Luka 10
10
Yesu Uguvatuma Asëywi Makumi Mufungatë
1Naarë akëa ayai Müküü agavaëka vangëja, makumi mufungatë na agavatuma veeso vatongee usonge akwe, vavëë vavëë mu muji na itumbë kunë mweeso mughonjo arë usëghite uenda. 2Na gavakhanëa, “Ntënange nyingë, ëgweeso atendi mwëmo akei. Gwa uvii murombi Müküü wa ntënange avatumë anya utenda mwëmo mung'ë a ntinangë akwe. 3Endi unjëa yanyu. Ravi, nene ngumutuma nyenye mwino vana vankhoo mukhatë ambughi. 4Mutahoe mpënda, na mbuguri, nanë maatu, na mutamuramuche muntu nanë umwedu unjëa. 5Nyumba gëkaku në nyenye mugingëa, tanju hanyi, ‘Majëghana ësë ë nyumba ëyëë!’ 6Na nesa urëfo mwana wa majëghana hafo, majëghana anyu ëgikhaa kunë mweeso. Ëgweeso në ti uyi, majëghana ëgumusukëa nyenye. 7Na saghi unyumba ëyëyo ëyëyo kunu mulëa na unywa asaa në veeso vëumufa, gusoko mutenda mwëmo unoneye gënyamwimo gakwe. Mutagautananta nyumba, ufuma ëyëë na ëyëo. 8Nëmwaingëa umuji na veeso vamughenyifa nyenye, lëë nëvayaëka usonge anyu. 9Fori arue në varëfo na muvakhanëe, ‘Utëmi wa Muungu wahumbea kunë nyenye.’ 10Ëgweeso nyenye nemwahefea umuji na veeso vadëa umughenyifa nyenye, endi na uhanya, 11‘Nambesa ukungu në wë umuji wanyu neunamantëe umëghuu itu guwukununta kunë’ nyenye. Ëgweeso manyi vii mwino chu utëmi wa Muungu wahumbea fifë. 12Nene ngumukhanëa nyenye, itiku rasëë muji wasuu ugukuuriwa ikuurëo në iküü ukëra ëroo ra antu va u Sodoma.”
Hëhë a Miji në Inafea
(Mat 11:20-24)
13“Hëhë ako, Korasini! hëhë ako, Betisaida! gusoko nëmbesa makua në makuu në atendekia ukhanyu ëse arë atendekie uTiro na uSidoni, ahoo vafeire khaingë, na ugikhaëra masaa a magunëa na mau. 14Ëgweeso itiku rasëë ra uramui gujie utendeka bahu ino Tiro na Sidoni ukëa ukhanyu. 15Na vee, Kaferanaumu, uguhumbawa faka girundena? Veve ugutununtiwa fang'ë faka gwa arungu, va makhaa.
16“Wasuu në wamutegheeya nyenye wantegheeya nene, na wasuu nëwamuhita nyenye wang'ita nene, na wasuu në wang'ita nene wamuhita wasuu në wantumëe nene.”
Vasaa në Vemakumi Mufungatë Vasuka
17Na vasaa nëve makumi mufungatë na vavëë (aghosya) vëgasuka vina uyanjo ukuu. Vëuhanya, “Müküü, nanë inyonyinyonyi gekutëja sese nëgwaifa iraghëëyo gwa rina rako!”
18Yesu agavasucha, “Nene namuona Setani uguugwa mwino ufëto ufuma girunde. 19Raavi! Nene namufie udaho nachu nyenye mudahite ufanangëa njokha nanë nkumë nanë nguu yoongë ya muurughu na gutie gëntu nëgëumuvarya nyenye. 20Ëgweeso mutayanje gusoko inyonyinyonyi yumutëja nyenye. Bahu yanji gusoko miina anyu andëkiwe girunde.”
Uyanjo Wamwa Yesu
(Mat 11:25-27; 13:16-17)
21Ikhondo ërëro ërëro Yesu agijuywa uyanjo wa Mwahu Mweru na agahanya, “Nene ngugurumba vee, Tata Müküü, wa irunde na ng'e, gusoko mantu ayai wafihie anya mahaa na anya umanyi na ugavakunukwëëra ana nëanyui. Nha, Tata, gusoko uyii wayanjësiwe gwa mafenji ako. 22Mantu oong'e nene nayafiwe na Tata wane, na gutie mpa umwedu nëumumanyie Mwana ngwë Tata, mba gutie nëumumanyie Tata, ngwë Mwana na gëkaku muntu në Mwana wamuhwaniye ugumukunukwëëra mweeso.” 23Kangë agavafetukëa asëywi vakwe mweeso agarighëëtya gwa gëmpihë, “Bahu miho nëëkengee asaa ne nyee muyakengee! 24Gusoko tutë nene ngumukhanëa nyenye mwino anyagëdaghu vaingë na atëmi vëgahunukwa uona nëmuyakengee nyee na vinayaona, na utegheeya nëmuyategheeya nyee na vinayategheeya.”
Wikhori wa Musamaria në Muja
25Na rava, mwandëki wa seria agaëmëka amughumëe mweeso umaëghëëyo uguhanya, “Musëyi, nëtende urëë nëusae ufanga wa khae na khae?” 26Mweeso agamwëëra, “Eandëkiwe urë useria? ugusoma urë?” 27Na mweeso agasucha, “Muyanje Müküü Muungu wako gwa nkhoo ako oong'e, na gwa moyo wako voong'e, na gwa nguu, yako yoong'e na gwa mahaa ako oong'e na munyafifë#10:27 Munyafife: uGëyahudi në muntu në Muyahudi. wako mwino veve mughonjo.” 28Na Yesu agamukhanëa, “Vee wasucha ija tenda uyi, na vee uguduva.” 29Ëgweeso mweeso agafenja ugiitenda munyatutë mughonjo agamwëëya Yesu, “Na munyafifë wane nëanyu?”
30Yesu agasucha, “Muntu umwedu arë utununtie ufuma uYerusalemu winjë uYeriko, agagwëëra mukhatë a fumpi, vëgamumankëa na umugweesya vëgaenda, vëgamureka mweeso ukuya. 31Na gwa ahuha njija mukumbëki umwedu agakëëra njëa asëë, naarë wamuona mweeso agakëëra njëa ëngëja. 32Na viuyi, Mulawi, naarë wafika hafo agamuona mweeso, agakëëra njëa ëngëja. 33Ëgweeso Musamaria, naarë munyamuhënjo, agaja fana na mweeso urë, na naarë mweeso wamuona, agamwonea uvai, na 34agaenda kunë mweeso agaihunweera nkhomee yasee mukuta nane divai, na agayitunga nënkhomee yasee na agamunantëya undoghwe akwe agamutoa unyumba a aghenyi umuwaarya. 35Na fadiu ayo mweeso agahoa dinari ëvii agamufa müküü wa nyumba, ‘Mwaarëëye uyui, na gëntu goong'e nëwagëtumëa, gautambukëa nene nëjie ugusukëya vee nënasuka.’ 36Mukhatë antu avaa në va tatu, veve ugughema, në wafe nëwendie uraghëëra unyafife gwa muntu naarë wagwëëre mukhatëkhatë a afumpi?” 37Mweeso agahanya, “Në uyuo në wamwonee uvai mweeso.” Na Yesu agamukhanëa, “Enda na utenda uyii.”
Yesu Unyumba Amwa Martha ina Mariamu
38Yesu na asëywi vakwe arë vëmuhënjo, mweeso agahefea gëjiji. Na mukhema umwedu rina rakwe Marita agamughenyifa unyumba akwe. 39Na arë ukweti muhaja wakwe në uguëtwaa Mariamu, naarë wikhee umëghuu aMüküü na utegheeye masëyo akwe. 40Ëgweeso Marita arë winahëngahënga nyingë ya mëëmo a utenda; na mweeso agaenda kunë Yesu na umukhanëa, “Müküü, veve utilue në muhaja ane wandekeya nene nëtende mëëmo oong'e nene mughonjo? Mukhanëe mweeso aje na unjarëya nene!” 41Ëgweeso Müküü agamusucha “Marita, Marita, veve ugulwa na ukhaseka na mantu maingë. 42Gëntu gëmwedu nëgësëgheetwe Maria wahwaania gëntu nëgëja në atiuheywa na muntu.”
Currently Selected:
Luka 10: RNT
Highlight
Share
Copy
Want to have your highlights saved across all your devices? Sign up or sign in
Kirimi New Testament © Bible Society of Tanzania, 2008.