up or sign in
Wa Common Language Bible © Bible Society of Myanmar, 2012