Luka 11
11
Yesu Ugusëya Uromba
(Mat 6:9-13; 7:7-11)
1Mweeso arë uguromba itumbë rëngëja naarë mweeso wadaha, umwedu wa asëywi vakwe agahanya kunë, “Müküü, gusëye nasee uromba mwino chu Yohana waasëye asëywi vakwe.” 2Na agavakhanëa veeso, nëmuromba hanyi:
“Tata (wetu vee në wegerunde),
Rina rako rëëriwe,
Utëmi wako uje
Mafenji ako etëndeke afaa mu urëmi
Mwino ugutendeka gerunde.
3Ugufe malëwa itu a muitiku,
4na ugurekee mahutye itu,
mwino sese aghonjo nëguvarekea,
vasaa nëvëuguhutya,
na utagwengëyë mu maëghëëyo.”
(gweeso gwayo ugutyoe na uyuo në muvë.)
5Na agavakhanëa, “Anyu mukhatë anyu nyenye në ukweti mbuyaakwe winjë kunë mweeso utiku wa mukhati na umwëëra mweeso, ‘Mbuyanë njaruma nee mëkaate ëtatu. 6Gusoko mbuyawane waja ufumie muhënjo, na ntikweti itu ra uuëka usonge akwe.’ 7Na mweeso winjë usucha ufuma mung'e a nyumba, ‘Utankhasye nene. Itungwee rurii wautiwa na anane ginao guuree guurëë. Nene ntiuuka na nëgufe gëntuna?’ 8Nene ngumukhanëa nyenye, nambesa atiuka na ende umufa gëntu gusoko mweeso në mbuyaakwe, gusoko këë akë ainakhataa uromba uguuka amufe gëntu nëugisëgheete.” 9Na nene ngumukhanëa nyenye, “Rombi, nanyee mufewa: fenji, nanyee muhanga, fendui, nanyee muurughwëërwa.
10“Gusoko gëkaku muntu nëwaromba ugufewa, na mweeso unë nëugufenja, uguhanga, na wasuu nëugufendua ugurughwëërwa. 11Në tata kë mukhatë anyu, nëmbesa mwanaakwe wamurombe sompa, mweeso amufe njokha në ti sompa, 12mba nesa mweeso amurombe ighe, ugumufa nkumëna? 13Nëmbesa nyenye uvii unë mwaavë mumanyie uvafa anaanyu, ana ampefo në aja, urë ti nanguu na Tata wa girunde uvafa Mwahu Mweru vasaa në vëumuromba mweesona?”
Yesu nanë Beelizebuli
(Mat 12:22-30; Mrk 3:20-27)
14Itungwee mweeso na ugujuncha gënyonyinyonyi ga gemumu. Narë gënyonyinyonyi gafuma unjë muntu wa gemumu agaregheetya, na antu vegataka. 15Ëgweeso antu vangëja vëgahanya, “Mweeso ugujuncha inyonyinyonyi gwa nguu yamwa Beelisebuli mutëmi wa inyonyinyonyi.” 16Itungo ërëëro, vangëja, vëgamughema mweeso vëgafenja uona ndolyo ufuma kunë mweeso, ndolyo nëëfumie girunde. 17Ëgweeso mweeso gwa umanya masëgho ao agavakhanëa, “Mu utëmi në watemanuka mafande utiudaha uëmëka, na khaya në abaghuka ëugwa. 18Na mbesa Setanino utemanukangie mweeso mughonjo, urë utëmi wakwe uguimekana? Gusoko nyenye muhanya chu nene gujunchaa unji inyonyinyonyi gwa nguu yamwa Beelisebuli.
19“Na nësa nene ngujunchaa inyonyinyonyi gwa nguu ya mwa Beelisebuli, gwa nguu yamaanyu anaanyu vëuijunchaa inyonyinyonyi? Gwa uvii veeso vajie utendeka aramui vanyu. 20Ëgweeso nëmbesa gwa chaa ga Muungu nene ngujunchaa unjë inyonyinyonyi, uvii utëmi wa Muungu wamujëe nyenye. 21Itungo muntu në wina nguu, na wina mata#11:21 Mata: Muhangënkano wa mantu në antu vëgëkhwëëra guurughuu-genya, uta, mafinie, mukoha, ngua, mianga. akwe oong'e aughoojea nyumba akwe mughonjo mari yakwe ahoo ikhee ija. 22Ëgweeso në muntu wamujëa në wina nguu ukëa mweeso umumankea na umuhuma, ugumuheeya mata akwe naarë mweeso uyaghonjiye, na uvaaghania asaa nëwayafumpie. 23Wasuu në atitambëremwedu nanee wasuu ugung'ita nee na wasuu nëatiuhangwëya ginakwe ugufaghatia.”
Usuka gwa Inyonyinyonyi Nëivë
(Mat 12:43-45)
24“Në gënyonyinyonyi nëgëvë gamufuma unji muntu, geeso ginjë ukëëra kunë majë gutie gëufenja utuiyo, na nëgaadëa uhanga geeso gëuhanya, ‘Nene ngusuka unyumba ane kunë arë nifumie.’ 25Narë geeso gasuka gënjë umihanga ifaghuwe na ifambiwe ija. 26Uvii geeso gëusuka na ueeta inyonyinyonyi ingëja ëmufungatë nëive ukëa mweeso mughonjo, na uingëa utenda mëkhao hafo. Na uduvë wakwe wa umpeo wa muntu wasuu ëgutendeka ubëë ukëa wa mwandyo.”
Bahu Atutë
27Naarë mweeso warighëëtya vii, mukhema umwedu mukhatë amwirundo agahumbua ruri wakwe na umukhanëa, “Ëforiwe ndaa nëagufafie vee na ivee nëraaguonchiye vee!” 28Ëgweeso mweeso agahanya, “Bahu, vaforiwe vasaa nëvëutegheya ukhani wa Muungu na ukwatiralii.”
Vëufenja Ndolyo
(Mat 12:38-42)
29Naarë mwirundo wëongeya, Yesu agaandya urighëëtya, “Ufafo urui në ufafo në uvë. Ugufenja ndolyo ëgweeso gutie ndolyo nëugufewa, ëgweeso ndolyo amwa Yona. 30Gusoko mwino Yona watendekie ndolyo gwa antu va uNinawi, viuyi Mwana wa muntu ugutendeka gwa ufafo urui. 31Mutemi wagikhema wa utaghama ujie uuka itiku ra uramui na ufafo urui na uvaramua veeso. Gusoko mweeso wajie ufuma umpeo a ng'e utegheeya mahaa amwa Solomoni, na rarava hafai urëfo muntu në müküü ukea Solomoni. 32Antu va uNinawe vajie udwëëra itiku ra uramwiywa itambërëmwedu na ufafo urui na uvaramua weeso; gusoko veeso vafeire gwa matanantyo amwa Yona, na rarava hafai urëfo müküü ukëa Yona.”
Weru wa Mwërë
(Mat 5:15; 6:20-23)
33“Gutie muntu në waacha gëmwe nëugugëëika fana gwifihie nampa fang'ë a nyungu, ëgweeso unto, agëango gusoko vasaa nëvëuingëa vadahe uona weru. 34Riho në gëmwee ga mweere wako. Në riho rako rifanga mwërë wako woong'e wina weru. Ëgweeso nëmbesa righajëkie mwërë wako woong'e ugukitë. 35Gwa uvii rava weru nëwë mung'ëëako utarime. 36Uvii nesa mwëërë wako woong'e wina weru, ëgweeso gutie ifigha nërina wëëru, ugutendeka wina wëëru woong'e, mwino gëmwe nëmëange ayo, ëgugumwëkëa veve.”
Yesu Agavanang'ana Afarisayo na Asëyi Vaseria
(Mat 23:1-36; Mrk 12:38-40)
37Naarë mweeso wadaha urighëëtya Mufarisayo umwedu agamuromba mweeso vende ulia itambëëmwe. Uvii mweeso agaenda againgëa na ugikhaa umesa. 38Mufarisayo agataka umwona mwino aina ooya tanju në akëë ainalëa. 39Na Müküü agamukhanëa, “Nyenye Afarisayo muoya gakuu na mpee, genjinji ëgweeso mung'ë nyenye mwijue uonei na uvë. 40Nyenye mwafutu! Mweeso unëwatendie gënjinji ti uyuyo në watendie gëng'ëngënaa? 41Ëgweeso funyi asi nanë dahwa ya mantu asaa në arëfo mukhatë na kengea mugëntu gëutendeka gija kunë nyenye. 42Ëgweeso hëhë anyu Afarisayo! Gusoko nyenye muhoraa gafëgha ga ikumi ga muchicha, nanë nyanyi, nanë mu nkinda, na mutiukeera tutë na uyanjo wa Muungu. Aya arë imunoneye nyenye ësa muyatendaa, mutahorye angëja. 43Hëhë anyu Mafarisayo! gusoko muyanjëte ugikhaa umatumbë në maja umasunagogi na uramuchwa usokoni. 44Hëhë anyu! gusoko nyenye mwëkhweete na mbëlëlo* ëëtiigheetë, na antu vëuenenda unto ayo vatiimanyie.” 45Umwedu wa ana seria agamusucha, “Musëyi mung'ë a umuurëghëëtyo urui ugugutuka naseeno.” 46Na agamusucha, “Hëhë anyu anaserianoo! gusoko nyenye muvaituicha antu mëigho nëmërito uhoreka na nyenye aghonjo mutiutenya mëëgho nambesa na mwaaya wanyu umwedu. 47Hëhë anyu! gusoko mujengaa mbëlëlo ya anyagëdaghu unë vatata vanyu va varuraghie. 48Uvii nyenye mwëmasudanga na uyanja ntendo ya vatata vanyu. Gusoko veeso vavauraghie veeso, nanyee mujenga mbëlëlo yao. 49Gwa uvii noo ihaa ra Muungu rëuhanya, ‘Nene nguvatumëa veeso anyagëdaghu na atumami vangëja unë veeso vëjë uvauragha na vangëja uvakhasya.’
50“Na saghami ya anyagëdaghu voong'e nëahunukie ufuma mwandyo wa urëmi, ëjie ufenjwa muufafo urui. 51Ufuma usaghami amwa Abeli faka saghami amwa Sakaria, unë vamuuraghëe mukhatëkhatë a masabahu na kunë weru wa weru#11:51 Weru wa Weru: Gwekhweete na nkani eyii Patakatifu Pa Patakatifu. (Patakatifu pa utakatifu.) Nhaa nene ngumukhanëa nyenye, ëjie ufenjiwa muufafo urui. 52Hëhë anyu andëki va seria! gusoko nyenye mwaujughutie ufunguo wa umanyi, muutiuingëa nyenye aghonjo na nyenye muvaghiiya vasaa në vëufenja uingëa.” 53Naarë mweeso watunguya ufuma hafo, Afarisayo na aandëki vëgaandya umukhombajëya ivë na umuhumya makuo arighëëtye mantu maingë, 54vamwindie mweeso, vamukwatie gwa intu roong'e në mweeso ugudaha urighëëtya.
Currently Selected:
Luka 11: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.