San Mateo 25
25
U quet t'aanil le diez x ch'úupalalo'obo'
1U ajawil ca'an túune' bey diez x ch'úupalal tu ch'a'ajo'ob u x t'uchub sáasilo'obe' ca j bino'ob ti' jun p'éel dzo'ocol beel u ti'al u jóokolo'ob u kamo'ob u beel le íichamtzilo'. 2Cinco ti' leti'obe' x ma' na'ato'ob u láak cincoe' jach yaan u na'ato'ob. 3Le x ma' na'ato'obo', le ca tu ch'a'ajo'ob u xt'uchub sáasilo'obe', ma' tu ch'a'ajo'ob aceite u ti'al u chupico'ob tu ca'a téeni'; 4ba'ale' le yaan u na'ato'obo' tu ch'a'ajo'ob aceite le ca tu ch'a'ajo'ob u x t'uchub sáasilo'. 5Tumen xaanji u taal le íichamtzilo' tuláacal jach taacchaj u wenelo'obe', ca j weeno'ob. 6Míin chúumuc áakabe' u'uya'ab jun p'éel awat: ¡Táan u taal le íichamtzilo' jóokene'ex a kame'ex! 7Tuláacal le x ch'úupalalo'obo' líiko'obe' ca jo'op' u t'abico'ob u x t'uchub sáasilo'ob. 8Le cinco x ma' na'ato'obo' tu ya'alajo'ob ti' le cinco yaan u na'ato'obo': Dza'ex to'on jun p'íit aceite tumen táan u tu'upul le c x t'uchub sáasilo'oba'. 9Ba'ale' le x ch'úupalalo'ob yaan u na'ato'obo' tu ya'alajo'ob: Ma', tumen beyo' ma' túun chúucpajal mix ti' te'exi' mix ti' to'oni'. Asab ma'alob ca xi'ique'ex te tu'ux cu co'onolo' ca a mana'ex a ti'ale'exi'. 10Ba'ale' ca'aliquil le cinco x ch'úupalalo'ob x ma' na'ato'ob bija'ano'ob u máano'ob aceiteo' j kuch le íichamtzilo'. Le cinco x ch'úupalalo'ob u nu'ucbesmuba'obo' j ooco'ob yéetel te j dzo'ocol beelo', ca j ka'al le jool najo'. 11Cu dzo'ocole' j kuch le u láak x ch'úupalalo'obo', ca tu ya'alajo'ob: ¡In Yuumtzil, Yuumtzil! je'e to'on le jool najo'. 12Ba'ale' leti'e' tu núucaj ti'ob: U jaajile' ma' in kaj óole'exi'.
13Jesuse' tu ya'alaj túun ti'obe': Ma' a wenle'ex, tumen ma' a wojele'ex u kiinil mix u yorail quéen taalac u Paal Máac.
U quet t'aanil le taakino'
(Lc 19.11-27)
14U ajawil ca'ane' je'el bix jun túul máac, ma'ili' jóokoc u binbal táaxel lu'ume', tu t'anaj u palitzilo'obe' ca tu kubentaj u taakin ti'ob.
15Ti' jun túule' tu dzáa cinco mil taakino'ob, ti' u láake' dos mil, ti' u láake' mil, ti' tu jujun túulile' je'el bix cu páajtal u meyajtique'. Cu dzo'ocole' ca j bini'. 16Le j palitzil tu kamaj cinco mil taakino'obe' meyajnaj yéetele' c a tu náajaltaj u láak cinco mil taakino'ob tu yóokol. 17Bey xan le tu kamaj dos mil taakino'obo' tu náajaltaj u láak dos mil tu yóokol. 18Ba'ale' le máax tu kamaj mil taakino'obo', j bine' ca tu ta'acaj u taakin u dzuulil ti' jun p'éel jool tu páanaj te j lu'umo'.
19Cu dzo'ocol u máan ya'ab kiino'obe' j suunaj u dzuulil le j palitzilo'obo', ca jo'op' u káatic ti'ob ba'ax tu beetajo'ob yéetel le taakino'. 20Táanile' j kuch le máax tu kamaj le cinco mil taakino'obo', ca tu kubaj ti' u dzuulil u láak cinco mil tu yóokol táan u ya'alic: Yuumtzil cinco mil taakino'ob ta dzaj ti' teen je'el u láak cinco mil tin náajaltaja'. 21Le dzuulo' tu ya'alaj ti': Jach ma'alob, teche' jun túul palitzil utzech yéetel chuca'an a wóol; tumen chúucpaj a wóol tu yóokol le jun p'íita', bin in ca'aj in dzáech tu yóokol u ya'abil. Oquen, qui'imacchajac a wóol tin wéetel. 22Cu dzo'ocole' ca j kuch le máax tu kamaj le dos mil taakino'obo', ca tu ya'alaj: Yuumtzil, dos mil taakino'ob ta dzaj ti' teen, je'el u láak dos mil tin náajaltaja'. 23U dzuulile' tu ya'alaj ti': Jach ma'alob, teche' jun túul palitzil utzech yéetel chuca'an a wóol; tumen chúucpaj a wóol ti' le jun p'íita', bin in ca'aj in dzáech tu yóokol u ya'abil. Ooquen, qui'imacchajac a wóol tin wéetel.
24Ba'ale' le ca j kuch le palitzil tu kamaj le mil taakino'obo', tu ya'alaj ti' u dzuulil: Yuumtzil tene' in wojel teche' jun túul máac chich a pucsi'ikal, ca jooch tu'ux ma' pakalnajechi' yéetel ca mol tu'ux ma' ta ki'itbesaj mix ba'ali'. 25Le o'olal sajacchajene' ca j binen in ta'ac a taakin te j lu'umo'. Je'el ba'al a ti'ala'. 26Le dzuulo' tu núucaj ti': Kaakas yéetel mákol palitzil, wa a wojel túun quin jooch tu'ux ma' pakalnajeni', yéetel quin mol tu'ux mix ba'al tin ki'itbesaje', 27le o'olale' unaj a dzáic ca'ach in taakin te tu'ux cu beeta'al le meyajo' le quéen suunaquen túuno' cu páajtal ca'ach in kamic ba'ax in ti'al yéetel buca'aj tu náajaltajo'. 28Ca tu ya'alaj ti' le máaxo'ob yano'ob te'elo': Lukese'ex le mil taakino'ob yaan ti'o' ca a dza'ex ti' le máax yaan diez mil ti'o'. 29Tumen le máax yaan ti'o' bíin dza'abac u láak ti'e', u ti'al ca yanac u asabil ti'. Ba'ale' le máax mina'an ti'o', tac le jun p'íit yaan ti'o' bíin lukesa'ac ti'. 30Le palitzil mix ba'al u bilala', pule'ex ti' u éekjoche'enil táancab, tu'ux bíin úuchuc okol yéetel jach' coj.
U p'is óolil le caajo'obo'
31Le quéen taalac u Paal Máac je'el bix ajawe', bakpachta'an tumen tuláacal u ángelo'obe', bíin culac tu jalach káanche'. 32Bíin muuch'lac tu táane' u cajnáalilo'ob tuláacal caajo'ob, leti' túune' bíin u jatzláanto'ob jun túul ti' u láak je'el bix jun túul j canan taman cu jatzláantic u j tamano'ob ti' le yuuco'obo'. 33Bíin u dzáa le j tamano'ob tu x no'oj kabo' yéetel le yuuco'ob tu x dzíic kabo'. 34Ajaw túune' bíin u ya'al ti' le máaxo'ob yano'ob tu x no'oj kabo': Co'otene'ex te'ex máaxe'ex qui'iqui' t'anta'ane'ex tumen in Taata, kame'ex le ajawil nu'ucta'an a ti'ale'ex le ca tu beetaj Ku yóokolcaabo'. 35Tumen wi'ijchajene' ca ta dzaje'ex teen ba'al in jaante'; ukajchajene' ca ta dzaje'ex teen ba'al in wuke; máanen bey táanxel lu'umilene' ca ta dzaje'ex teen tu'ux in kuchul. 36Mina'anchaj in nooke' ca ta dzaje'ex teen nook; koja'anchajene' ca ta xíimbatene'ex; ka'alene' ca j taale'ex a wilene'ex. 37Le máaxo'ob toj u cuxtalo'obo' bíin u ya'alo'ob: Yuumtzil, ¿ba'ax kiin t ilajech wi'ijech ca t dzaj ti' teech ba'al a jaante'? ¿Wa ba'ax kiin t ilajech ukajech ca t dza teech ba'al a wuke? 38¿Wa ba'ax kiin t ilajech beyech j táanxel lu'umil ca t dzaj ti' tech tu'ux a kuchul, wa mina'an a nook ca t dzaj ti' teech nook a búuquinte? 39¿Wa ba'ax kiin t ilajech koja'anech wa kala'anech j bino'on c ilech? 40Ajaw túune' bíin u núuc ti'ob: Tu jaajil quin wa'alic te'exe' tuláacal ba'al ta beetaje'ex ti' jun túul u asab chichanil ti' le in sucu'uno'oba' ti' teen ta beetaje'ex.
41Ajaw túuno' bíin u ya'al ti' le máaxo'ob yano'ob tu x dzíic kabo': Tzelaba'ex tin táan, te'ex máaxe'ex yane'ex yáanal kaakas t'aan; xeene'ex ti' le káak cu yéelel mantadz nu'ucta'an u ti'al kasiba'al yéetel u ángelo'ob. 42Tumen wi'ijchajene', te'exe' ma' ta dzaje'ex ba'al in jaanti'; ukajchajene', ma' ta dzaje'ex teen ba'al in wuki'; 43j máanen bey jun túul táanxel lu'umile' ma' ta dzaje'ex teen tu'ux in kuchuli'. Mina'anchaj in nooke', te'exe' ma' ta dzaje'ex teen nooki'; koja'anchajen yéetel ka'alene', te'exe' ma' taale'ex a xíimbatene'exi'. 44Leti'obe' bíin u ya'alo'ob ti': Yuumtzil, ¿ba'ax kiin t ilajech wi'ijech, wa ukajech, wa beyech táanxel lu'umile', wa mina'an a nook, wa koja'anech, wa kala'anech, cu dzo'ocole' ma' t áantechi'? 45Ajaw túune' bíin u núuc ti'ob: Tu jaajil quin wa'alic ti' te'exe', tuláacal ba'ax ma' ta beetaje'ex ti' jun túul u asab chichanil le máaco'oba', mix ti' teen ta beetaje'ex. 46Cu dzo'ocole' lelo'oba' bíin xi'ico'ob ti' le mukyaj mina'an u xuulo', yéetel le máaxo'ob toj u cuxtalo'obo' bíin xi'ico'ob ti' le cuxtal mina'an u xuulo'.
Currently Selected:
San Mateo 25: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992