Filemo 1
1
Atsyɛ̀’te
1Yɔɔn ŋwà’ne fóo mbwo mèŋ Pɔl, ngàŋa tsǎŋ ńtí nò Yěsô Kristo. Peg Timoté gẅie aa fɛ́ wɔgɔ nzèm Yěsô Kristo náa yɔɔn ŋwà’ne á mbwo gù Filemo. Ɔ̀ɔ fɛ́ weg we tʉ̀ nzẅìŋ, pege metsèm pú fa’a nà nò Yěsô Kristo. 2Áa jú, ńgíŋ ńgwɔ́ ye Apia, fɛ́ wege we manzwě, mbɔɔ yé Aleshʉpe, á *ngàŋa kwò wege tsẅɛɛ ncù, ńgÿo cú’tè pʉ̀a Kristo gie á kúu ndá gù. 3Tá wege Ssé, mbɔɔ Cʉ̀apʉ̀a Yěsô Kristo ne ńgwɔ́ né pi, ńne ńnéŋe sẅétè ntʉ́m pi.
Pɔl ne sie Ssé ńtí Filemo
4Fɛ́ wɔɔn Filemo, mèŋ ne sẅíŋte Ssé fʉ̀’ ntsèm, ńké ńkwaŋte gú kwaŋte, ésie Ssé, yé gẅie mèŋ n gu’te. 5Mèŋ sie yé á nue mèŋ n ne ńjú’u mé la’te ntí nkwòŋe gie ɔ̀ gẅiin nzèm pʉ̀a Ssé mbɔɔ ntí gie ɔ̀ lɔg ńzáb ntʉ́m gú nà Cʉ̀apʉ̀a Yěsô Kristo. 6Mèŋ n ne sẅíŋte Ssé ngie à lɔg pá’ pege temte, á fóo nà lézǎb ntʉ́m nà yé la, ńgÿó ngie ɔ̀ cwòŋo ńzsé menò mbòŋo mie á zɛ́te ngie pege gÿo tá ńdɔgɔ fa’a mbwo Kristo. 7N gɔɔn nue, nkwòŋe gie ɔ̀ gẅiin e ka gÿo m bú ńkág tɛ’. À fɛ́ wɔ̀ɔn, ntʉ́m wɔɔn sẅeté, á fóo nà pá’ ɔ̀ ka kẅiŋte pʉ̀a Ssé.
Pɔl ne sẅíŋte Filemo nà twó Onesime
8Mèŋ n gee ngàŋ ntúm Kristo, n tsɛ ńku’u léshwóŋó gú mmó gie á zɛ́te ngie ɔ̀ gÿo tá’, á fó nà mmó gie ɔ̀ ne gÿo, 9n gyá ngie n ge cʉa nà nkwòŋe yɔgɔ, ésẅíŋte gú sẅíŋte. Tà mbɔɔ pá’ mèŋ Pɔl, n cʉ̌’ pɔ́ nzẅìŋe ndÿò, ńgíŋe ńgwaa gwɔ́ fʉ̀’ɔɔn, ńgwɔ́ ndá tsǎŋ ńtí Yěsô Kristo lɔɔn. 10Mèŋ n ne sẅíŋte ɔ̀ nà twó Onesime, aa míŋ wɔɔn nà nò Yěso gẅie mèŋ n ka kúu ndá tsǎŋ ńzyé. 11Á laa tsɔ́ fʉ̀’ ɔ̀ těen ńzẅɛ́’ɛ yé wɔ́ tá’, á ké ńgwɔ́ fʉ̀’ɔɔn ɔ́ɔ gwaa ne zẅɛ́’ɛ yé, mèŋ n ne ńzẅɛ́’ɛ yé yɔ́ɔn.
12N tumó yé ngie à piŋ nzèm ńtsɛ́ɛ gú. Aa pɛ́’ɛ̀ ńgwɔ́ tʉ́m yɔ́ɔn. 13Mèŋ n gyá ngie á kěen ḿboŋ ngie à gwɔ́ pɔ́ lejʉ́ŋ mèŋ, ńne fa’a fà’ gie ɔ̀ kěen ńgwɔ́ jʉ’ɔɔn, mbà ɔ̀ fa’, á ná fʉ̀’ɔɔn gie mèŋ n gee menkÿo ńtí Nkʉ̀ Mbòŋo lɔɔn. 14Tá’, mèŋ n kaa kwoŋo légÿo tsɔ́ mmó tà ɔ̀ jú’u jú’ wɔ́. N té ne ńkwoŋo létsóte gú tsóte tà ɔ̀ gÿo nò mbòŋo ná mèŋ wɔ́. Mèŋ ne ńtsɔ́ɔn ngie ɔ̀ gÿo pɔ́ mmó gie ɔ̀ kwǒŋ.
15Ndyɛ̀’, mbà à ka na’á fó lejʉ́ŋ gù ńgʉa légwɔ́ gie ɔ̀ ge gÿo gíŋe gwaa gyá yé, à gwɔ́ pá’ pi yé ge cʉ́’ʉ ńnéŋe pɔ́ fʉ̀’ ntsèm. 16Á le gíŋe ńgwɔ́ pɔ́ nkwɔɔn wɔ́. À cʉa nkwɔɔn, ńcʉ́’ ńgwɔ́ pɔ́ fɛ́ gù gẅie ɔ̀ ge kwoŋo yé tɛ’. Aa mbwo mèŋ, ńgwɔ́ tʉ̀ nzẅìŋ tà ngʉ̀a shÿɔ́’ɔ pá’ à ge gwɔ́ mbwo gù? À ge gwɔ́ mbwo gù, é gwɔ́ kwà’ nyìŋ mesoŋ, é gíŋ gwɔ́ fɛ́ gù nzèm Yěsô Kristo.
17Á lɔɔn ńgwɔ́ gie ɔ̀ zsě ngie pɔgɔ ee nà tà’a nò, ɔ̀ kúe yé pá’ á ké ńgwé’e ńgwɔ́ wɔ̀ɔn, mbà ɔ̀ kúe wɔ̀ɔn pú’u, 18ńgwɔ́ gie à la cʉŋte tsɔ́ mmó mbwo gù, kà ɔ̀ ne ńkʉ́a pɔ́ tsɔ́ mmó mbwo yé wɔ́, ɔ̀ nyé mèŋ n gÿo ntÿó mbwo gù. 19Kwà’ mèŋ Pɔl zɔ lɔgɔ́ pwó yɔ́ɔn ńŋwe’e yɔɔn jʉ’, ńgie, n ge gÿo tÿó mbwo gù. Tá’ zsé ngie n gẅiin tsɔ́ mmó gie à lɔɔn ńgwɔ́ n zɛ́te ngie ɔ̀ tÿó mbwo mèŋ. À gwɔ́ pá’ ɔ̀ gwaa gẅiin légwɔ́ gẅie ɔ̀ gẅiin fʉ̀’ɔɔn tɛ’, ńzẅɛ́’ɛ pɔ́ wɔɔn. 20Á fɛ́ wɔɔn, tsétsɔ’ lɔg lezíŋ Cʉ̀apʉ̀a ńgÿo mmó gie mèŋ n ne ńdúɔ mbwo gù. Lɔg pá’ pɔgɔ pǔ ńda nnɛ́ nà Kristo, ḿbʉ́le ntʉ́m wɔ̀ɔn.
21N dɔgɔ pɔ́ pá’ ɔ́ɔ nyìŋ ńjú’ ncwò tá ńŋwe’e yɔɔn ŋwà’ne. Mèŋ ne ńzsé ngie ɔ̀ ge gÿo mmó gie mèŋ n ne ńzɛ́te mbwo gù tà tɔ́g pú’u. 22Gíŋe ńnyɛ́te lûm ndá, ńdɔg ńzẅí’te wɔ̀ɔn á nue mèŋ n ne ńkwaŋa ngie e Ssé lɔɔn jú’u sẅíŋte gí, mbà mé ge gíŋe tsɔ́’ɔ wɔ̀ɔn né pi.
Nzsònzèm tsyɛ̀’te
23Epafalas, gẅie peg yé pǔ ńgwɔ́ ndá tsǎŋ ńtí nò Yěsô Kristo tsyɛ’té gú. 24Mbɔɔ Malékuse, mbɔɔ Alistag, mbɔɔ Ndemas pɔ́ Lukase pie pegá pɔ̌ pǔ fa’a tà’a fà’.
25Cʉ̀apʉ̀a Yěsô Kristo ne ńgwɔ́ né pi.
Currently Selected:
Filemo 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.