YouVersion Logo
Search Icon

San Mateo 2

2
A ku ya'ba ti' magos ku bin u ch'e'to' a Jesús
1Kaj siji a Jesús yok'o Belén u kʌjta Judea a lʌji' u k'ini u wesi a Herodes, taro' ix Jerusalén a ku ya'ba tio' magos a ti' u taro' tuku bin k'in, 2y tu k'ato':
—¿To' tu tiʌ u wesi a judíos aj siji? Tin wiro' u jok'o u ba' kʌ' a tuku bin k'in, ij taro' in k'ujinto'.
3Ka tu yua aj wes Herodes, ne tu tukrubʌj y bexi' yete tu woro u winki Jerusalén. 4Y tu tuchi'ta t'ʌna tu woro u t'ojio' a moko' ku meajo' yok'o u yatoch K'uj y yete a mok ku kʌ'sik u t'ʌn K'uj a u ts'ibtamʌ Moisés uchik y tu k'ata tio' to' tu ku bij siji a Cristo. 5Tio' tu nuko' ti':
—Ix Belén a u kʌjta Judea, a toj bex ts'ibʌ' ten a profeta:
6“Y tech Belén a tiʌ yok'o u lu'mi a Judá,
a tech mo lʌjiech a to'o más cho chichinech
yok'o a to'o más nuk u kʌjta a judá;
toj ti tech ku bij jok'o junturi' wes
a lʌji' ku bin u ye'se u ber ti' in winik Israel.”
7A Herodes tu t'ʌna tu junio' a magos, y tu k'ata tio' tuk'in jach jok'i aj ba' kʌ' a tu yiro'. 8Pachi tu tuchi'to' ix Belén y tu ya'tio':
—Xene'x tita y k'ate tu woro a ba' yok'o a lay a cho mejen y tuk'in ka' wire'x, ka wei'ke'x tene'x, ti' in bin in wire bexi' ten y ti in k'ujintik bexi'.
9Chen ts'oki u yui'ko' a magos aj wes, a tio' bino'. Y a ba' kʌ' a tu yiro' u jok'o tio' lʌji' pʌti ku bi yok'o tio', ij xu'ri tu tiʌ a cho mejen xi'ra. 10Y ka tu yiro' a ba' kʌ', nej jach tsoychʌ u yoro' a magos. 11Y kaj oko' ichi ix nʌj, tu yiro' a cho mejen tiʌ yete u nʌ' a u k'aba' María, tu xonkunto' u pix ti' y tu k'ujinto' y tu jeo' u kuchi tuku but'ik jach ne tsoy u ba' y tu jara u oro, u pom y u mirra y tu sijo' ti'. 12Pachi, yok'o u weak'o' a'bitio' ten K'uj, mu' sut tu tiʌ a Herodes, lʌji' kaj suto' ix u lu'mo' chen yok'o u jer bej.
Kaj puts'o' ix Egipto
13Chen bino' a magos, junturi' u ángel ak Ts'uri tu ye'sa u bʌj ti' a José yok'o u weak' y tu ya'ti': «Lik'en y xen yete a cho mejen y yete u nʌ' ix Egipto y tita a p'ata hasta kin wei'k tech, ka wirik a Herodes bi u kʌxte a cho mejen ti' u kinsik.»
14A lay a ak'ʌ' a José yete a cho mejen y u nʌ', puts'o' y tij bino' ix Egipto. 15Ij p'ato' tita hasta kaj kimi a Herodes, ti u nup'u a bex tu ya'a K'uj yok'o a profeta, tuk'in tu ya'a: «Ix Egipto ti t'ʌna in Ti'a.»
A Herodes ku tuchi'tik kinsa' a mejeno'
16Ka tu yua a Herodes tusa' ten a xi'ro' a lʌjio' magos, nej ts'ikchʌ y tu tuchi'ta kinsa' tu woro a mejeno' a yʌnti' ka'p'e yaxk'in a tiʌ ix Belén y a tiʌ tu woro xok'o yok'o u kʌjta, a bex u p'is tuj a'bti' ten a magos. 17A je' a ba' nup'i bex a tu ya'a uchik a profeta a Jeremías:
18«Ix Rama ua' jump'e t'ʌn
y ne k'ʌ'm ok'o y nuya.
Lʌji' a Raquel tʌn yak'tik u ti'aro',
y mu kat ka' nʌsak u yor
tuku yirik yaj laj kimo' u ti'aro'.»
U kʌjto' ix Nazaret
19Chen pachi kaj kimi Herodes, junturi' u ángel ak Ts'uri tu ye'sa u bʌj yok'o u weak' a José ix Egipto, tu ya'ti': 20«Lik'en, ch'ae a cho mejen xi'ra yete u nʌ' y suten ix Israel, ki wei'k tech yaj laj kimo' a mok poch u kinsik a cho mejen xi'ra.»
21Lʌji' kaj lik'i a José y sutbʌj ix Israel yete a cho mejen y u nʌ'. 22Chen ka tu yeta a José lʌji' a Arquelao a mok tumen ku wesintik Judea y lʌji' u ti'a a Herodes, tu sʌjta u bin tita, chen yok'o u weak' a'bti' ten K'uj, ka' xik ix u lu'mi Galilea. 23Kaj k'ucho' tita, bino' tu kʌjta yok'o jump'eri' u kʌjta u k'aba' Nazaret. A je' bex mʌni ti' u nup'u u k'ini a bex tu yao' a moko' profetas, ka tu yao': A Jesús binukaj t'ʌna' u k'aba' Nazareno.

Currently Selected:

San Mateo 2: PLacNaha

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy