San Mateo 21
21
U yoocbal Jesús Jerusalén
(Mc 11.1-11; Lc 19.28-40; Jn 12.12-19)
1Le ca j náadzo'ob Jerusalén ca j kucho'ob tu caajil Betfagé, tu chuun u pu'uquil le Olivo'obo', Jesuse' tu túuxtaj ca'a túul u aj canbalo'obe', 2ca tu ya'alaj ti'ob: Xene'ex ti' le cajtalil yaan te actáano'. Te can a wile'ex jun túul burra kaxa'ani' yéetel jun túul chan burro yaan tu yicnal. Wach'e'ex ca taase'exo'ob ti' teen. 3Wa yaan máax cu ya'alic ti' te'ex wa ba'axe', a'ale'ex ti'e' kabéeto'ob ti' Yuumtzil, séeba'an cun u sutilo'ob.
4Lela' j úuche' u ti'al ca dzo'ocpajac ba'ax tu ya'alaj le aj bóobato', le ca tu dzíibtaj:
5A'ale'ex ti' u caajil Sión:
Ile, a ajawe' táan u taal ti' teech cabal u yóol, u nat'maj jun túul burra, yéetel jun túul chan burro, u yaal jun túul ba'alche' cu cuuch.
6J bino'ob túun le aj canbalo'obo' ca tu beetajo'ob je'el bix a'ala'ab ti'obo'. 7Tu taasajo'ob le burra yéetel u yaalo' ca tu dzajo'ob nooko'ob tu yóokole', ca j na'at' tumen Jesús. 8Le ya'abcach máaco'obo'. Tu jayláanto'ob u nooko'ob tu yóokol le bejo'; u láako'obe' tu ch'a'aclanto'ob u kab che'obe' ca tu dzaalanto'ob te j bejo'. 9Le máaco'ob cu bino'ob táanilo' bey xan le cu taalo'ob paachilo' jo'op' u yawtico'ob: ¡Nojbe'enil ti' u Paal David! ¡Qui'iqui' t'antbil máax cu taal tu kaaba' Yuumtzil! ¡Nojbe'enil ti' Yuum Ku!
10Le ca j ooc Jesús Jerusalene' wóoch'lantáanbanaj tuláacal le caajo', ya'ab máaxo'ob tu káat chi'itajo'ob: ¿Máax lela'?
11Le máaco'obo' tu núucajo'ob: Lela' leti' le aj bóobat Jesuso', le máax Nazaretile' tu lu'umil Galilea.
Jesuse' cu jóokesic le máaxo'ob cu coonolo'ob te j kulnajo'
(Mc 11.15-19; Lc 19.45-48; Jn 2.13-22)
12Cu dzo'ocole' Jesuse' j ooc tu kulnaj Kue' ca tu jóokesaj tuláacal le máaxo'ob cu coonolo'ob yéetel cu máano'ob te'elo'. Tu walkesaj u mesaob le máaxo'ob cu kexico'ob taakino', tu walkesaj xan u káanche' le máaxo'ob cu conico'ob palomaobo'; 13ca tu ya'alaj ti'ob: Le Quili'ich Dzíibo' cu ya'alic: In wotoche' yaan u kaaba'inta'al u najil payalchi'; Ba'ale' te'exe' dzo'oc a sutique'ex u cúuchil j oocolo'ob.
14Tu nadzajuba'ob ti' Jesús te j kulnajo', dze'edzec ch'óopo'ob yéetel móocho'ob, leti' túune' tu dzaj u toj óolalo'ob. 15Ba'ale' u nuuctaquil le aj kiino'ob yéetel u aj ca'anbesajilo'ob le a'almaj t'aano' le ca tu yilajo'ob le chíiculalo'ob cu beetico', yéetel ca tu yu'ubajo'ob táan u yawato'ob le mejen paalalo'ob te j kulnaj táan u ya'alico'ob: ¡Nojbe'enil ti' u Paal David! j kuuxilnajo'obe' 16ca tu ya'alajo'ob ti' Jesús: ¿Táan a wu'uyic ba'ax cu ya'alico'ob lelo'oba'? Jesuse' tu núucaj ti'ob: Bey táan in wu'uyic. Ba'ale' ¿ma' wa a xocmaje'ex le Quili'ich Dzíib tu'ux cu ya'ala'al le ba'ax cu yúuchula'? Cu ya'alic beya':
¡Ta beetaj u jóokol qui'iqui'i kayo'ob tu chi' le mejen paalalo'obo' yéetel tu chi' le cu chu'ucho'obo'!
17Tu p'atajo'ob túune' ca j bin tu caajil Betania tu'ux tu máansaj áakab.
Jesuse' cu beetic u tijil jun cúul Higuera
18Le ca j suunaj Jesús Jerusalén tu ja'atzcabile', tu yu'ubaj wi'ij. 19Tu yilaj jun cúul higuera tu tzéel le bejo' ca tu nadzubai', ba'ale' ma' tu caxtaj mix jun p'éel u yichi', chéen le'ob. Jesús túune' tu ya'alaj ti' le higuerao': ¡Mix bikin ca ichnaquech tu ca'a ten! Tu séeblanquil j tij le higuerao'. 20Le j canbalo'obo', le ca tu yilajo'obe', ja'ak u yóolo'ob ca tu káat chi'itajo'ob ti' Jesús: ¿Bix úuchic u tijil séeba'an le higuerao'?
21Jesuse' tu núucaj ti'ob: Tu jaajil quin wa'alic te'exe' wa yaan a wocsaj óolale'exe' yéetel wa mina'an ca'a p'éel óolal ti' te'exe', ma' chéen cu páajtal a beetique'ex le ba'ax tin beetaj yéetel le higueraa', ba'ale' je'el a wa'alique'ex ti' le witzo': Tzelabáa te'ela', pulabáa ka'anab: bey cun úuchulo'. 22Yéetel je'el ba'alac ca a káate'ex ich payalchi'e', wa ca ocsaj óoltique'exe', yaan a kamique'ex.
U Páajtalil Jesús
(Mc 11.27-33; Lc 20.1-8)
23Cu dzo'ocole', Jesuse' j ooc kulnaj. Ca'aliquil táan u ca'ansaj te'elo', tu nadzajuba'ob ti'e' u nuuctaquil le aj kiino'obo' yéetel u nuuctaquil le judíobo' ca tu káat chi'itajo'ob ti': ¿Yéetel ba'ax páajtalil ca beetic le ba'alo'oba'? ¿Máax dzáa teech le páajtalila'?
24Jesuse' tu núucaj ti'ob: Bey xan teen bíin in ca'aj in káat chi'it te'ex jun p'éel ba'al: Wa ca núuquique'exe', teen xane' quin wa'alic ti' te'ex yéetel ba'ax páajtalil quin beetic le ba'alo'oba'. 25¿Máax túuxt Juan u ti'al u dzáa ocja'? ¿Ku túuxte wa máaco'ob? Ba'ale' jo'op' u ba'atel t'aano'ob tu baatzilo'ob táan u ya'alico'ob: Wa c a'alic Ku túuxte' je'el u núuquic to'one' ¿ba'axten túun ma' ta wocsaj óolte'exi'? 26Wa c a'alic chéen máaco'ob túuxte', sajaco'on ti' le máaco'oba'; tumen tuláacalo'ob ocsaj óoltique' Juane' jun túul aj bóobat. 27Bey túuno' tu ya'alajo'ob ti' Jesús: Ma' c ojeli'. Leti' túune' tu ya'alaj ti'ob: Mix xan teen quin wa'alic te'ex yéetel ba'ax páajtalil quin beetic le ba'alo'oba'.
U quet t'aanil le ca'a túul paalalo'obo'
28Jesuse' tu ya'alaj ti'ob: ¿Ba'ax ca wa'alique'ex tu yo'olal le ba'ala'? Jun túul máaque' yanji ca'a túul u paalal; ca tu ya'alaj ti' jun túul ti' leti'obe': In paal, xeen meyaj ichil in paakal uvaob. 29Le paalo' tu núucaj ti': Ma' in káati'. Ba'ale' cu dzo'ocole' tu kexaj u tuucule' ca j bin meyaj. 30Le taatatzil túuno' bin u yil le u láako' ca tu ya'alaj láili' le ba'ax tu ya'alaj ti' le yáaxo'; lela' tu núucaj: ma'alob taat, je'el in bine', ba'ale' ma' j bini'. 31¿Máacal máac ti' le ca'a túul tu beetaj ba'ax u káat u taataobo'? Leti'obe' ca tu ya'alajo'ob: Le yáaxo'. Jesús túune' tu ya'alaj ti'ob: Tu jaajil quin wa'alic ti' te'exe' le j kam patano'ob yéetel le x cáacbacho'obo' yaan u yoclo'ob tu ajawil Ku táanil ti' te'ex. 32Tumen Juan Bautistae' j taal u ca'anse'ex bix unaj a cuxtale'ex ba'ale' te'exe' ma' ta wocsaj óolte'exi'; ba'ale' le j kam patano'ob yéetel le x cáacbacho'obo' tu yocsaj óoltajo'ob. Te'ex túune' quex ta wilaje'exe' ma' ta kexaj a tuucule'ex u ti'al ca a wocsaj óolte'exi'.
U quet t'aanil le loolob j meyajo'obo'
(Mc 12.1-12; Lc 20.9-19)
33U'uye'ex le u láak quet t'aana': U yuumil jun p'éel cajtalile' tu paakaj uvaob tu lu'um, ca tu cotaj u bakpach; tu beetaj xan u cúuchil tu'ux u ye'edzel u kab le uvaobo', yéetel jun p'éel ca'anal cúuchil u ti'al u yantal máax canantic le pakalo'. Cu dzo'ocole' tu dzaj majnil le lu'um ti' dze'edzec j meyajo'obo' ca j bin náachil. 34Le ca j kuch u kiinil u yéemsa'al u yich le pakalo', tu túuxtaj dze'edzec palitzilo'ob u ti'al u káatico'ob ti' le j meyajo'obo' le jaatz cu ti'alintico'. 35Ba'ale' le j meyajo'obo' tu machajo'ob le j palitzilo'obo' tu jatzo'ob jun túuli', tu quíimsajo'ob u láak, yéetel u láake' tu muruxtuntajo'ob. 36Le u yuumilo' tu túuxtaj u láak palitzilo'ob asab ya'ab ti' le tu yáax túuxtajo'; ba'ale' le j meyajo'obo' queet tu beetajo'ob ti'ob je'el bix ti' le yáaxo'obo'.
37Tu dzooque' tu túuxtaj u paal, tumen tu tucultaje': Yaan u tziquico'ob in paal. 38Ba'ale' le ca tu yilajo'ob le paalo', le j meyajo'obo' tu ya'alajo'ob tu baatzilo'ob. Lela' leti' le máax cun ti'alintic le lu'uma', co'ox quíimsic u ti'al ca p'áatac to'on. 39Bey túuno' tu machajo'obe', tu jóokesajo'ob paachil ti' le lu'umo' ca tu quiimsajo'ob.
40Jesús túune' tu káat chi'itaj ti'ob: Le quéen suunac u yuumil le lu'umo' ¿ba'ax cun u beet ti' le j meyajo'obo'?
41Tu ya'alajo'ob ti': Bin u ca'aj u quíims x ma' ch'a'a óotzilil le loolob máaco'obo' yéetel bin u ca'aj u dzáa le lu'umo' ti' u láak meyajo'ob, máaxo'ob je'el u kubico'ob tu kiinil le jun jaatz u yich le pakal cu ti'alintico'.
42Jesuse' tu ya'alaj ti'ob: ¿Mix jun téen a xocmaje'ex le Quili'ich Dzíibo'? Cu ya'alic beya':
Le tuunich p'ecta'ab tumen le j pakbalo'obo', j kuch u beet u noj tuunichil le chuun pako'.
Lela' j beeta'ab tumen Yuumtzil. To'one' c ilic bey jun p'éel jakbe'en ba'ale'.
43Le o'olal quin wa'alic ti' te'exe' bin u ca'a j lukesbil ti' te'ex u ajawil Ku u ti'al ca dza'abac ti' le máaco'ob je'el u kubico'ob le u yich cu ti'alintic le ajawilo'. 44Le máax bíin lúubuc tu yóokol le tuunicha' bíin xe'exet'a'ac, ba'ale' wa le tuunich cu lúubul yóokol wa máaxo', lela' bíin xiixcunta'ac.
45U nuuctaquil le aj kiino'obo', yéetel le j fariseobo' le ca tu yu'ubajo'ob le quet t'aano'ob cu ca'ansic Jesuso', tu na'atajo'ob táan u ya'alic tu yo'olalo'ob. 46Tu yóoltajo'ob túun u macho'ob ba'ale' sajacchajo'ob ti' le máaco'obo', tumen le máaco'obo' u dzaama tu yóolo'obe' Jesuse' jun túul aj bóobat.
Currently Selected:
San Mateo 21: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992