1 Pedro 1
1
Pedroe' cu dzíib ti' le ocsaj óolo'ob t'i'it'paja'ano'obo'
1Teen, Pedroe', u apóstol Jesucristo, quin dzíibtic le ju'una' ti' le máaxo'ob t'i'itpaja'ano'ob náach ti' u lu'umo'ob, yéetel caja'ano'ob tu lu'umilo'ob Ponto, Galacia, Capadocia, Asia yéetel Bitinia, 2máaxo'ob yéeya'ano'ob tumen Ku Yuumbil jach je'el bix le tuucul yanji ti' úucho'. Tu yo'olal u Quili'ich Pixane' dzo'oc u quili'ichcuntique'ex u ti'al ca a wu'uye'ex u t'aan yéetel u ti'al ca p'o'oboque'ex yéetel u ki'ikel Jesucristo. Yanac te'ex túun, ya'ab siibal utzil bey ya'ab jéedzel óolal.
Jun p'éel cuxtal yéetel alab óolal
3Co'ox qui'iqui' t'antic u Ku yéetel u Taata c Yuumtzil Jesucristo, máax tu yo'olal u nojoch ch'a'a óotzilile' dzo'oc u beetic c síijil tu ca'a téen tu yo'olal u ca'a púut cuxtal Jesucristo ichil le quimeno'obo'. Lela' cu dzáic to'on jun p'éel cuxtal yéetel alab óolal, 4yéetel bíin u beet a kamique'ex le ayikalil u canantmaj a ti'al te'ex Ku te j ca'ano', jun p'éel ayikalil ma' tu páajtal u kascunta'al mix u pa'apaka'al, mix tu tijil je'el bix le nicte'obo'. 5Tumen te'ex yaan a wocsaj óole'ex ti' Kue', leti'e' cu canantique'ex ti' kaas yéetel u páajtalil u ti'al ca yanac te'ex le tocsajil u nu'uctmaj u ti'al u dzáa kaj óoltbil tu dzooc kiin. 6Tu yo'olal lela' te'exe' chuupe'ex yéetel qui'imac óolal, quex tumen wa kabéete' ca mukyajte'ex ya'abcach yaayaj óolalo'ob tu yo'olal jun p'íit kiino'ob. 7Tumen a wocsaj óole'ex bey le oroo', unaj u máansa'al ti' káak u ti'al ca ila'ac wa ma'alob. Le ocsaj óolal cu jóokol ma'alobilo' asab co'oj u tojol ti' le oroo' tumen lela' cu xu'ulul. Bey túuno' a wocsaj óole'exe', le quéen ila'ac wa ma'alobe', bíin ka'amac yéetel utzil, nojbe'enil yéetel tziiquil le quéen chíicpajac Jesucristo.
8Te'exe' a yaabilmaje'ex Jesucristo quex ma' a wile'exi'; yéetel iquil a wocsaj óoltique'ex bele' quex ma' táan a wilique'exe', cu qui'imactal a wóole'ex yéetel jun p'éel nojoch yéetel nojbe'en qui' óolal ma' táan u páajtal a wa'alique'ex yéetel t'aano'ob, 9le quéen a num yajte'ex u to'ocol a pixane'ex; tumen lela' u yich a wocsaj óolale'ex. 10Ti' le kiino'ob úuch máanaco'obo' le aj bóobato'obo' tu xakaltajo'ob yéetel tu dzíiboltajo'ob le tocsajila', yéetel j t'aanajo'ob tu yo'olal le siibal utzil bíin dza'abac te'ex tumen Kuo'. 11U Quili'ich Pixan Cristoe' tu beetaj u yojéeltico'ob le profretaobo' ma'ili' úuchuque' ba'ax cun u mukyajt Cristo yéetel le nojbe'enil bíin taalac cu dzo'ocolo'; leti'ob túune' tu dzaj u yóolo'ob u yojéeltico'ob máax le máaco' yéetel máacalmáac le kiin cu ye'esa'al ti'ob tumen le Quili'ich Pixan yaan ti'obo'. 12Ba'ale' Kue' tu beetaj u yojéeltico'obe' le meyaj cu beetico'obo' ma' u ti'alo'obi', ba'ale' c ti'al to'on, le ca tu tze'ectajo'ob le ba'alo'oba'. Le máaxo'ob tu tze'ectajo'ob te'ex le ma'alob péectzila' tu beetajo'ob yéetel u páajtalil Quili'ich Pixan túuxta'an te j ca'ano'. Le ba'alo'oba' tac le ángelo'ob u káat u yilo'obo'.
Kue' cu t'anico'on u ti'al jun p'éel quili'ich cuxtal
13Le o'olale' tuculte'ex ma'alob ba'ax can a beete'ex, yéetel sáasilchajac a na'ate'ex. Dza'ex tuláacal a alab óolale'ex ti' le siibal utzil bíin dza'abac te'ex le quéen chíicpajac Jesucristoo'. 14Je'el bix paalalo'ob cu yu'ubico'ob t'aane' ma' a cuxtale'ex je'el bix u nu'uctic le dzíibolalo'ob yaan te'ex ca'ach ma'ili' a kaj óolte'ex Kuo'. 15Ba'ax unaje' ti' tuláacal ba'ale' cuxlene'ex ich quili'ichil tumen Ku máax t'ane'exe' quili'ich; 16Tumen le Quili'ich Dzíibo' cu ya'alic: Quili'ichchajque'ex, tumen tene' quili'ichen.
17Wa te'ex ca wa'alique'ex Taata ti' Ku, máax cu p'is óoltic bix u cuxtal cada jun túul yéetel ma' tu caxtic jela'anil ichil máaco'obe', unaj a ch'a'ique'ex sajquil ti'e' tuláacal le kiino'ob cuxa'ane'ex way yóokolcaabe'. 18Tumen Kue' dzo'oc u toquique'ex ti' le cuxtal mix ba'al u biilal ta kamaje'ex ti' a úuchben taataexo'; yéetel te'exe' a wojele'ex jach ma'alobe' u tojol le tocsajila' ma' bo'ota'ab yéetel ba'alo'ob cu xu'ululo'obi, je'el oro wa platao', 19ba'ale' yéetel u co'ocoj ki'ikel Cristo, máax quiimsa'ab je'el bix jun túul j taman utzil chuca'an yéetel mina'an kaasil ti'. 20Cristoe' j dzaab u ti'al lela' ma'ili' beeta'ac yóokolcaabe', ba'ale' chíicbesa'ab ti' le u dzooc kiino'oba' u ti'al a wutzile'ex. 21Tu yo'olal Cristoe' te'exe' ca wocsaj óoltique'ex Ku, máax ca'a púut cuxquint ichil le quimeno'obo' ca tu dzaj tziiquil ti'; bey túuno' te'exe' a dzaamaje'ex a wocsaj óolale'ex yéetel a alab óolale'ex ti' Ku.
22Bele' te'exe', iquil a wu'uyique'ex u t'aan u ma'alob péectzilil le jaajo' tu yo'olal Quili'ich Pixane', dzo'oc a p'o'ique'ex a pixane'ex u ti'al a yaabiltique'ex yéetel x ma' ca'a p'éel ichil le sucu'uno'obo'. Bey túuno' unaj a yaabilticaba'ex ta baatzile'ex yéetel tuláacal a pucsi'ikale'ex bey xan yéetel tuláacal a muuke'ex. 23Tumen te'exe' dzo'oc a ca'a síijile'ex, ma' ti' taataob yóokolcaabilo'ob cu quíimilo'obi', ba'ale' ti' u t'aan Ku, ba'ax cuxa'an yéetel cu t'íilil mantadz. 24Tumen le Quili'ich Dzíibo' cu ya'alic: Tuláacal lu'umcabil máaco'obe' beyo'ob le xíiwo', yéetel u nojbe'enilo'obe' bey u nicte'il le xíiwo'. Cu tijil le xíiwo' yéetel cu lúubul u nicte'il; 25ba'ale' u t'aan Kue' cu t'íilil mantadz. Le t'aana' leti' le ma'alob péectzil dzo'oc u tze'ectal te'exo'.
Currently Selected:
1 Pedro 1: MAYABI
Highlight
Share
Copy
Want to have your highlights saved across all your devices? Sign up or sign in
Texto Maya © Sociedades Bíblicas Unidas, 1992