Luka 14
14
Yesu Ugumuforya Muntu Umwedu
1Itiku rëmwedu ra Sabato, Yesu naarë wenda ulia unyumba a müküü umwedu wa Afarisayo, veeso arë vëumwihenga mweeso. 2Na kengea usonge akwe Yesu arë urëfo muntu naarë wimbie mëghuu në mëkhono. 3Na Yesu agavawëëya ana seria na Mafarisayo, uguhanya “Në guuja uforia itiku ra sabato, mpa tiguuja?” Ëgweeso veeso vëgagiatwe. 4Yesu agamuhoa mweeso na umuforia, 5Na agavaëra, “Anyu mukhatë anyu nëwina mwana nampa jaghamba nëmbesa agwëëra uruujie në atiinje gënyahafo umëuta unji itiku ra sabato?” 6Na vinasucha iwëëyo ërëi.
7Na mweeso agavakhanëa wikhori wa vasaa nëvaraëkiwe, naarë waona mwino veeso arë vëuhwania matumbë ausonge a ikuryo, agavakhanëa veeso, 8“Në mbesa veve waraëkwa na muntu ulughuu utagikhae itumbë ra unsonge etaje ëse waaraëkwa muntu në wina ikuryo ukëa veve në waraëkwa na mweeso, 9na wasuu në wamuraëkie nyenye nyoong'e mwaavëë, ujie na ugukhanëa vee, ‘Muhumbee itumbë muntu uyui,’ na veve uguandya gwa mënyaa uhoa itumbë ra unyuma. 10Ëgweeso në waraëkwa, enda na ugikhae itumbë ra unyuma në waja në umuraëkie ujie ugukhanea vee, ‘Mbuyane njuu hafai usonge,’ hafo uguhanga gikuryo usonge a voong'e nëmwikhee umesa mwinao. 11Gusoko mu muntu nëugihumbua mughonjo ugusimiwa nanë uginyumpya mughonjo uguhumbuwa.”
12Mweeso agamukhanëa muntu wasuu nëaja wamuraëka, “Itungo në veve uguvaraëka antu malëwa a mumwe nambesa mung'e a serehe utavaraëke vambuya vako, nambesa aruuna vako nambesa antu va umufita wako na anyafifë në aghwari vataje vaje uguraëka vee na ugusukëya. 13Ëgweeso itungo në veve watënda ngoi varaëke atuki, anyankhomee, anyagiëtevee, na afoku, 14na vee uguforiwa, gusoko veeso vëtiudaha ugusukëya veve, veve winjë usukëywa mu ufëtëo wa anyatutë.”
Wikhori wa Sigunkuu në Nkuu
(Mat 22:1-10)
15Umwedu wa vasaa naarë wikhee umesa itambëëmwe inao wategheya vii, agamwëra, “Bahu kunë mweeso wasuu në ujie ulia malëwa mu utëmi wa Muungu!” 16Ëgweeso Yesu agamusucha mweeso “Muntu umwedu agatenda ngoi nküü agaraëka antu vaingë. 17Naarë ikhondo rafika ra serehe mweeso agamutuma mutumami wakwe uvakhanëa avoo në varaëkiwe, ‘Njii; gusoko oong'e itungwee aning'anëa. 18Ëgweeso voong'e vëgaandya uginenea vaonewe uvai. Wa mwandyo agamukhanëa, Naghua mughunda, na inoneye nende na uwona. Nguguromba vee, unyonee uvai.’ 19Na muuya agahanya, ‘Naghua njiku ikumi ya urëma, na nooka uyiegheeya nyeeso urëma, nguguromba veve unyonee uvai.’ 20Na muuya agahanya, ‘Naroghoa mukhema, na vii ntijie.’ 21Na mutumami wasuu agasucha na ueta sayu kunë müküü wakwe. Uvii munyakhaya agahura, agamukhanëa mutumami wakwe, ‘Fuma unji urë wende u njëa nanë u babaa në nküü ya umijini, na uvaete mukhatë atuki nanë anyankhomee nanë afoku nanë anyagitevee.’ 22Na mutumami agahanya, ‘Müküü asaa në veve wayaraghëëya atendeka, na faka itungwee ikhondo këë rërëfo. 23Na müküü agamukhanëa mutumami, Fuma unji wende ubabaa na umëmbë kunë vëgikhaa anya uromba uvaumëye antu uingëa mukhatë, nyumba ane ëdahe gijua. 24Gusoko nene ngumukhanëa nyenye gutie muntu mung'ëë mu vasaa nëvaraëkiwe nëujie ulia malëwa mu sigunkuu ane.’”
Mweeso udahëëte Utendeka Musëywi Wane
(Mat 10:37-38)
25Ikhondo rëngëja iburi rikuu ra antu arë vamusambëye mweeso, na agagifetukëya agavakhanëa veeso. 26“Nëmbesa gëkaku muntu aje kunë nene na atimuhuëte ihe wakwe nanë yiu wakwe nanë mukhema wakwe nanë anakwe nanë aruunakwe nanë ahaja vakwe, nhaa, nanë uduvi wakwe mughonjo atiudaha utendeka musëywi wane. 27Wasuu në wadëa ukenka musalaba wakwe mughonjo na aje ang'onge nene atiudaha utendeka musëywi wane. 28Gusoko anyu kunë nyenye, në waufenja ujenga munara, në atigikhaa tanju fang'ë na avarye gharama, aone mpa ukweti nëëkhondie umarëya? 29Ataje ahimbe musingi na aremwe umarëya, antu voong'e në vaona uyi vëuandya umuheka mweeso, vëuhanya, 30‘Muntu uyi waandiye ujenga na atikweti nguu ya umarëya. 31Mba mutëmi këë në winjë ugikhua na mutemi ungëja urughuu, në atigikhaa fang'ë tanju na ughema mpa ugudaha itambërëmwedu na maghana a njou ikumi utaana na wasuu në ujie ugikhua inakwe na asikai maghana a njou makumi avëë? 32Na në waona atiudaha, mweeso ugutuma sayu a uromba majëghana në këë muuya wëkure. 33Uvii, gwë uyi, wasuu kunë nyenye nëwadëa ureka oong'e në uyakweti atiudaha utendeka musëywi wane.’”
Munyu në Utikwatie
(Mat 5:13; Mrk 9:50)
34“Munyu në gëntu gëja ëgweeso nëmbesa wasusufaa, ugulombiwa na ntuni ukhoree? 35Utiunoneya gëntu mbesa gwa iroongo nambesa gwa matofe. Antu vëuhunua kuurengë. Wasuu në ukweti matwë autegheeya, në ategheeye.”
Currently Selected:
Luka 14: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.