Matie 1
1
A Yeezu Kɩrɩta sãàkʋm-kore
(Luk 3:23-38)
1A Yeezu Kɩrɩta, a Daviir bidɛb, a Abraham bidɛb sãàkʋm-kore yée sɛbɛ n'ɩ à ŋà. 2A Abraham tɩ dɔw nɩ Ɩzaakɩ, Ɩzaakɩ dɔw Zakɔb, Zakɔb dɔw Zuda nɩ a ʋ yɛbr. 3Zuda tɩ páw nɩ Tamaar dɔw Faarɛsɩ nɩ Zaara, Faarɛsɩ dɔw Ɛsɩrɔm, Ɛsɩrɔm dɔw Aram. 4Aram dɔw Amɩnadab, Amɩnadab dɔw Naasɔ̃, Naasɔ̃ dɔw Salmɔ̃. 5Salmɔ̃ tɩ páw nɩ Arahab dɔw Bowaazʋ, Bowaazʋ páw Urutɩ dɔw Ovɛdɩ, Ovɛdɩ dɔw Zese, 6Zese dɔw a nãà Daviir.
A nãà Daviir tɩ páw nɩ a Uuri pɔw dɔw Salomɔ̃, 7Salomɔ̃ dɔw Orobowam, Orobowam dɔw Abɩa, Abɩa dɔw Asa, 8Asa dɔw Zuzɛfaar, Zuzɛfaar dɔw Zoram, Zoram dɔw Ozɩasɩ, 9Ozɩasɩ dɔw Zoatam, Zoatam dɔw Akaazɩ, Akaazɩ dɔw Ezekɩasɩ, 10Ezekɩasɩ dɔw Manase, Manase dɔw Amɔ̃, Amɔ̃ dɔw Zozɩasɩ, 11Zozɩasɩ dɔw Zekonɩasɩ nɩ a ʋ yɛbr, a lɛn daar bɛ na tɩ diw a Ɩsɩrayɛl nɩbɛ cen nɩ a Babɩlɔn tẽw a.
12A Babɩlɔn tẽw diw-cenu pùorí, Zekonɩasɩ tɩ dɔw nɩ Salatɩɛl, Salatɩɛl dɔw Zorobabɛl, 13Zorobabɛl dɔw Abiyudɩ, Abiyudɩ dɔw Elɩakɩm, Elɩakɩm dɔw Azɔɔr, 14Azɔɔr dɔw Sadɔkɩ, Sadɔkɩ dɔw Akɩm, Akɩm dɔw Eliyudɩ, 15Eliyudɩ dɔw Eleazaar, Eleazaar dɔw Matan, Matan dɔw Zakɔb, 16Zakɔb dɔw a Marya sɩr Zuzɛb, ɛ́ a Marya dɔw a Yeezu bɛ na bʋɔlɛ a Kɩrɩta a.
17A na ɩ à ŋá a, a sãàkʋm-kore dɔw-tu-taa ɩ n pie nɩ anaar, a Abraham tɩ tɔ n a Daviir, pie nɩ anaar a Daviir tɩ tɔ n a Babɩlɔn tẽw diw-cenu, pie nɩ anaar a Babɩlɔn tẽw diw-cenu tɩ tɔ n a Kɩrɩta dɔwfʋ.
A Yeezu Kɩrɩta dɔwfʋ yele
(Luk 2:1-7)
18À ŋá n'a a Yeezu Kɩrɩta dɔwfʋ tɩ tu. A ʋ mã Marya tɩ ɩ n Zuzɛb ƴãwnɩ-yúor, ɛcɛ bɛ bɛ tɩ lãw kpɛ sɛr ɛ, ɛ́ a Vʋʋrʋ Sõw ɩ a Marya tɛr pʋɔ. 19A ʋ sɩr Zuzɛb na tɩ ɩ nɩ-mɩŋa a, ɛ́ bɛ tɩ bɔbr k'ʋʋ wo ʋ a, tɩ yel'a k'ʋʋ na sɔwl'a zawr'ʋ bɛr. 20À ŋá n'a ʋ tɩ tɩɛrɛ, ɛ́ wa gã zànɩ nyɛ̃ Sore malkɩ ʋ yel ʋ: «Daviir bidɛb Zuzɛb i, ta zɔrɛ dɛ̃bɩ̃ɛ a fʋ pɔw Marya tɛrʋ ƴãw ɛ, a pʋɔ ŋa ʋ na tɛr a yi n Vʋʋrʋ Sõw zie. 21Ʋ na dɔw nɩ dɛble fʋ por a yúor kɛ́ Yeezu, ʋlɛ n'ʋ na faa a ʋ nɩ-bʋʋrɛ a bɛ yel-bebe pʋɔ.»
22À á ŋá za tɩ ɩ na, k'aa lɛ a Sore na tɩ dãw ƴãw a ʋ ƴɛ̀r-manɛ yel a tu: 23«A pɔwsɩrale n'ɩ ŋan na tɛr pʋɔ dɔw dɛble bɛ por a yúor kɛ́ Ɩmanɩɛl, a pɛr lɛ kɛ́: “Ŋmɩn-be-n-tɩ-zie.”»#1:23 Nyɛ̃ Ɩza 7.14. 24A Zuzɛb na wa ìr a, ʋ tu n a lɛ a Sore malkɩ na tɩ yel kʋ̀ ʋ a, ʋ tɛr'ɩ a ʋ pɔw Marya wa n a ʋ yir. 25Ɛcɛ ʋ bɛ tɩ bãw ʋ ɛ, ɛ́ gù ʋ tɩ dɔw a dɛble ʋ por a yúor kɛ́ Yeezu.
Currently Selected:
Matie 1: DBDC
Highlight
Share
Copy
Want to have your highlights saved across all your devices? Sign up or sign in
La Bible en Dagara © Alliance Biblique du Burkina Faso, 2013.