Matayo Mbaa naaituruku
Mbaa naaituruku
Kore mbaa naaigero tana buku naa naaipirita nkichon o siaai le Yeso, naaigero ꞉Lkipaaret Matayo oara apa laitalakunoni le kodi, naa ninye eji nkae arna Lawi. Kelimu sii lpayiani le nkanisa ekue apa aajo Matayo laigeroni le ana buku. Kebaki neigero kulo Omon Supati lenyena terichet lari lo onom o loo ntomoni ile, eidipaki aatiiu Yeso.
Kelimu Lomon Supati le Matayo aajo kera Yeso Mesia loo Isirael, ilo Aitejeunoni apa oaanyutae le lekutuk le Nkai. Kore apa te Matayo, ntoki e tipat payie eitodol ltung'ana loo Lyiaudi ooigerokita ajo kore mbaa kumo e naibon naaigero too Lkigerot neitabayieki te nkichon e Yeso.
Kore ana buku naa kelimu nkichon e Yeso ang'asu inoto enye metabaki nechei to lmusalaba o mpiunoto metabaki neiliep alo chumata. Kelimu nkitoria e chumata, inia /naibalunyieki te Yeso. Kore too nkoitiei kumo naa kepaachere nkiteng'ena e Yeso, nkiteng'ena ee Lparisayo o nee laiteng'enak loo nkitanapat taa mbaa naipirita inia nayiere neas ltung'ani payie echamaa ꞉Nkai. Nelimu Yeso ajo kore nkiteng'ena enye naa inji etuwuana naichuo ng'ejuk, nemepiki atua mbenia musan, indim nidol ana te motua saal lkereri le tomon o sapa.
Ketilimua Yeso mbaa kutuaa imiet naata tipat oleng te nkiteng'ena enye. Kore nekue naa ketilimua netiu nkitoria e chumata, neitoki aiteng'enicho neiko inia kitoria tenebulaa, neiteng'enicho sii nkitanyanyukot naapaapaacha naaipirita inia kitoria, o mbaa naipida nautaa nkichon taatua inia kitoria e chumata. Kore ne imiet neiteng'enicho mbaa naaipirita nkiting'oto e nkop o neiko nkitoria e chumata teneisul ntoki pooki kenya tesiedi. Kore mbae e siedi tana buku naa nkitanapata kitok e Yeso inia kata apa payie eirruaaya Lkipaareta lenyena mechomo aaitaa ltung'ana loo lochon pooki looiteng'eni lenyena. Kore kuna baa imiet e nkiteng'ena e Yeso naa ketumi nekue te motua e imiet metabaki ne sapa, kore ne are netii motua e tomon, netii ne uni motua e tomon o okuni, netii ne ong'uan motua e tomon o isiet. Kore ne imiet netii motua e tikitam o ong'uan metabaki ne tikitam o imiet.
Keyieu apa Matayo neitodolu nchere kera Yeso le ntalipa e Daudi oara apa lkinkii le Isirael. Neitodolu sii aitoki ajo kore nkitoria e Yeso naa nkitoria ng'ejuk namara ne ana kop.
Kore tana buku, neiger ꞉Matayo rereii ntomoni sapa ee loibonok le Nkai payie etum aitodolu ajo kera Yeso Mesia loo Lyiaudi nera sii Laitejeunoni loo lochon pooki. Keitodolu ana ajo kore lotunoto e Yeso naa mbae apake naibalunyie ꞉Nkai, nebaya ana nayieu ninye. Neitodolu aitoki Matayo nchere keichooki Yeso nkitoo naitoreyie chumata o nkop ana netejo ninye te motua e tikitam o isiet to lkereri le tomon o saal.
Kore rerei loo Lgirriki oji Kristo o rerei loo Lyiaudi oji Mesia naa kipirte nabo ake eata. Keutu ilo Kinkii oara Laitejeunoni, oitayia apa Nkai lekutuk too loibonok lenyena ajo kelotu.
Kore ꞉ltung'ana ooiruko Yeso, netaa looiteng'eni lenyena, nera sii nkera e Nkai.
Currently Selected:
Matayo Mbaa naaituruku: saq
Highlight
Share
Copy
Want to have your highlights saved across all your devices? Sign up or sign in
© 2021, Bible Translation and Literacy