Luka 23
23
Yesu Usonge amwa Pilato
(Mat 27:1-2; Mrk 15:15; Yoh 18:28-39)
1Kangë mwirundo woong'e ugaëmëka na umutoa mweeso usonge amwa Pilato. 2Na veeso vëgaandya umusitaka, vëuhanya “Sese gwamwoona muntu uyuu uguyagha ndugu itu, na mweeso ugugughiiya sese gutamufee Kaisari kooti na uhanya mwino mweeso në Kiristo Mutëmi.” 3Na Pilato agamuwëya, “Vese umutemi wa Ayahudina?” Na mweeso agamusucha, “Veve wahanya uyii.” 4Na Pilato agavakhanëa akumbeki në aküü na mwirundo wa antu, “Nene ntinaona ihutye umuntu yui.” 5Ëgweeso veeso vëgakhonkhomëka, vëuhanya, “Mweeso uguvasosea antu, na usëya u Yahudi woong'e ufuma uGalilaya faka hafai.”
Yesu Ugutowa Kunë Herode
6Pilato naarë wategheeya vii, agawëya mbesa muntu uyi Mugalilaya. 7Naarë wamanya mwino mweeso uugutemi, wa mwa Herode agamutoa kunë Herode, mweeso mughonjo arë uguYerusalemu ikhondo rasëë. 8Herode naarë wamwoona Yesu, agayanja ino, gusoko arë wahunukiwe umwoona mweeso matiku maingë, gusoko wategheeye sayu akwe, agasëgha aone ikua nëratendiwe na mweeso. 9Uvii agamuwëya nkhani nyingë. Ëgweeso mweeso ainamusuchaa. 10Makuhani në aküü na asëyi va seria vëgaëmeka fifë vëgamusitaka gwa nguu ino. 11Na Herode nanë asikai vakwe vëgamuhorya na umuheka. Na veeso vëgamuyaëncha nkhanjo aluhëda, na vëgamusucha mweeso kunë Pilato. 12Na Herode ina Pilato itiku ërëro, vëgatungambuya gusoko khae arë arughu.
Yesu Waramëywa Ikuya
(Mat 27:15-26; Mrk 15:6-15; Yoh 18:39–19:16)
13Pilato agaëtana itambëëmwedu makuhani në aküü nanë atongeri nanë antu 14na agavakhanëa, “Nyenye mwandetea muntu uyi mwë munya uyaghaya antu. Na nene namufenkëya mweeso usonge anyu, nene ntinaona ihutye umuntu uyi mung'ë amasitaka anyu në mumusitakie, 15mbesa Herode ainaona ihutye na gusoko asëë mweeso wa musucha kunë sese. Oni ainatenda ukhani në üküü në umunoneye aramuwe ikuya. 16Gwa uvii nene nijë umukhua mweeso iboko nanë mutungwëre.” 17Gusoko arë imunoneye avatungwëre mutungwa umwedu ikhondo ra sigunkuu.
18Ëgweeso voong'e vëgakurya mukindo itambëëmwedu, vëuhanya “Muheye muntu uyui, na ugutungwëre sese Baraba” 19muntu nëwatungiwe ujera gusoko a uhongeri newadwëëre umujini, na gwa uuraghi. 20Pilato agarighëëtya inao mëhënjo ëvëë gusoko arë usëghiite umutungwëra Yesu. 21Ëgweeso vëgakurya mukindo, vëuhanya “Mukhome, Mukhome mweeso!” 22Pilato agavakhanëa muhinjo, wa gatatu “Watendei ihutye këë? Nene ntinanona kunë mweeso ihutye nërëmunoneye akuye. Uvii nene ngumukhua iboko na umutungwëra mweeso.”
23Ëgweeso vëgafwaghëëra uhumbua nduuri yao vasusutëye inoneye Yesu akhomwe. Na nduuri yao igahuma. 24Uvii Pilato agafunya uramui mwino veeso arë vëuromba. 25Mweeso agamutungwëra muntu uyuo naarë watungiwe ujera gusoko a uhongeri nane uuraghi, mwino arë veeso varomba, ëgweeso agamufunya Yesu vamutende mwino veeso vasëghëëte.
Yesu Wakhomwa uMusalaba
(Mat 27:32-44; Mrk 15:21-31; Yoh 19:17-27)
26Naarë veeso vamutue gunji, vëgamukwata muntu umwedu Simioni wa Ukirene arë ufumie umughunda, na veeso vëgamwitwicha musalaba, auche unyuma amwa Yesu. 27Na arë uhongetwe na iburi rëkuu ra antu, nanë akhema naarë vëuhongeya nanë umurëra mweeso. 28Ëgweeso Yesu agavafetukia veeso agavakhanëa, “Nyee akhema va uYerusalemu mutandëëre nene, ëgweeso ërërë nyenye aghonjo na vana vanyu. 29Gusoko ravi, matiku ajie nëvajie uhanya, ‘Bahu ao aghumba na ndaa niinafafa kamwe, nambee niinaoncha kamwë!’ 30Kangë veeso vajie uandya ukhanëa itanto, ‘Guwëëri sese, na ighuu, gukunëkei sese.’ 31Gusoko nëmbesa vëutenda vii umutë në utotu gujie utendeka urë umutë në ukaku?”
32Vangëjano anya mahutye vavëë vëgatowa vauraghwe itambëëmwedu na mweeso. 33Na naarë veeso vaghea kunë gwëtanwa ikufa, hafo vëgamukhoma, na anya mahutye, umwedu umukhono wa gëlëlo na muuya umukhono waa gëmoho 34Na Yesu agahanya, “Tata, uvaonee uvai, gusoko vatune intu nëvëurëtenda.” Na vëgakhua kura vaaghane masaa akwe. 35Na antu arë vaëmëkëe fifë, vëgihenga, ëgweeso atongeri vëgamuheka mweeso, vëuhanya “Mweeso waforiye vangëja, nëiforie mweeso mughonjo, nëmbesa mweeso Kiristo wa Muungu, muntu në Muungu wamuhwaniye!” 36Asikaino vëgamuheka vëgaja vëgamwetea siki, anywe 37na veeso vëgamukhanëa “Nëmbesa veve u Mutëmi wa Ayahudi, ifonie veve mughonjo!” 38Na arë arëfo maandëko unto aitwe rakwe, “Uyui Mutemi wa Ayahudi.”
Muhëmbi Wafea
39Umwedu wa anya mahutye naarë vakhomiwe inao agamutuka mweeso, uguhanya, “Veve uti Kristona? Ifonie mughonjo uguforye na see!” 40Ëgweeso munya mahutye wa gavëë agamukenea muuyakwe ugumwëra, “Veve utiumwoghofa Muungu, 41veve nanee gunoneye. Gusoko sese guhanga gënyamwëmo gitu gwa ntendo yiitu në gwaitendei, ëgweeso muntu uyi ainatenda itu nëërëvë.” 42Na mweeso agahanya, “Yesu, unkumbukwe nene në hikwë wooingëa mu utemi wako.” 43Na Yesu agamukhanëa, “Tutë nene ngugukhanëa veve, rëo ugutendeka ginako uParadiso.”
Ikuya ramwa Yesu
(Mat 27:45-56; Mrk 15:33-42; Yoh 19:28-30)
44Arë itungo ra mutandatu gifaghato gugatendeka kiiti ung'ë oong'e faka matungo a kenda. 45Yuva rëgagirora no ifufa ra hekalu rëgatamuka mafëgha avëë. 46Yesu, agarëa gwa ruri në aküü, uguhanya, “Tata umëkhono ako namëëka nkho ane!” Naarë warighëëtya asaa agatëna nkho. 47Müküü wasuu wa asikai naarë waona asaa nëadwëëra mweeso agamukurya Muungu na uguhanya, “Tutë muntu uyi arë munya tutë.” 48Na mwirundo woong'e naarë viirundie ugihenga mantu asaa naarë veeso vaona nëadwëëra, vëgasuka ukhaya vëutuanga ikua yao gwa uvai. 49Na voong'e naarë vemumanyee Yesu vija nanë akhema naarë vamuhongete mweeso ufuma uGalilaya arë vaimëkie kue na ugihenga mantu ayai.
Uguëkwa Yesu
(Mat 27:57-61; Mrk 15:42-47; Yoh 19:38-42)
50Na arë urëfo muntu rina rakwe Yosefu ufumie u Yahudi muji wa Arimataya. Mweeso arë munyampaa wa barasa, arë muntu muja na watutë. 51Mweeso arë ainayanja uramui wao nanë ntendo yao na arë uwindie utemi wa Muungu. 52Yosefu agaenda kunë Pilato uromba afewe mwëërë wamwa Yesu. 53Agausimia, agaufëndëya sanda agitani, agamwëëka umbëlëlo në ëkuniwe ung'ongo, hafo na akëë ainaëkwa muntu mpa umwedu.
54Na itiku rasëë unë naa itiku ra wighondanëëyi, na Sabato ëgandya gingëa. 55Na akhema avoo nënaa vajaa itambëëmwe na mweeso ufuma uGalilaya vëgasemembeera, vëgameona mbelëlo, na mwino mwëërë wakwe naa uvëkiwe. 56Vëgasuka, vëgaghondanëëya manukato nanë marihamu. Na itiku ra Sabato vëgatuya mwino naa iraghëëywe.
Currently Selected:
Luka 23: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.